<!-- وپ:پَرَگرَپہ -->
پہ زُباںے ءَ شَرتِرێں سْیاہَگ ھما اِنت کہ لَبزانی تَوار ءَ شَرّی ءَ گیشێنیت ءُ زُبان ءَ واناک کَنت۔ اِے ھِساب ءَ بِچار ئے پہ بَلۆچی زُبان ءَ شَرتِرێں سْیاہَگ لاتینی یا رۆمَن اِنت۔
ھَر زُبانزانت ءَ کہ بَلۆچی زُبان ءِ سَر ءَ کار کُتَگ، آئی ءَ ھَمے گَپّ جَتَگ کہ پہ بَلۆچی ءَ لاتینی سْیاہَگ شَرتِر اِنت۔ یَکّے ءَ ھَم نَگُشتَگ کہ اَرَبی سْیاہَگ شَرتِر اِنت۔
مئے تَہا بِزاں بَلۆچی ءِ نِبِشتَہ کَنۆک ءُ وانۆکانی تَہا ھَم بازێںے اِے گَپّ ءَ زانت کہ لاتینی سْیاہَگ بَلۆچی ءِ لَبزاں شَرتِر گیشێنیت۔ ما اِے گَپّ ءَ زانێں بلے وَہدے اَرَبی سْیاہَگ ءِ یَلَہ دَیَگ ءُ لاتینی ءِ زیرَگ ءِ گَپّ کئێت گُڈا ما دِل ءَ پُرّ کُت نَکَنێں۔ مئے دِل ءَ وَڈ وَڈێں تُرس یا جُست پاد کئێت۔
یَکّ تُرسے اِش اِنت کہ اگں ما لاتینی سْیاہَگ ءَ بِزیرێں گُڈا چَہ اێران ءُ اَوگانِستان ءُ اَرَبِستان ءِ بَلۆچاں سِدێں۔
مَنی ھَیال ءَ چُش نَبیت پَرچا کہ لاتینی سْیاہَگ چُشێں چیزے نَہ اِنت کہ بَلۆچ ئِے مَزان اَنت۔ لاتینی ھَمے “اَبکد”اِیانی نام اِنت کہ ما اِسکۆل ءَ وَنتَگ اَنت۔ مَرچیگێں دَور ءَ اِشاں ھَر ھما بَلۆچ زانت کہ دو جُماِت ئِے وَنتَگ یا آئی ءِ کِرّا پَون یا کَمپیُوٹَر ھَست۔
دِگِہ تُرسے اِش اِنت کہ اَرَبی سْیاہَگ ءِ یَلَہ دَیَگ مارا چَہ اِسلام ءَ سِندیت۔
اِے ھَم رَدێں گَپّے۔ پہ مُسُلماں بَیَگ ءَ اَرَبی سْیاہَگ نَلۆٹیت۔ نہ اَرَبی کَسے ءَ مُسلُماں کَنت ءُ نہ لاتینی کَسے ءَ کاپِر کَنت۔ اگں لاتینی کاپِری سْیاہَگے بیتێں، مُلّایاں کُراں لاتینی ءَ نَکُتَگَت۔ دُنیا ءِ مَستِرێں اِسلامی مُلک اِندۆنێشی ءَ اِنت۔ اِندۆنێشی زُبان ءِ سْیاہَگ اَرَبی نَہ اِنت، لاتینی اِنت۔ ھَمے پَیم بَنگلَدێش، تُرکی، یا دِگِہ اِسلامی مُلک ھَست اَنت کہ آیانی زُباں اَرَبی سْیاہَگ ءَ نَہ اَنت، بلے آ چَہ دین ءَ نَسِستَگ اَنت۔ پَمِشکا بَلۆچ راج ھَم اَرَبی سْیاہَگ ءِ یَلَہ دَیَگ ءَ بے دین نَبیت۔
دِگِہ یَکّ اُزرے کہ دێم ءَ آرَگ بیت، اِش اِنت کہ بَلۆچی ءَ ھَزاراں کِتاب ھَست کہ اَرَبی سْیاہَگ ءَ اَنت۔ اگں ما اَرَبی سْیاہَگ ءَ یَلَہ بِدَیێں، اِے دْرُستێں مَڈّی گار ءُ گۆر بَنت۔
اِے ھَم بے بُنێں تُرسے۔ مَرچی ٹِکنالۆجی اَنچۆ دێم ءَ شُتَگ کہ کِتاباں چَہ یَکّ سْیاہَگے ءَ دُمی سْیاہَگ ءَ تَرّێنَگ اِینچُکێں مَزَنێں گَپّے نَہ اِنت۔
دِگِہ یَکّ اُزرے ھێلداریَئێگ اِنت۔ چیزے مَردُم گُشیت کہ ما اَرَبی سْیاہَگ ءَ ھێلدار ایں۔ پہ ما اِشی ئے یَلَہ دَیَگ ءُ لاتینی ءِ زیرَگ گران اِنت۔
اِے گَپّ راست اِنت کہ ما اَرَبی سْیاہَگ ءَ ھێلدار ایں بلے ھێلداری جَوازے نَہ اِنت۔ چۆ وَ کَسے تَریاک ءَ ھێلدار اِنت، کَسے شَراب ءَ ھێلدار اِنت۔ اِشی ئے مانا اِے نَہ اِنت کہ اِے نِشَہ شَرّ اَنت۔ ھَمے پَیم اَرَبی سْیاہَگ ءَ ھێلدار بَیَگ ءِ مانا اِے نَہ اِنت کہ اَرَبی سْیاہَگ شَرّ اِنت۔
مَردُمانی دِگِہ تُرسے اِش اِنت کہ لاتینی سْیاہَگ نۆکێں چیزے، بارێں دێم ءَ چۆن بیت۔ رَو کَنت، نَکَنت۔
اَوَلی گَپّ اِش اِنت کہ لاتینی سْیاہَگ پہ بَلۆچی ءَ نۆک نَہ اِنت۔ لانگوَرت ڈَیمزا 150 سال پێسَر لاتینی بَلۆچی ءَ کِتاب نِبِشتَہ کُتَگ۔ پَدا رَنتِرا ھَم بازێں مَردُمے ءَ لاتینی سْیاہَگ ءِ سَر ءَ کار کُتَگ۔ اِشانی تَہا یَکّے سَیَد ھاشُمی اِنت کہ آئی ءَ تَچک ءَ گُشتَگ کہ “بَلۆچی ماں اَرَبی سْیاہَگ ءَ ھِجبَر راست ءُ تَچک نِبیسَگ ءُ وانَگ نَبیت۔” ءُ “رۆمَن سْیاہَگ پہ بَلۆچی ءِ نِبیسَگ ءَ چَہ دْرُستاں جْوانتِر اِنت۔”
<!-- /وپ:پَرَگرَپہ -->
<!-- وپ:پَرَگرَپہ -->
اِے بابَت ءَ بازێں چار ءُ بیچارے ءَ رَند مَن، مَنِ ناگُمان ءَ ، اَرَبی سْیاہَگ ءِ یَلَہ دَیَگ ءُ لاتینی سْیاہَگ ءِ زیرَگ ءِ پَیسَلَہ کُتَگ۔ مَنی لێکَہ اِش اِنت کہ اگں مارا وَتی زُباں ھَکّ ءُ دِل دۆست بیت گُڈا سْیاہَگ ءِ گِچێں کَنَگ ءِ وَہد ءَ بایَد اِنت ما سْیاسی وَپاداری، دینی مَجبُوری یا زاتی پَسُند ءُ ناپَسُند مَچارێں، زُبان ءِ ھاجَتاں بِچارێں۔ اَنچۆ کہ ما سَواس ءِ زیرَگ ءِ وَہد ءَ پاد ءِ ماپ ءَ چارێں، ھَمے پَیم سْیاہَگ ءِ زیرَگ ءِ وَہد ءَ زُبان ءِ ماپ ءَ بِچارێں۔
مَن اَرَبی سْیاہَگ ءِ یَلَہ دَیَگ ءَ ھِچّ لَپَرزَگ نَہ آں۔ مَنی نِزّ ءَ لاتینی سْیاہَگ ءِ اِے دْرۆشُم کہ بَلۆچی ءَ زُرتَگ، دُنیا ءِ واناکتِرێں نِبِشتَہ رَہبَنداں یَکّے ءُ سۆبێں بیت۔
<!-- /وپ:پَرَگرَپہ -->
<!-- وپ:پَرَگرَپہ -->
31- 05-2024
ناگُماں
<!-- /وپ:پَرَگرَپہ -->