<!-- وپ:پَرَگرَپہ -->
<!-- /وپ:پَرَگرَپہ -->
<!-- وپ:پَرَگرَپہ -->
شیرگوارێں ماہ ءَ چَہ کۆہ ءِ کَنڈَگ ءَ وَتی جَڈَکّۆکێں دێم دَر ءَ کُت ءُ بِچکَندانا گُلزِمین ءَ چارَگ ءَ لَگِّت۔ شیرچَکێں ماہِکاں ھَر نێمَگ ءَ شِنگ بُوت۔ سْیاہ ءُ تَہارێں چاگِرد ءَ بْراہے زُرت۔ جَمبَر ءِ شَیتانێں پُٹَّہے میزّاں میزّانا کِنزاں بُوت ءُ شُت ءُ ماہ ءِ رُژنائیں دێم ئِے اَندێم کُت۔ ھَر نێمَگ ءَ تَہاری ءَ ماں شانت۔ ماہ ءَ اِے گَپّ وَشّ نَبُوت ءُ گُشادیا چَہ پُٹَّہ ءِ پُشت ءَ سَرُکّ ئِے کُت۔
<!-- /وپ:پَرَگرَپہ -->
<!-- وپ:پَرَگرَپہ -->
ماہ ءُ پُٹَّہ ءِ اِے دِلساچێں لَیب داں سَہتُکے بَرجاہ مَنت بلے زیتّاں پُٹَّہ سَلێوَلے بُوت ءُ آزمان ءِ پْراہیاں گار بُوت۔ ماہ ءَ سارتێں گینّے کَشِّت۔
<!-- /وپ:پَرَگرَپہ -->
<!-- وپ:پَرَگرَپہ -->
سیرکَگ ءِ سَر ءَ نِشتَگێں مَہمجان ءَ ھَم سارتێں گینّے کَشِّت۔ آئی ءِ وَدارانی گْرانێں ساہَت ھَلاس بیت اَنت۔ ھُورپَرێں نُورجاں لُڈّانا پێداگ اَت۔
<!-- /وپ:پَرَگرَپہ -->
<!-- وپ:پَرَگرَپہ -->
مَہمجان ءَ کہ آ دیت، تَچانا دێما ئِے شُت ءُ اَمباز ئِے کُت۔ دوێں یَکّے دُمیگ ءِ اَمبازاں بے تْرِکّ ءُ تَوار اوشتات اَنت۔ دُێنانی دِل دْریکّ دْریکّا اَت اَنت۔ آ پہ اَنچێں کارے ءَ سَر گِپتَگَت اَنت کہ چَرائی ئے ھَیال ءَ ھَم دِلانی دْریکَّگ تێز بَنت۔
<!-- /وپ:پَرَگرَپہ -->
<!-- وپ:پَرَگرَپہ -->
آیاں چَرے مِہردُژمِنێں ڈێہ ءَ دیر رَوَگ ءِ پَیسَلَہ کُتَگَت۔ دُێناں زانت کہ اِد ءَ آیانی واہَگانی دُتاکُوێں کِشار ءِ سَبزَگ دْرۆگے۔ آیانی مِہرا ئِے راز دَنینگَہ پاشک نَبیتَگَت بلے پاشک بَیَگ ءِ تُرس ھَروَہدا ھَستَت۔ مَہمجان ءُ نُورجان ءَ شَرّ زانت کہ اِے راز ءِ پاشک بَیَگ آیانی مَرگ ءِ جار بیت۔ بِلّ ئِے آیاں گُناہے نَکُتَگَت، مِہر ءُ دۆستی کُتَگَت بلے اِے مِہر کہ آیاں کُتَگَت، اِشی ئے دْرُستێں بازار دُژمِن اَت، چی ءَ کہ نُورجاں زِگریے اَت ءُ مَہمجاں نُمازیے۔ نُورجاں سێرێں کَودا ءُ زِمیندارے ءِ جِنِکّ اَت ءُ مَہمجاں کَودا ءِ ڈِگارانی سَر ءَ کار کانۆکێں بَزگَرے ءِ بَچَکّ۔
<!-- /وپ:پَرَگرَپہ -->
<!-- وپ:پَرَگرَپہ -->
آیانی نْیام ءَ دین، زات ءُ زُریات ءُ زَرّ ءِ کۆہێں دیوال مِکّ اَت اَنت بلے آیاں اِے دْراہێں دیوال پْرۆشت اَنت ءُ اِشک ءِ کُوچَگ ءَ اێر کَپت اَنت ءُ ھَمے چیزّ مَہلُوک ءِ تَب ءَ نَہ اَت۔ مَردُمانی نِزّ ءَ اِے مَزَنێں گُناہے اَت، چَہ دینی ءُ کَومی دۆد ءُ رَبێدَگاں سَرتابی اَت ءُ مَہمجان ءُ نُورجان ءَ شَرّ یاد اَت کہ شَش سال پێسَر دو ھَمے وَڈێں مِہر ءِ شَیدایانی مَردُماں، آیان ءَ گۆں تَپَراں ڈَکّی کُت ءُ کُشت۔
<!-- /وپ:پَرَگرَپہ -->
<!-- وپ:پَرَگرَپہ -->
نی نُورجان ءُ مَہمجان ءِ دێم ءَ دو راہ اَت اَنت، چَہ وَتی مِہر ءَ دَزبَردار بَیَگ یا چَرے ھَلک ءَ دَر آیَگ۔ مَزَنێں چار ءُ بیچّارے ءَ رَند آیانی آمید ءِ سَنگ وَتی مِہر ءِ نێمَگ ءَ جَہل بُوت ءُ آیاں دَر آیَگ ءُ دِگِہ نێمَگے رَوَگ ءِ پَیسَلَہ کُت۔
<!-- /وپ:پَرَگرَپہ -->
<!-- وپ:پَرَگرَپہ -->
مَہمجان ءَ نُورجان ءِ مَہدرۆشُمێں گۆناپ ءِ نێمَگ ءَ چارِت ءُ پَدا ماہ ءِ نێمَگ ءَ چَمّ شانک دات اَنت کہ دێم پہ وَتی مِنزِل ءَ جُنزان اَت ءُ نُورجان ءِ چَمّ کَمّے دیر شیرچَکێں ماہِکانی ءَ میچَّلێں کَہیرانی نێمَگ ءَ سَکّ اَت اَنت کہ وَتی گۆروَنڈێں ٹالِش جَہل جَتَگ ءُ اوشتاتَگَت اَنت۔
<!-- /وپ:پَرَگرَپہ -->
<!-- وپ:پَرَگرَپہ -->
دوێں بے تْرِکّ ءُ تَوار وَڈ وَڈێں ھَیالاں سَر ءُ چێر اَت اَنت کہ اَناگَہا ٹیٹیێں مُرگے ءِ تَوار ءَ پَدّرَہێنت اَنت۔
<!-- /وپ:پَرَگرَپہ -->
<!-- وپ:پَرَگرَپہ -->
مَہمجان ءَ گُشت: “نُورجاں! نی بُرێں… نی بُرێں کہ مارا رۆچ ءِ ٹِکّ کَنَگ ءَ پێسَر چَرے آبَند ءَ دَر آیَگی اِنت۔”
<!-- /وپ:پَرَگرَپہ -->
<!-- وپ:پَرَگرَپہ -->
دوێں رَہ گِپت اَنت۔ آیاں دَنینگَہ چار پَنچ گام جَتَگَت کہ تیرانی تَوار ءَ بے تَوارێں چاگِرد جَکسێنت ءُ مَہمجان ءُ نُورجاں سَر لێٹِت ءُ کَپت اَنت۔
<!-- /وپ:پَرَگرَپہ -->
<!-- وپ:پَرَگرَپہ -->
دَمانُکے ءَ رَند چَہ کَلێرے ءِ پُشت ءَ مَردُمے دَر اَتک ءُ ھۆناں میچَّلێں مَہمجان ءُ نُورجان ءِ کِرّا اَتک ءُ اوشتات۔ تُپَنگ ئِے اَنگَت دَست ءَ اَت۔
<!-- /وپ:پَرَگرَپہ -->
<!-- وپ:پَرَگرَپہ -->
دوێں ٹَپّیگ نَزّیک پہ نَزّیک کَپتَگ ءُ نَکُّک جَنَگ ءَ اَت اَنت۔ مَہمجان ءِ بَڈّ ءِ کَلّیگ تْرَکِّتَگَت ءُ رِتکَگێں آپ گۆں آیانی زَگرێں ھۆناں ھَوار اَت اَنت۔ تُپَنگیێں مَردَکار اوشتاتَگَت ءُ آیاں چارَگ ءَ اَت۔ سَہکَندَنێں نُورجان ءِ چَمّ اوشتاتَگێں مَرد ءِ سَر ءَ کَپت اَنت۔
<!-- /وپ:پَرَگرَپہ -->
<!-- وپ:پَرَگرَپہ -->
“اَبّا آ آ…”، چَرائی ئے ھۆن ءَ گُلگُلێں دَپ ءَ اَبّا ءِ لَبز ھۆناں میچَّلانا دَر اَتک ءُ اوشتاتَگێں مَرد ئِے پَدّرَہێنت۔ پہ ھۆنیگێں پِتے ءَ اِے یَکّ سَہکَندَنێں جِنِکّے ءِ دَپ ءَ دَر اَتکَگێں ھما لَبز اَت کہ آئی ءِ تَہا ھَزار دَرد ءُ اَرماں، ھَزار گِلَگ ءُ جُست مان اَت۔
<!-- /وپ:پَرَگرَپہ -->
<!-- وپ:پَرَگرَپہ -->
مَرد ءَ وَتی چَمّ نَزّ کُت اَنت بلے اَبّا ءِ پَدگوانک آئی ءِ کۆہێں دِل ءِ تَلارێں دیوالاں ژامبَلێنَگ ءَ اَت۔ آئی ءَ وَتی چَمّ پَچ کُت اَنت ءُ زِمین ءِ سَر ءَ کَپتَگێں مَہمجان ءُ نُورجان ءِ نێمَگ ءَ چارِت۔ مِہر ءِ دوێں شَیدا وَت ماں وَت گُلاِش دِگِہ دُنیاے ءِ سَپَر ءَ ، دِگِہ مِنزِلے ءِ شۆہاز ءَ دَر اَتکَگَت اَنت۔
<!-- /وپ:پَرَگرَپہ -->
<!-- وپ:پَرَگرَپہ -->
کَمّے اوشتَگ ءَ رَند مَرد ءَ دَست ءِ تُپَنگ بَڈّ ءَ کُت ءُ پُشت ئِے ماں دات۔ دیر، ٹیٹیێں مُرگے ءِ تَوار پێداگ اَت ءُ آزمان ءَ اێُکێں ماہ گۆں مُلُوری، دِم پہ وَتی مِنزِل ءَ کِنزان اَت۔
<!-- /وپ:پَرَگرَپہ -->
<!-- وپ:پَرَگرَپہ -->
<!-- /وپ:پَرَگرَپہ -->
<!-- وپ:پَرَگرَپہ -->
<سترُنگ><اِم>ناگُماں</اِم></سترُنگ>
<!-- /وپ:پَرَگرَپہ -->
<!-- وپ:پَرَگرَپہ -->
<!-- /وپ:پَرَگرَپہ -->