Man delay sóká lahtén gapp nebeshtah kotagat. Yakké man é goshtagat ke Balóchán gón Pakestáná jang wayl kotag o wat mán watá pédhetagant. Domi esh ke selahbandén Balóch baré ám Balóchéay gádhié pach gerant o baré yakké awár janant o charáiay syádán zar lóthant. Nebeshtánkay sheng bayagá rand sangatéá maná gosht ke lahtén damagán shwánagáni pasán ham barant agan á róchá delesh sajji bolóthit.
Paré gappán lahtén syási galáni mardomán maná sará zort. Yakké goshit ke taw mahluká delprósh kanay o degeré goshit tai habar rást ant bale é wahd naent choshén gappáni kanagay.
Mahlukay delpróshiay habar gwastag. Á pa dapay habaréá agan delprósh buténant Dáktar Máleká wati kár déri kotagat. Agan mahluk delprósh bit pa ájuidóstáni bésarén kárán, pa brádarkoshi. Mani nebeshtánkay maksad ham hamésh at ke agan mardomán delprósh kanag nalóthet, bésarén káráni sará begeret.
Chónáyá Eslám o Pakestánay wadhá Balóchay jonz pa dapay habaréá laparzag ent. Syásatay tahá nezóri bant, nezóriáni neshándehi bit, nezóri sharr kanag bant. Mohkamén jonz pa érádéá halás nabant, mohkamter bant.
Wati nebeshtánkay tahá man é habar ham kotagat ke Allanezar o Hayrbyáray tahá é bud mán ent ke á chizán gehter kot kanant. Hayrbyárá jangé bendát kot, donyáay seláh áort o nógwarnáyáni tahá bahr kotant, nun Landaná bangalahéay tahá neshtag ke na man kasé gendán o ná gón kaséá trán kanán. Baré baré bayáné dant.
Pa bayánay dayagá ettehád nabit. Pareshiá áiá gón Balóch jonzay drostén sarókán nendag o habar kanag lóthit. Mardom wasshán kanag lóthant. Áiay bahr kotagén seláháni wajahá bázén Balóchéá watá kósháréntag, bázénéay daniga nám o neshán gár ant. Gón syási mardomán nend o nyádá áiay pónz kaster nabit. Agan bit ham pa Balóch jonzay démá baragá é mazanén korbánié naent.
Daniga mardom cha Hayrbyárá yappáragi delprósh naant. Anga lahtén anchén mardom hast ke charáiá hamé óstá dárit ke Hayrbyár wati kénagá kótáh kant o hampegrén syási sarókáni hamráhiá etteháday ráh o daráni pach kanagá komakk kant. Áiá paré zután hamé bayán ke etteháday sará dátag, mardomán wasshatk kotag. Áiay bayánay jawábá BNMay Hammal Haydará sharterén bayáné dátag o Hayrbyárárá é masteri bakshátag ke taw jágah o wahdá begishén, pa ettehádá má nendag o habar kanagá sádhi én. Báyad ent Hayrbyár hamé gappá démá bebárt o hamé masteriá bozurit.
Allanezar mardomán dóst bit o sakk dóst bit. Áiay syási mokálepáni habar wati jágahá bale ám Balóch charáiá mazanén gaté gipt. Garibén mardomé, pameshka garibén Balóch sarpad bant agan áháni jédhahá yakké zánt, hamé mard ent. Bale Allanezaray saray kimat gésh bayán ent. Pésará sarkará dah lakk ér kotag, nun panjáh lakky kotag. Sarkáray pawj chó hadhakkahi kochekká áiáy sará ant. Kojám róché shum bit, kass nazánt. Báyad á wati zendá Balóch jonzay kótáhián yakk yakk gerán bekant.
Man nagoshán Allanezar, Hayrbyár o Bráhondag agan ettehád bekant, Balócháni drostén jédhah halás bant. Man é ham nagoshán ke é mardom hamdel o hamsetk bebant o yakk páthiéay tahá benendant. Chósh but nakant. Bale báyad ent é wati zórá yakké domiay helápá na balkén Balóch rájay rakkénagay wástá kár bebandant.
Yakk kamithié jódh kanag bebit ke áiáy tahá drostén galáni yakk yakké jahgiré mán bebit. Wat mán wati jédhah hamé kamithiay tahá gish o giwár kanag bebant. Donyáay démá hamé kamithi wati gappá yakké bekant o démá byárit. É choshén padnabudén káré naent ke but makant. Agan chósh but bezán Balóchay jang daniga halás naent.
Sájed Hosén
