(Garibay Chokkay Garibén Negáh!)
Chárig
Chárig chiá goshant o chón kár kant! Chárigá cha edárah o pawji rahbanday “saymi shamm” ham goshant.
Chónáyá é molkáni wati chérandri edárah ant ke pa wati molkay paházagá dege molkáni tahá chérandari kár kanant, o báz barán é wati molkán gón dagá ham bant o wati molkay lashkari rázán dozhmenén molkáni lashkarán dayant.
Domi hamá molk ke zórgir ant, á wati zérdastén molkáni tahá wati zórákiay barjáh dáragá yakké lashkaray chérén edáraháni sawabá o domi hamá golámen rájay mardomán wati mardom kanag o kár gerag ent.
Badnasibi goshay yá ché bale zérdastén rájay ke hamá chárig ent, áiá zórgir pa wati kár geragá gechén kant, á sakk báz torsenák ent parcháke á dróshom nadant, á yakk rang naent, á hazár póshay talá ent.
Eshiay masterén mokk hamá zérdastén molkay wazir ant ke sarkáray chérén edárah eshán pa wati chárigiay garazzá gechén kant o sarzáherá waziri póshákány kant. Chónén mansabé genday! Taw ke wazir kanay tai démá peté, masteré, zemmadáré pa wati rájá, anchén mehrwánén chédagé.
Bale zérdastay gwará chosh naent. Á wazir pa tai zér kangá atkag.
Golámay gwará áp chá boná lord ent. Golámén rájay tahá cha wazirán pad haminchok taw jahlay edárahán áyán bay, tará hamé mardom démá kapán bant.
Bale las mahlukay tahá Balóchay golámén o jangzadagén chágerdá, agan má hirt bechárén godhá edá má cha sarkári mardomán abayd hamá záherén dróshomán ke gendén, á chár thóliá ant.
Awali: Mollá
Domi: Neshahay baypári
Saymi: Wájakár
Cháromi: Neshahi o dozz.
É záher o paddarén ant ke esháni syáli tachká gón sarkárá ent.
Eshán abayd chárigay dege yakk anchén kódekén dróshomé ke áiay dhakk saká tawrénák ent. Á ent nádáni, betálimi o delpahki. Inchok táwán ke esh dant, á záherén nadant. É chárigay hamá dróshom ent ke eshiay eláj shaur o sench o samáay wadi kanag ent.
Dege yakk dróshomé ke á sakk kárámad o raw kanókén repké ke sarkár gón chálákiá áyán láchár kant, káresh gipt, á mardom chágerday tahá námién mardom bant, zenday takéá nám bekasshant o mardom áyáni sará bésah bekanant o sharrén negáhéá bechárant. Choshén mardom agan chárigay wadhén badén námé bandag bebit yá barag bebant, mardom bah o bakkadh bant.
É mardom géshter hamá bant ke wat na sarkári edárahéá rawant o nán chérén edárah eshán tachká hál kanant. Esháni rahwat o hál o ehwál saymi mardomay wasilahá bant.
Goddhi chárig hamá bant ke cha gal o edárahéá dar rawant o dozhmeni kanant.
Hasá Bejjár
