آزمانک
"زَمبادی"
"اِیسا ھَینڈبرِکّا کَشّ! ھَینڈبرِکّا!"
ما کُوکار کَنانا دێم پہ گاڈی ءَ دْرِکّ بُوتێں کہ کَنڈَگ ءِ سَر کَپَگ ءَ بے سۆب بُوتَگَت ءُ پُشتُکائی پَدا گۆں تێزیا جَہل ءَ پێداگ اَت۔
اِیسا ءَ گاڈی داشت نَکُت ءُ کَش ءِ دِرّ ءَ کَپت ءُ چَپّی بُوت۔
اِے سَہت ءَ دِل ءَ بازێں وَہم ءُ بیمے اَتک، اِے ھما کۆہ ءُ گَٹّ اَنت کہ اِد ءَ اِے سَرزِمین ءِ مَردُم مَرگ ءُ زِند ءِ نْیام ءَ پہ چُنڈے نان ءَ دَر پہ دَر اَنت۔ مئے ھَم رۆزگار ھَمِش اَت۔ رۆزگار اِنّاں، زِندَگی۔ ڈیزَل ئے آرَگ ءَ سیمسَر ءَ ھما دێم شُتێں۔ ھَپتَگے ھَپتَگے چَہ مێتَگ ءَ دیر اَتێں، یَکّ رۆچے دَم کُت پَدا رَوانَگ بُوتێں۔ اَنچێں تَلار ءُ ڈَکّ کہ 30 کیلُومیٹَر ئے راہ ءَ سَرجَمێں رۆچ شُت۔
اِے رَندی ھَم پَنچ زَمبادێں گاڈی ھَمراہ اَتێں، بار جَتَگَت ءُ کێچ ءَ رَوَگ ءَ اَتێن ءُ تَنیگَ کُلبَر ءَ نَرَسِتَگَتێں کہ ۔۔۔
ما کہ گاڈی ءِ گْوَر ءَ اَتکێں، وَژبَہتیا اِیسا چَہ گاڈی ءَ دَر اَتکَگَت ءُ سَلامَت اَت۔
گاڈی ءِ پُرّێں گێلِنانی کَشَّگ ءُ دِگِہ گاڈیے ءِ کُمَکّ ءَ اِشی ئے پہ ھیلَتے لێٹێنَگ ءُ تِچک کَنَگ ءَ پَنچ اَدار گْوَست۔ ما سَکّ دَم بُرتَگَت، رێک ءِ سَر ءَ تِچک بُوتێں۔ دَنزاں اِستالانی نِدارَگ گُبار کُتَگَت بلے مَن دیست کہ مُشتَری ءُ بَہرام اَنگَت دْرَپشَگ ءَ اَت اَنت ءُ آ شَپی وَت ماں وَت ءَ سَکّ نَزّیک اَت اَنت۔
سُہبا اێدِگِ بَچَکّ شُت اَنت، مَن ءُ نَبیل گاڈی ءِ پانَگیا جَلِّتێں دانکہ آ وَتی مُہیم ءَ بِجَن اَنت ءُ گاڈی ءِ اَڈّ کَنَگ ءَ مِستِریے بْیار اَنت۔ نَبیل مئے گَل ءِ کارزانت اَت، ءُ بِہ وَتی ھَمراہ ئِے یَلَہ نَدات۔ راہ ءَ ھَروَہدا مئے گاڈیے ھَراب بُوت، بے گُشَگ ءَ اَڈّ کَنگا ئِے اَتک، بلے اِے رَندی آئی ءِ وَس ءَ ڈَنّ اَت۔ گاڈی گُشَئێگ ءَ کَرُتکَگَت، دێم ءِ ٹَیرانی یَکّے ءِ دێم شَگرَب ءَ اَت ءُ یَکّے ءِ مَگرَبا! اِیسا ءِ وَ بَہت زۆر اَت کہ ھِچّ ئِے نَبُوت۔
دو رۆچ ءَ رَند مِستِریے آُرتِش۔ مِستِری ءَ داں شَپے ءُ رۆچے گاڈی چُنڈِت ءُ اَڈَل دات ءُ ما رَہادَگ بُوتێں۔۔۔
* * *
یَکّ رۆچے ما لۆگ ءَ نِشتَگَتێں کہ نَبیل اَتک ءُ مارا بار ءَ رَوَگ ءِ شَور ئِے دات۔
بَچَکّاں دَرّاێنت: "ھَو بِرێنِت۔"
ھَمے تَوارانی تَہا اِیسا ءِ تَوار ھَم گۆن اَت۔
نَبیلا دێم گۆں اِیسا ءَ کُت: "ھاں! تَو آ رَندی تَوبَہ نَکُتَگَت ؟"
"وَلّاہ، وَلّاہ، مَن سَکّ کَٹاپ آں!"
سَنگَت کَندَگ ءَ لَگِّت اَنت۔ بلے، آ کَندَگاں تام ماں نێست اَت۔
(2 جُون، 2026)
مَہمَد مِہر