Lommah, Démá Diwál Ant
Lommah! Dege yakké zánt yá nazánt bale taw genday máté ay, pameshka taw wa zánay ke maná wazwás gipt godhá ganóki zurant yá chizé ke békesásá tawrénit godhá man áiá nebeshtah kanán. Bárén ché nawisán, hodá bezánt, bale man nebeshtah kanán. Taw zánay wahdé taw gerag butay ham maná wazwásá gept, maná ganókián zort. Maná...... Maná békesás tawret bale taw zánay hamá ent ke man labzé ham nebeshtah nakotag. Bárén taw eshiá che nám dayay?
Lommah! Say o panjáh o hapt ent. Baré morg cheri cheri kanant, baré parpathéay tawár kayt. Bale drostán cha gésh maná shapay hámóshiay shór takánsar kant. Begenday é shór yakk wahdé anchosh zórák bebit ke mani bátená cha dhann dar áyán bebit, jalháray paymá betrakkit o harchizá móm bekant. Drostén zórákén zamzilán áp bekant ke maróchi may gardenáni tawk ant.
Lommah shap béwahd ent, gwarbám ham nazzik ent o bándá chakkásé ham hast ent bale man pa chakkásá béwáb naán. Choshén chakkás hazár kayt o hazár rawt. Na bésóbiay chort nay sóbmandiay shádmáni. Parcháke man wa zánán é chakkásay jendé naent, balkén masterén chakkás tai bandigi ent o maná hamé chakkásá takánsar kotag.
Taw zánay man wahdé bétáhir bán godhá maná shumén gardenay poshtá ragé gipt. Bárén é bétáhiriá pa man chi chi gón nést. Espérag hamé wahdá jah janant yá hamá ke shekamay andará chér o górén nádráhi ant, yabbará mani sará orosh kanant. Bale man goshán é angat choshén mazanén jédhah naant. Á damáná ke maná tai bandigiay hálá gept, zemin goshay cha mani pádáni chérá dar atk. Maná sartarréá gept. Cháh ke mani hamok darday dawá ent bale na cháh táhir dayagá at nay dege baláh o beter. Harchi jédhán, hamincho gendán bale chammáni démá Kéchay kabrestán kayt ke hamá shapá taw gón Gomán o Abadmáná wati shap róch kotagat. Shapay róch kanag énnán balkén "panáh zurag", mordagáni "báhóth bayag".
Lommah! man wa zánán ke taw chenkas mazanén shérazálé ay, bale Lommah kabrestán? Haw genday anchosh goshant ke wati dóstén mardomé kall bebit godhá kabrestán bim nadant. Bale Lommah kabrestán o shap? Padá "panáh o báhóthi", drostán cha masterén gapp esh ent ke Kéchay wadhén halkéá?
Lommah! Tará man awali randá kadi dist, annun maná sarjamá yát pédág ent. Goshay záná mani majgay andará kaséá támoray pardahé jatag. É hamá Kéch at, Pedá Chawk, 2023 at ke Bálách Mawlábakshay lásh ér at. Mardom chó mór o madag at. agan kaséá latthé bejatén, boná nakapt. Chamm chest koténant, dur durá mardom at. Shap ke but godhá mardom kamter butant bale róchá békesás atant.
Yakk gesé pa zahrsháni kanókén mardomán bist o chár kalák pach at. É mát Nasimahay ges at, Neshnal Baynkay dém pa démay damká. Harkas ke hejbar Kéchá nayatkagat, áiá ham yát bit. Mani ham Kéchá awali rand hamesh at o lógi lóg ham. Boraw áp bwar, kammo damá bálá kan, náné bwar, hahaha! Masterén chiz cháhé bwar, hamincho ke wárt kanay. Taw hamedá dochár kaptay.
Lommah! Man goshay Balóchi nebeshtah kanag nazánán bale tai Balóchi gapp záná maná chón dóst bant! Adhay, zálem! Choshén zagrén Balóchi gapp, pameshká man ham kóshest kanagá án ke pa taw Balóchiá nebeshtah bekanán.
Adhay Lommah! Man tará genday gosht, "Tará man wa shapá kaympá ham distag. Taw ódá parchá may kerrá nayatkagay." Taw gwasht, "Man démá nayán, man hamé wadhá gomnám án." O man kandet, man gwasht, "Man záná kojá námdár án, mani kerrá wa byá." Padá taw atkay, dánke márch jonzet o tará hamódá cha roksat kot.
Lommah! Nun taw band ay, tará chinkas tawár per jatag, chinkas goshtag, mani kerrá wa byá bale taw nun parchá áyagá naay. Nun mani áwáz ón dar áyagá naent. Goshay anchén diwálé mekk ent ke áiá mani tawár dáshtag, o tai pády dáshtagant.
Lommah! Mani chárén proshtagén Balóchi dánk bárén tará zendáná sar bant yá nán? Balkén némráhá prosht o prósh bant? Kay zánt? Parchá bezánt? Bass thappién labz ant, agán sar butant, begenday tai dardá gón sharik but bekanant, sar nabutant godhá wati bézobánén, proshtagálewárén jenekká pahell bekan.
"Hazárán Balóch"