Gón Balóchán Layb Makan
Engrézi: Hamád Hasan Rend
Balóchi rajánk: Pazal Balóch
Hamá wahdá ke mani pirok, mani mátay pet, warná at, yakk róché Brethesh Sarkárá bartiay wástá yakk mardomé áháni métagá dém dát ke pa janagá, ke Yuropy mán patátagat, mardom barti bekant.
Mani piroká jangárá "lám" goshtagat. Wekshanari (Wiktionary) ay redá lám cha Paránsi labz “L'armeá” dar atkag).
Pa donyáay gendagá hodónákén mani piroká wati omr do sál mastar gosht o watárá barti kanáént. Wahdé áiay gohár sahi but, áiá lógay chizé dastá kot (ke annun námy cha mani delá shotag) o hamé bartiá atkagén marday randá kapt bale habar cha halwatá gwastagat o pirok dém pa Ránchiá rahádag butagat. Á Hendostán, Párs, Mésopotémia o Palastiná sapar kanán but o gón jádui métagáni choshke Kasre Shirén, Kóhe Bistun o Hánkénay kessahán wátar but.
Mán Basrahá gón Ahmad námén Arabéá áiay drosti o rásti but ke áiárá Eráki Arabiy wánént. Eskólay zamánagá anjári (Standard) Arabiay wánag o dar baragay wahdá maná pirokay Eráki gálewáray Arabi labzán sakk mán gishent. Pa man é goshtári (Spoken) Arabiay pahmag modám jédhahé at.
Mani pirokay pádán sochagay dág per at. Yakk shapé Basrahá lahté Arabá áháni gedán mán dásht o mani pirok ásay tahá at ke dar áyagá ráh nést at. Áiay sangat Aliá á cha odá dar kot.
Jangá rand mani piroká bass dhéwari kot o mani pédág bayagá pésar cha é kárá daskassh but. Man Sargodáyá wati pirok o ballokay gwará rost o mazan bután o mani endege brát o gohár Sháhpuray nazziká yakk métagéá mani mát o petáni kerrá etant. Mani pirok kasánén wázdáráni kahólay yakk puryátién mardé at o maná modám hamé gomán but ke á cha wati kerr o kashay drostén mardomán jetá at.
Wahdé man kasán etán, mani dósterén sangatay petá modám áiárá gón man o mani brátá layb kanagá makan kot o gosht: ("بلوچاں نال ناں کھیڈیا کر!")
"Gón Balóchán layb makan. Esháni bahtá éoká basáni dhéwari nebeshtah ent"
Á wahdá ke man chokké etán, maná hamé dhéwariay gapp sakk wassh but.
Nun man baré baré jédhán mani puryátién piroká agan bezántén man dhéwariá sakk nábalad án godhá bárén áiá che máretagat.
Hamád Hasan Rend
