É hamá wahday gapp ent ke má “Ázár” támoray aksbandiá kanagá atán. Támoray aksbandi ni halás bayagi at. Hásel Hakimá (Ostád Rapik Ómánay kasterén brát) ke támoray aksbandiá may hamkópag at o harch kárá házer at, áiá cha Torbatá atkagén sangat bezán Kamálan Bibagr, Moktár Golám, Hapiz Lál o Ostád Háled (ke Mósomay námá námdár ent) o Negwar Akaydhamiay dráhén sangat wati lógá dawaté dátant.
Wahdé má Hakimay lógá shotén dán Ostád Dádelláh o Jamál Balóchá sáriá wati jók jatagetant o neshtagetant. Gón may poteragá ostád Dádelláhá kandáná darráént:
“Shomárá adhay rapal majant! Shomá kojá bitaget? Márá shodá kosht.”
Dráhén sangatán thahk dát o kandet. Ostád Dádelláhá sangat wasshatk kotant.
Padá Ostád cha waragá béhál but o wati benjuy sáz kot. Hapiz Lálá lahté sawtay parmáesh kot o ostádá hamé sawtáni sáz jatant.
Kammokéá pad Hakim atk o goshty ke warag pédák ant. Ostádá galé chet, goshádiá benjuy dhabbet o goshty:
“Sangatán shodlápi benju janag maná sakk tawrit, bale man cha shomá majbur bitagán.”
Gón hamé gappán shot ostáday thahk. Dráhén sangatán ostáday hóriá kandet. Warag waragá pad, padá ostádá sázi diwán bendát kot. Bale é randi ostádá géshter Rapik Ómánay sawtáni sáz jatant. Dráhén sangat ostáday sázani gósh dáragá sakk dardig bitant ke drégatén Ómánay jend hamé diwáná gón bitén o hamé sázani sawty bejaténant.
Ostád Dádelláh hamé sáz o sawtáni tahá gár at. Goshay záná Ostád, Rapik Ómánay hamráh at. Anágahá ostádá sáz band kot. Hamé sahtá Hakimá yakk bachakkué dastá geptagat o Hapiz Lálay kerrá áort o nádént. Hakimá gwandhu jost kot ke eshiá pajjáh káray?
Gwandhuá damáná gosht, “Haw, é Shawku ent.” Moktáray némagá dasty shahár dát, “Á Lálu ent.” Dráhén sangatán bachakkuay chálákén gappáni eshkonagá thahk dát o kandet. Hakimá bachakkuay pajjár kot, “É lálá Rapikay chokk ent, eshiay nám Tawpik ent, eshiá say sál bitag ke lálá bégwáh kanag bitag. Eshiá wati petay gendag ham hósh nakant.”
Drostén sangatáni kandag óshtátant. Hapiz Lálá gwandhu wati bagalá kot o wati kerrá nádént. Josty kot, “Taw mani gómá Torbatá káay gón?” Gwandhuá sar sorént enná. Hapizá jost kot, “Chiá? Man tará ódá gádhiá sawár kanán, tarrénán, bázárá barán, tará chiz zirán dayán.”
Bachakkuá yabbaré hecch nagosht, padá goshty, “Maná taw bebaray gón, abbá edá kayt godhá maná nagendit.”
Dráhén sangat bétawár bitant. Ostád Dádelláhay bénurén chamm ars bitant. Hapiz wati gappá goshay pashómán at. Hamé sahtá goshay záná man zendánéá atán o Sanjar maná tawárá at.
Rapik! Watarr kan. Tawpik tai rahchár ent.
Alibaksh Dád