آ وَتی شَہر ءَ اێوک اَت۔ تێوَگێں شَہر ءَ دِگِہ کَسّ نێست اَت۔ آئی ءَ اێوکی وَشّ بُوتَگَت۔ اِے شَہر ءَ دِگِہ کَسّ آباد نَہ اَت، آئی ءَ اَبَید۔ شَہر ءِ جَلوَہ ءُ نِدارَگ اَنچۆ دِلکَشّ اَت کہ مُرتَگێں دِل بۆد کَنت۔ ھَر نێمَگ ءَ شیرکِنێں آپ ءِ کَور ءُ جُو تَچَگ ءَ اَت اَنت۔ باگ ءُ باگیچَہ سَبز ءُ آباد اَت اَنت۔ ھَر تَہر ءِ مُرگ، دَلوَت ءُ جانوَر اِے شَہر ءَ ھَست اَت۔ اَبرَم ءِ دِلکَشّێں نِدارَگ ءِ ھَمراہی ءَ مۆسُم ءِ ھِساب ءَ اِے شَہر ءِ بَدَل نێست اَت۔ ھَرّۆچ شَہر ءِ یَکّ نہ یَکّ کُنڈے ءَ جَمبَر ساہێل اَت اَنت ءُ ھَور گْوارَگ ءَ اَت۔ ھَرکُجام شَرّی ءُ زێبائی کہ یَکّ شَہرے ءِ واست ءَ اَلَّمی اِنت، آ چیزّ اِے شَہر ءَ ھَست اَت۔ آ اِے شَہر ءِ یَکّێں واہُند اَت۔ آئی ءَ را اێوکی ءَ ھِچبَر بے تاہیر نَکُتَگَت ءُ آ وَتی اێوکی ءَ سَکّ شات ءُ گَل اَت۔
یَکّ رۆچے آئی ءَ ھَیال کُت کہ چَہ ھُشکێں نِندَگ ءَ نا ءِ گَڈَّگ کَنَگ گِہتِر اِنت۔ چیزّے نہ چیزّے کَنَگی اِنت۔ گُڈا چے کَنَگی اِنت؟ آئی ءَ چُرت جَت کہ اَنچێں کارے کَنَگی اِنت ءُ اَنچێں چیزّے مَن ءَ سازَگی اِنت کہ مَنی شَہر ءَ اَنگَت نێست اِنت۔ بلے مَنی شَہر ءَ وَ ھَر چیزّ ھَست۔ کُجام چیزّ اِنت کہ پَشت کَپتَگ؟
یَکّ بَرے پَدا ھَمے سَوَڈَگ ءَ بُوت۔ بازێں پِگر ءُ جِڈَگان ءُ شَہر ءِ گَرد ءُ سَیل ءَ پَد، آئی ءَ مارِت کہ مَنی شَہر ءَ وَ ھَر چیزّ ھَست اِنت بلے اگں یَکّ چیزّے ءِ کَمّی اِنت، آ “بُت” اِنت۔ بِزاں آئی ءِ شَہر ءَ بُت نێست اَت ءُ دِگِہ ھَرچے ھَست اَت۔ آئی ءَ پَیسَلَہ کُت کہ مَن جْوانێں، بُرز ءُ بُلَند ءُ مَزَنشانێں بُتے ٹَہێناں۔ آئی ءَ شَہر ءِ زِباتِرێن ءُ سَبزَزارێن ءُ بُستِرێں ٹُلّے ءَ مَزَنێں دْرَچکے ءِ کَش ءَ کہ دِگِہ ھِچّ نێست اَت، شُت ءُ مَزَنێں سِنگے اێر کُت ءُ بُت ءِ تْراشَگ ئِے بِنا کُت۔
ماہ ءُ سال گْوَست اَنت ءُ آ گۆں ھَمے سِنگێں بُت ءِ اَڈّ کَنَگ ءَ مُشکُول اَت۔ یَکّ رۆچے آئی ءَ مارِت کہ بُت تَیار اِنت۔ اِے بُرز ءُ بُلَندێں بارَبَند ءُ شێپَگپۆنزێں وَشرَنگ ءُ ڈَولدارێں جِنِکّی بُتے اَت کہ تَیار اَت۔
اِے بُت ءَ را بَنیادَمی اَنچێں رَنگے جَت ئِے کہ چۆ اِنسان ءَ بُوت ءُ کَسّ ءَ ھَم پَجّاہ نَیاُرت کہ اِے اَسلی اِنسانے یا بُتے۔ اِشی ئے گْوَر چۆ پُلّ ءَ سْرَپتَگَت اَنت ءُ پادانی شَم ءَ گُشَئێگ ءَ بے نَگ پِٹَّگ ءَ اَت۔ اِشی ئے لُنٹانی سَر ءَ اَنچێں بِچکَندے سَہرا بَیَگ ءَ اَت کہ چَہ تێوَگێں شَہر ءَ زێباتِر اَت۔ اِشی ئے چَمّانی تَہا گُش ئے اُمێتے ءِ دُنیاے ءَ وَتی باندات ءِ رُژنائیں سَپَرے بِندات کُتَگَت۔
آئی ءَ بُت چارِت، تَ وَت ھَیران ءُ ھَبَکَّہ بُوت کہ اِے چےے کہ مَن شَرّ کُت۔ آئی ءَ بے سَہ نێست اَت کہ اِے رَنگێں ڈَولدارێں چیزّے جۆڈ بیت۔ آئی ءَ جێڈِت کہ اِے ڈَولدارێں بُت کہ اِد ءَ اێوک بِبیت، جَلوَہ نَدَنت۔ اِشی ئے کَش ءَ دِگِہ یَکّ بُتے ٹَہێناں کہ بِلّ ئِے دو بَنت۔ آئی ءَ دِگِہ ھَمے کَدّ ءِ سِنگے آوُرت ءُ دِگِہ بُتے ءِ تْراشَگ بِنا کُت۔ ماہ ءُ سال گْوَست اَنت ءُ اِے بُت ھَم تَیار بُوت۔ دوێں بُت یَکّے دُمیا سَکّ نَزّیکّ اَت اَنت۔ دُمی بُت کہ تَیار بُوت تَ اِے مَردێنی بُتے اَت۔
اِے بُتانی جۆڈ کَنَگ ءَ پَد، آ سَکّ گَل ءُ وَشّ بُوت کہ نوں مَنی شَہر ڈَولدارتِر اِنت۔ ھما چیزّ ءِ کَمّی کہ بُوتَگ، نوں سَرجَم اِنت۔
یَکّ بَرے پَدا آ وَتی شَہر ءِ سَیل ءُ نِدارَگ ءَ دَر اَتک۔ شَہر سَکّ مَزَن اَت ءُ دێر گْوَستَگَت کہ آ گۆں اِے بُتانی تْراشَگ ءَ دَزگَٹّ بُوتَگَت۔ آئی ءَ شَہر ءِ سَرجَمێں سَیل ءَ یَکّ ھَپتَگے لَگِّت۔ ھَپتَگے ءَ پَد واتَرّ ھما جاہ ءَ اَتک کہ اود ءَ آئی ءَ بُت شَرّ کُتَگَت اَنت، تَ ھَیران ءُ ھَبَکَّہ بُوت… سِنگ ءُ سْیاہ بُوت… دوێں بُت اِد ءَ نَہ اَنت…
یَکّ بَرے پَدا تێوَگێں شَہر ئِے گۆلِت تَ اِے بُتانی ھِچّ جاگَہ سۆج نێست اَت۔ آ جێڈَگ ءَ اَت کہ اِے شَہر ءِ چارێں کُنڈ بَند اَنت، شَہر ءَ آئی ءِ ھُگم ءَ اَبَید نہ کَسے پُتِرت کَنت ءُ نہ کہ کَسے دَر اَتک کَنت۔ گۆں ھَمے جێڈَگ ءُ وَزواساں، آئی ءَ را مَرۆچی اَوَلی بَر ءَ کۆچَنڈَگ ءَ گِپت ءُ آ، باگ ءِ سارتێں ساہِگے ءَ واب کَپت۔ چَہ واب ءَ کہ بُست ئِے کُت، آئی ءِ نِزّ ءَ مَزَنێں ساہَتے گْوَستَگَت۔ چَمّ ئِے پَچ کُت اَنت تَ سْیاہ ءُ تَہارێں زِنداںے ءَ بَندیگ اِنت۔ آ جێڈَگ ءَ اَت کہ چے بَیَگ ءَ اِنت؟ مَنی ھَستی ءُ دُنیا اِے رَنگ ءَ بَدَل بَیان اِنت۔ اِے چۆنێں اِسرارے ءَ مَن ءَ گِپتَگ۔
دَماںے ءَ پَد زِندان ءِ یَکّ دَروازَگے ءِ پَچ بَیَگ ءِ تَوار بُوت۔ زَمزیلانی ژِلیکّ ژِلیکّ اَت۔ کَسانێں رُژنائیے ٹِمبان اَت۔ دو کَس آئی ءِ نێمَگ ءَ پێداک اَت کہ چَہ دُورا آیانی دێم گِندَگ نَبُوت اَنت۔ نَزّیکّا کہ سَر بُوت اَنت، تَ تێوَگێں زِنداں رُژن ءَ بُوت۔ آئی ءَ اِے کہ دیست اَنت، ھُشک ءُ ھَیراں بُوت۔ چے ءَ کہ اِے ھَمائی ءِ جۆڈ کُتَگێں دوێں بُت اَت اَنت کہ آئی ءَ گۆں وَتی جِند ءِ دَستاں جۆڈ کُتَگَت اَنت۔
نوں آئی ءَ یات اَتک کہ مَن اِے بُت ھما دْرَچک ءِ کَش ءَ جۆڈ کُتَگَت اَنت کہ اِے دْرَچک ءِ سارتی ءُ وَژبُو ھَرچے ءَ بِلَگّیت، آئی ءِ تَہا زِند، اَگل ءُ دانِش وَدی بیت۔ بلے نوں… باز وَہد گْوَستَگ ءُ لَیب چَہ آئی ءِ دَست ءَ شُتَگَت ءُ اِے شَہر ءِ واہُند ھَمے بُت بُوتَگَت اَنت کہ وَتی جۆڈ کَنۆک ءِ نام ءَ ھاکِمی کَنَگ ءَ اَت اَنت۔ ھَر چَرِند ءُ پَرِند، سَہدارِش وَتی تابِہ جۆڈ کُتَگَت ءُ اَسلێں واہُند یَکّ تَہارێں زِنداںے ءَ بَند اَت ءُ چَہ پَشۆمانی ءَ بَشبَش وَرَگ ءَ اَت۔
<سترُنگ><اِم>اِلتاپ بَلۆچ