تاں ھما وَہد ءَ کہ جَہاں ھَست اِنت
تاں ھما وَہد ءَ کہ تْرِپ اَنت اِستال
تاں ھما وَہد ءَ کہ ماہ دَہ ءُ چار ئے
گێدی ءِ دِلبَند ءِ سَر ءَ دْرَپشیت
تاں ھما وَہد ءَ کہ رۆچ ءِ رُژنائی
ھَرچ شَپ ءِ اَلَّم دَر کَپیت دێم ءَ
تاں ھما وَہد ءَ کہ کَپۆت تَہنا
مَکَّہێں دَربَند ءِ گامیگ، نال اَنت
تاں ھما وَہد ءَ کہ زِر ءَ نیلّێں
ھَست بَنت چَول ءُ زیتپرُشۆکێں گْوَرم
تاں ھما وَہد ءَ کہ چِنال کێچ ءِ
سَسّی ءِ زَیمێں تْرانَگاں گێج اَنت
تاں ھما وَہد ءَ کہ کۆٹ نَسیر ھان ءِ
ماں میری ءَ راجی دَپتَراں مانیت
تاں ھما وَہد ءَ کہ شالکۆٹ گَنجێں
چِلتان ءُ مُردار ءِ ھُدابُند اِنت
تاں ھما وَہد ءَ کہ سُورمَگێں بۆلاں
وَت نِگَہپان اِنت گۆرَگێں کُلّا ئِے
تاں ھما وَہد ءَ کہ سیوی ءِ بازار
شَکَّلێں سیتّانی وَڈالیگ اِنت
تاں ھما وَہد ءَ کہ کَہیر مِنجێں
ماں لَد ءُ گْواش ءَ پہ وَڈے لُڈّ اَنت
تاں ھما وَہد ءَ کہ تاسُپێں بَچّے
پہ مَکَّہێں ماتیگ ءَ زَریت سَہتے
تاں ھما وَہد ءَ کہ آدَمیزاتے
تَلوَسیت پہ مِہرانی گُلێں نام ءَ
تاں ھما وَہد ءَ کہ اَبێتکێں دِل
رَپتَگێں باریگ ءِ دَوارجاہ اِنت
تاں ھما وَہد ءَ کہ دُکُرم ءَ چَہ
مَلَّگێں پَرہاد ئے سِد اَنت چیہال
تاں ھما وَہد ءَ کہ جَوانسال ءِ
گێدی ءَ مان اَنت گُشتَگێں گُپتار
تاں ھما وَہد ءَ کہ اَرس ھۆلُمبێں
شێپ گِراں بَنت چَہ دیدَگێں بَژنێں
تاں ھما وَہد ءَ کہ کُوڈَوێں اِمبرۆز
پہ شَپجَتێں اُزر ءَ کُہت ءُ بَژنیگ اِنت
تاں ھما وَہد ءَ کہ شِپانکے مئے
تیہُر ءُ ماتبَندی سَرے نِشتَگ
شانک دَنت چَمّاں پہ گُلێں ڈێہ ءَ
اَلَّمێں لێکیت وَت ءَ وَلی ءُ وارِس
تاں ھما وَہد ءَ کہ نیلَّگ ءَ بْراہیت
نام مَزَنمَرّێں میرێں داد شاہ ءِ
تاں ھما وَہد ءَ کہ سُکَنسَنجێں
پازُل ءِ گالانی تَوار ھَست اِنت
تاں ھما وَہد ءَ کہ زانت پَشت کَپتَگ
تاں ھما وَہد ءَ کہ ھۆش بَرجاہ اِنت
سَد ھَزار دْرۆگبَند ءِ تَہا یَکّے
راستی ءِ پاکێں داں بِدَنت گُشتانک
تَو بِزاں ھَست ئے، تَو نَمیران ئے
تَو نَمیران ئے کہ راستی ءِ رَہشۆن
تَو اَبَدمان ئے، تَو اَبَدمان ئے
تَو نَمیران ئے، تَو نَمیران ئے
گُلام ھُسێں شۆہاز