<!-- وپ:پَرَگرَپہ -->
<!-- /وپ:پَرَگرَپہ -->
<!-- وپ:پَرَگرَپہ -->
مَن پَنچ سال ءِ دْرانڈێہیا پَد مێتَگ ءَ واتَرّ کُتَگَت۔ آ وَہد ءَ کہ مَن مێتَگ یَلَہ دات، آ وَہد ءَ ھَم جَنگ اَت۔ آ وَہد ءَ ھَم مَردُم چِست کَنَگ بَیَگ ءَ اَت اَنت۔ ھَر رۆچ جَنگَل ءُ پَٹّ ءُ مَیداناں بَلۆچ بَچّانی شیرتِتَگێں لاش دَست کَپَگ ءَ اَت اَنت۔ ھَرکَس تُرس ئے آماچ اَت۔ ھَرکَس دِلترَکّ اَت کہ اِے دَم نہ آ دَم نوں مَنی باری اِنت۔ زِندَگی سَکّ گران اَت۔ شَپ ءَ کَسّ ءَ وَتی گِس ءَ باپێں نِپادانی تَل ءَ وَپت نَکُت۔ مێتَگ ءَ اَنچۆ کہ لَیٹے ءَ شَہم کُت، سَجَّہێں مَردێں دێم پہ مَچکَدَگ ءُ کَور ءُ جَنگلاں تَتک ءُ چێر بُوت اَنت۔ اِشانی تَہا گێشتِر وَرنا اَت اَنت۔ ءُ مَن مێتَگ یَلَہ دات ءُ دْرانڈێہ بُوتاں۔
<!-- /وپ:پَرَگرَپہ -->
<!-- وپ:پَرَگرَپہ -->
دَرمُلکا مَن آزاتێں چَگِردے ءَ نِشتَگَتاں۔ نہ کَسے ءَ مئے لۆگاں دَور کُت ءُ سَجَّہێں کُنڈ پَٹِّت اَنت، نہ جَنگلاں لاش دَست کَپت۔ کَسّی دِل ءَ تُرسے نێستَت۔ ھَرکَسی زِند وَشّ ءُ وَشّال اَت۔ بلے مئے بَلۆچِستان ءَ آس ھما وَڈ ءَ رۆک اَت، اَنگا گێشتِر جَمبُور بُوتَگَت۔
<!-- /وپ:پَرَگرَپہ -->
<!-- وپ:پَرَگرَپہ -->
رۆچے ھالے اَتک۔ بَرے چَہ وانَگجاہے ءَ نۆدَربَرے ءِ گار ءُ بے گْواہ کَنَگ ءِ ھال اَت ءُ بَرے چَہ اِسپێتالا داکتَرے ءِ۔ وانِندَہ ءُ نَوانِندَہ، پیرێن ءُ وَرنا، سْیاسی گَلے ءِ باسک یا گَیرسیاسی مَردُم، ھَر رۆچ ھالے اَتک: پَوج پِلاں مێتَگ ءَ ماں رِتکَگ، چَہ پِلاں بازار ءَ دو وَرنا بَرَگ بُوتَگ، مَزَنێں شَہر ءِ راہ ءِ کَش ءَ لاشے دَست کَپتَگ۔ مێتَگانی مێتَگ پَوج ءَ ماں دَشتَگ اَنت۔ ھَیات جان ءِ رَنگێں سالۆنکێں وَرنا کِشک ءُ چارّاہانی سَر ءَ کُشَگ ءُ دَور دَیَگ بَیاگا اَنت۔ ءُ دَرمُلکا مَنی زِند اَسَرمَند بَیَگ ءَ نَہ اَت۔ پَمِشکا مَن ھِجبَر اِے اَندازَہ جَت نَکُت کہ اِے چۆنێں گْرانێں ساہَت اَنت۔ زِندَگی چۆن اَزاب بیت، اگں پَوج لۆگ ءَ دَور بِکَنت ءُ کُنڈ کُنڈ ءَ پَٹّاں بِبیت۔ مَردُماں چِست بِکَنت ءُ گار ءُ بے گْواہ بِکَنت۔
<!-- /وپ:پَرَگرَپہ -->
<!-- وپ:پَرَگرَپہ -->
بے گْواہ کُتَگێں مَردُمے ءِ مات ءُ پِت کُجام دَرد ءُ دۆرانی دێمپاں بَنت؟ اِے بَلاہێں گْرانێں دَرد کہ بے گْواہێں مَردُمانی لۆگ ءِ مَردُمِش سَگّ اَنت، مَن ءَ اِے دَردانی ھِچّ اَندازَہ نێستَت۔ لَہتے مَزَنجَگَرێں پِت وَتی بَچّ ءِ گار بَیَگ ءُ پَدا لاش ءِ دَست کَپَگ ءَ رَند ھَم دێم ءَ جُنزاں کَنت، بلے مات وَتی چُکّ ءِ واتَرّ بَیَگ ءِ اُمێت ءَ ، چَہ بازێں وَدار ءَ یا وَ گَنۆک بَنت یا اِے دَرد ءَ سَگِّت نَکَن اَنت ءُ مِر اَنت۔
<!-- /وپ:پَرَگرَپہ -->
<!-- وپ:پَرَگرَپہ -->
نوں کہ مَن واتَرّ کُتَگَت ءُ مُلک ءَ اَتاں، نوں زانَگ ءَ اَتاں کہ اِے چۆنێں گْرانێں دَردے؟ مَن نوں زانت کہ کَسے ءِ بے گْواہ بَیَگ ءَ پَد لۆگ ءِ مَردُم کُجام ھال ءَ بَنت۔ آیَنی چَمّانی واب ھَم بے گْواہ بیت ءُ دِل ءِ کَرار ھَم۔
<!-- /وپ:پَرَگرَپہ -->
<!-- وپ:پَرَگرَپہ -->
مَن کہ واتَرّ کُتَگَت، نوں مَن دیست کہ مێتَگ ءِ چارێں نێمَگاں لَشکَریاں بُنجُل جۆڈ کُتَگ۔ اِسکۆل، مَردُمانی لۆگ، مَسیت، ھِچّ جاگَہ پَشت نَکَپتَگ۔ ھَر جاگَہ پَوجیاں چَوکی بَستَگ ءُ نِشتَگَت اَنت۔ ھَرکَس تُرسا گار اَت۔ ھَمے تُرسا ھَمُک مَردُم ءَ وَت ءَ را چَہ وَتی بْرات، سْیاد ءُ اَزیزاں دُور دَشتَگَت۔
<!-- /وپ:پَرَگرَپہ -->
<!-- وپ:پَرَگرَپہ -->
مَن کہ واتَرّ کُتَگَت، مَن دیست کہ مێتَگ ءِ دوێں کَبرِستاں مَستِر بُوتَگ اَنت، کَبر گێشتِر اَنت۔ بارێں چُنت سالۆنکێں سَر ھَمے کَبرِستان ءَ نوں پہ اێمِنی واب اَت ءُ اَنگَت بارێں چُنت زِمینزادَگێں سَر ءَ کَبر ھَم نَسیب ءَ نَبُوتَگ۔ کَبرانی سَر ءَ جَتَگێں بَیرَک ھَم گار اَت اَنت۔
<!-- /وپ:پَرَگرَپہ -->
<!-- وپ:پَرَگرَپہ -->
بلے مَن سَکّ گَل اَتاں کہ مَن پَنچ سال ءَ پَد مُلک ءَ اَتکَگاں۔ مَنی پاد چَہ گَل ءَ زِمین ءَ اێر نَبُوت اَنت۔ گۆں مَنی آیَگ ءَ گُش ئے گُلزِمین ءِ پاد ھَم گَل ءَ چِست اَت اَنت ءُ آزمان ءَ ھَم وَت ءَ را پہ دابے ماں پۆشِتَگَت۔
<!-- /وپ:پَرَگرَپہ -->
<!-- وپ:پَرَگرَپہ -->
یَکّ رۆچے ھَور بُوت۔ تْرَمپ کہ گُلزِمین ءِ دِلبَند ءَ کَپت اَنت، مَنی چارێں آتراپاں ھاک ءِ وَشبُو شِنگِت۔ ءُ مَن دیست کہ مُلک ءِ ھَمے یَکّێں چیزّ مَٹّ نَبُوتَگ، اِے وَشبُو نوں گْوَش ئِے اَنگَت گێشتِر مِسکاتار اَت۔
<!-- /وپ:پَرَگرَپہ -->
<!-- وپ:پَرَگرَپہ -->
چَہ ھَور ءَ پَد مَن دْرِکّ بُوتان ءُ شُتاں کہ شێپانی آپاں سَیل کَناں۔ چاراں، گْوَست چۆ گْرَنچے ءَ بُتک۔ ھَور ءَ پَد سَنج ءَ جَت۔ شێپ ءَ آپ آُرت۔ سَرجَمێں بازار شێپ ءِ آپانی چارَگ ءَ دَر اَتک۔ اِے ھَور ءُ سَنج، اِے کَور ءُ نۆکاپ، اِے مَردُمانی مُچّی، گَپّ ءُ کَندَگانی تَوار کہ وَشّێں زێمَرے ءِ وَڈ ءَ تالان اَت، مَنی دِل ءَ تاہیر دَیَگ ءَ اَت اَنت۔ ھَور ءِ دُمی رۆچ ءَ کَسے دێم پہ کۆہ ءَ پِکنِک ءَ شُت ءُ کَسے کُمب ءُ گَرانی آپ ءَ جان ءِ شۆدَگ ءَ… ھَمُک دَماں سَکّ وَشّ اَت۔
<!-- /وپ:پَرَگرَپہ -->
<!-- وپ:پَرَگرَپہ -->
مُلک ءَ جَنگ وَ ھما پَیم ءَ بَرجاہ اَت، بلے ھَور ءَ کہ گْوَرت، مێتَگ ءِ مَردُم چَہ تُرسا کَمّے پِرامۆش بُوت اَنت۔ ھَور ءَ مێتَگ بْرَہدارتِر کُتَگَت۔ ھَمے گِر ءُ چیلّاں گُلاێش اَتان ءُ ھِچّ سَما نَبُوت کہ کَدی واب کَپتاں۔
<!-- /وپ:پَرَگرَپہ -->
<!-- وپ:پَرَگرَپہ -->
بَلاہێں تَوارے بُوت ءُ مَن جاہ سِرِّتاں۔ پُورَہ بَلاہێں گْرَندے ءِ تَوار اَت۔ گِنداں مات ءَ تالے گۆن ءُ لۆگ ءِ رێتکَگێں آپاں شُلُنچَگ ءَ اِنت۔ مات ءَ گْوَشت: “بْوَپس۔ اِے تَوار نوں زِندَگی ءِ بَہر اَنت۔”
<!-- /وپ:پَرَگرَپہ -->
<!-- وپ:پَرَگرَپہ -->
شَپ تَہار اَت۔ بَمبانی تَوار گێش بَیَن اَت ءُ دُور دُورا کُچِکّانی چانگَگ ءِ تَوار ھَم پێداک اَت۔
<!-- /وپ:پَرَگرَپہ -->
<!-- وپ:پَرَگرَپہ -->
<!-- /وپ:پَرَگرَپہ -->
<!-- وپ:پَرَگرَپہ -->
<سترُنگ><اِم>سَدگَنج بَلۆچ</اِم></سترُنگ>
<!-- /وپ:پَرَگرَپہ -->
<!-- وپ:پَرَگرَپہ -->
<!-- /وپ:پَرَگرَپہ -->
<!-- وپ:پَرَگرَپہ -->
<!-- /وپ:پَرَگرَپہ -->