اَئید نَزّیکّ اَت ءُ ھَجّام سَکّ رَشّ اَت اَنت۔ ٹَلُو اَتک ءُ وَتی ھۆکێن ئِے گِپت ءُ شُت۔
اِے مۆسُم ءَ ھَجّامانی یَکّ مَزَنێں ھَرابیے اِش اِنت کہ سَر چِنَگ ءُ ریشّ تْراشَگ ءِ نِہاداں وَسَّرا وَت وَدّێن اَنت۔ نہ بُکشی ءَ بَکش اَنت ءُ نہ کُوٹّ ءَ ۔ پَمِشکا ما، سیتَّسَر مَرچاں سَر ءِ ٹاپ کَنَگ ءَ پێسَر ھَجّام ءَ جُست کَنێں کہ ٹالے مید ءِ چِنَگ ءَ چُنت کَلدار گِر ئے؟ بلے ھَجّام گێشتِر ٹَلُوزَیاں پۆک کُتَگ اَنت۔
مَن وَتی ھۆکێن ءِ وَدار ءَ اَتاں کہ ھَجّام ءَ یَکّے کِریم ءُ پَوڈَر جَت ءُ چُٹّێنت۔ چَہ مَن پێسَر اَتکَگێںے شُت، سیٹّ ءَ نِشت۔
پارِگ بیتَگێں مَرد ءَ چَہ کیسَّگ ءَ ھَزاریے کَشِّت ءُ دات۔ ھَجّام مَرد ءَ اَنچۆ چارَگ ءَ اَت گُش ئے جُست ءَ اِنت کہ چُنت بِکاٹاں۔ مَرد ءَ گۆں بُرزێں تَوارے ءَ جَواب دات "دْرُست تئیگ اِنت"۔۔۔۔
ما وَدار ءَ نِشتَگێں یَکّ ءُ دُمیگ ءَ چارَگ ءَ لَگِّتێں۔
مَرد چَہ دُکّان ءَ دَر اَتک گُڈا یَکّے ءَ گۆں وَتی کَشَئێگ ءَ گُشت:
"رۆگِن کہ باز بیت کَسّ ھَر ءِ مِچێن ءَ چَرپ نَکّ اَنت"!
<سترُنگ><اِم>اَین کادِر