بْیا پَدا شَتکێں تَلارانی دِل ءَ دِرّاں کَنێں
گْرانبَہائیں دۆستی ءُ مِہر ءَ پَدا اَرزاں کَنێں
تَئی دوێں گالاں مَنی ناسَرپَدێں دِل گۆں جَتَگ
بْیا پَدا گالانی رَبّالَو زِری نۆداں کَنێں
مارا چَہ راہ ءَ گِسَر کُرتَگ اِے بے راہێں سَراں
اِے دِل ءِ ھۆناں چَہ، سُہرێں مادِنے رَنداں کَنێں
نی دِل ءَ سَہڈێں کہ جْوانێں رۆچ چَمّاں اَندَر اَنت
زاں پہ زاں نِندێں جَگَربُرّێں گَماں تالاں کَنێں
راہ مئے بَستَگ اَگاں کۆہ ءُ تَلار ءُ گْرێشَگاں
گۆں وَتی سَرپَنجَگاں شێری، رَہے بُرّاں کَنێں
میریانی پْرُشتَگێں بان ءُ رَبَد مئے سَنگَر اَنت
چَہ بَدێں ھۆناں سَگارانی زِہاں سۆہاں کَنێں
کَمبَری دَورے پَدا کارێن ءُ ماں جان ءَ پَہِلّ،
مَکَّہێں ماتانی مِہر ءُ دۆستی ءِ شیراں کَنێں
نارَواہاں پہ مئے گْوَرگِنداں کُتَگ اوماں، پَدا
شَکَّلێں اَرواہ ءُ گَہگیرێں سَراں بێراں کَنێں
چۆ گِرۆک ءُ بیر ءُ نَپت ءُ آسگوَرێں جَمبَر ءَ ،
دُژمِنانی زێد ءُ میتاپێں لَداں سۆچاں کَنێں
پُلّێں دیوَن ءُ مَراگاہانی کۆہێں ھاتِر ءَ
دَہسَری سُوت ءُ ھَزارگَنجێں نَپاں تاواں کَنێں
ماں تَرّ اَنت ھانُل ءُ مَہگُل اَگاں دێم ءَ مئے
مِنَّتانِش زُورێں بَندیگِش وَتی کَولاں کَنێں
دُور نَہ اِنت مِنزِل ھَزارگَنج ءُ ھَزارنازێں، سَیَد
ھَمبَلاں زُورێں چۆ کَور ءَ دُورسَرێں رُمباں کَنێں
بَہرِن
آدێنَگ ءِ سَباہ ءِ 5:20
20-اَپرێل-1956
سَیَد ھاشُمی
Sayad Háshomi