Pa zobánéá sharterén syáhag hamá ent ke labzáni tawárá sharriá gishénit o zobáná wánák kant. É hesábá becháray pa Balóchi zobáná sharterén syáhag Látini yá Róman ent.
Har zobánzántá ke Balóchi zobánay sará kár kotag, áiá hamé gapp jatag ke pa Balóchiá Látini syáhag sharter ent. Yakkéá ham nagoshtag ke Arabi syáhag sharter ent.
May tahá bezán Balóchiay nebeshtah kanók o wánókáni tahá ham bázéné é gappá zánt ke Látini syáhag Balóchiay labzán sharter gishénit. Má é gappá zánén bale wahdé Arabi syáhagay yalah dayag o Látiniay ziragay gapp kayt godhá má delá porr kot nakanén. May delá wadh wadhén tors yá jost pád kayt.
Yakk torsé esh ent ke agan má Látini syáhagá bezirén godhá cha Érán o Awgánestán o Arabestánay Balóchán sedén.
Mani hayálá chosh nabit parchá ke Látini syáhag choshén chizé naent ke Balóchy mazánant. Látini hamé “ABCD”iáni nám ent ke má eskólá wantagant. Marchigén dawrá eshán har hamá Balóch zánt ke do jomáety wantag yá áiay kerrá pawn yá kampyuthar hast.
Dege torsé esh ent ke Arabi syáhagay yalah dayag márá cha Eslámá sendit.
É ham radén gappé. Pa Mosolmán bayagá Arabi syáhag nalóthit. Na Arabi kaséá Moslomán kant o na Látini kaséá káper kant. Agan Látini káperi syáhagé bitén, molláyán Korán Látiniá nakotagat. Donyáay masterén Eslámi molk Endónéshiá ent. Endónéshi zobánay syáhag Arabi naent, Látini ent. Hamé paym Bangladésh, Torki, yá dege Eslámi molk hast ant ke áyáni zobán Arabi syáhagá naant, bale á cha diná nasestagant. Pameshká Balóch ráj ham Arabi syáhagay yalah dayagá bédin nabit.
Dege yakk ozré ke démá árag bit, esh ent ke Balóchiá hazárán ketáb hast ke Arabi syáhagá ant. Agan má Arabi syáhagá yalah bedayén, é drostén maddhi gár o gór bant.
É ham bébonén torsé. Marchi theknálóji anchó démá shotag ke ketábán cha yakk syáhagéá domi syáhagá tarrénag inchokén mazanén gappé naent.
Dege yakk ozré héldáriayg ent. Chizé mardom goshit ke má Arabi syáhagá héldár én. Pa má eshiay yalah dayag o Látiniay zirag grán ent.
É gapp rást ent ke má Arabi syáhagá héldár én bale héldári jawázé naent. Chó wa kasé taryáká héldár ent, kasé sharábá héldár ent. Eshiay máná é naent ke é neshah sharr ant. Hamé paym Arabi syáhagá héldár bayagay máná é naent ke Arabi syáhag sharr ent.
Mardománi dege torsé esh ent ke Látini syáhag nókén chizé, bárén démá chón bit. Raw kant, nakant.
Awali gapp esh ent ke Látini syáhag pa Balóchiá nók naent. Lángwart Dhaymzá 150 sál pésar Látini Balóchiá ketáb nebeshtah kotag. Padá ranterá ham bázén mardoméá Látini syáhagay sará kár kotag. Esháni tahá yakké Sayad Háshomi ent ke áiá tachká goshtag ke “Balóchi mán Arabi syáhagá hejbar rást o tachk nebisag o wánag nabit.” o “Róman syáhag pa Balóchiay nebisagá cha drostán jwánter ent.”
É bábatá bázén chár o bicháréá rand man, mane Nágománá, Arabi syáhagay yalah dayag o Látini syáhagay ziragay paysalah kotag. Mani lékah esh ent ke agan márá wati zobán hakk o del dóst bit godhá syáhagay gechén kanagay wahdá báyad ent má syási wapádári, dini majburi yá záti pasond o nápasond machárén, zobánay hájatán bechárén. Anchó ke má sawásay ziragay wahdá páday mápá chárén, hamé paym syáhagay ziragay wahdá zobánay mápá bechárén.
Man Arabi syáhagay yalah dayagá hecch laparzag naán. Mani nezzá Látini syáhagay é dróshom ke Balóchiá zortag, donyáay wánákterén nebeshtah rahbandán yakké o sóbén bit.
31- 05-2024
Nágomán