چِتَور مَن ھَیال ءِ
کِتاب ءَ بِپێچاں
دِل ءِ زَنگاں بارێں
چِہ پَیم ءَ بِرێچاں
اِے بَژن اَنت ءُ اَرماں
اِے سۆز اَنت ءُ سۆزماں
اِے دَرد اَنت ءُ اَندۆہ
اێشاں نێست دَرماں!
کَئی کاگَدێں لُنٹ؟
بِلَرز اَنت پہ مَن
مَنی مَرگ ءِ بَژن ءَ چَہ مۆتکے بْیار اَنت!
یا دَردے بِمار اَنت
یا پہ مَن یَکّ نێکێں دْوایے بُلۆٹ اَنت
کَئی کاگَدێں لُنٹ؟
کَئی نُگرَہێں دَست؟
بِکَرز اَنت پہ مَن
کہ دادے شَہار اَنت
یا دَردے بِمار اَنت
یا پہ مَن یَکّ نێکێں دْوایے بُلۆٹ اَنت
کَئی نُگرَہێں دَست؟
کئے ءَ ھَست مَنی گَم؟
کَئی گۆڈَلێں چَمّ؟؟
پہ مَن اَرس گْوار اَنت
مَنی راہ ءَ چار اَنت
کہ چَہ وَت شِزار اَنت
مَنی تاسُپێں بَچّ…
مَنی تَنگَوێں بْرات
مَنی سْیاد ءُ وارِس
مَنی دۆست ءُ دۆزواہ!
کہ چَہ وَت شِزار اَنت
چَہ ھیکّانی تُرسا
چَہ گُرکانی گُرس ءَ
نَہ اَنت جُست ءُ پُرس ءَ
کہ بارێں کُج ءَ شُت
اِے گارێں رَمَگ مئے
کہ گُرکاں چَہ پُرّ اَنت
اِے کۆہ ءُ دَمَگ مئے
نَگِنداں شِپانک ءَ
بِبَندیت لانک ءَ
بِجَنت گُرکیاں گۆں
اِے گُرکانی پانک ءَ !
مَن نالاں چۆ بُلبُل
پہ وَشّێں بَہارے
پہ مِسکێں ڈِگارے
پہ سَبزێں کِشارے!
ھَمے دَرد ءُ اَندۆہ
ھَمے بَژن ءُ اَرماں
ھَمے سۆز ءُ سۆزماں
کہ نالاں چۆ بُلبُل
مَنی بَزَّگێں چَمّ
کَن اَنت اَرس گُلگُل
بلے!!!
کَئی شار ءِ دامُن؟
کَئی لێسُو ئے بُش؟
کَئی پاگ ءِ لَمب ءَ ؟
کَئی جیگ ءِ دۆچاں؟
اِے اَرساں بِرێچاں!
اِے زَہیرانی مۆرتاں
کُج ءَ مَن بِگێچاں؟
چِتَور مَن ھَیال ءِ
کِتاب ءَ بِپێچاں؟؟
<سترُنگ><اِم>جی آر مُلا