بْیا بْیا کہ مَن تَئی رَہسَراں زَگرێں دِل ءِ ھۆناں مُشاں
پہ تَئی دَپ ءِ بِچکَندے ءَ ھَر واہَگ ءَ زِند ءِ کُشاں
نَدر آں تَو دێم ءَ ماں مَپۆش، دۆشی بَشارَت بُوت مَن ءَ
ھِجبَر نَبیت اِنت ماہِکاں تکہاں نَشِنگیت تَئی گُشاں
بارێں کَدێنا دِل مَنی رَنجیت پہ نْیاد ءِ پَتَّرے
بارێں کَدێنا مَن تَئی زَہیرانی آس ءَ پیلُشاں
کَولیگ آں پہ مَن ساہَتے اِستالێں چَمّاں شانک دَئے
بِلّ ئِے کہ مَرچی سَمبَہیت مئے تْرانَگانی کَلکَشاں
شالا مِراتاں کہ مَنی مَرگ اِنت پہ مَن زِندَگی
وَہدے مَنی کَبر ءِ سَر ءَ تَئی مَنگَلی دَست ءِ پْرُشاں*
آسے کَپات اِنت دْرێگَتێں، گێدی ءِ بے مِہرێں دِل ءَ
گِنداں کہ کاڈانی گُلێں جالاری پۆشاک تَئی تُشاں
۔۔۔۔۔۔۔۔۔۔۔۔
*پْرُشاں = پْرُش اَنت
*تُشاں = تُش اَنت
۔۔۔۔۔۔۔۔۔۔۔۔۔۔
مُمتاز اِیسُپ
Momtáz Isop