Ázmánk
"Zambádi"
"Isá hayndhbrekká kassh! Hayndhbrekká!"
Má kukár kanáná dém pa gádhiá drekk butén ke kandhagay sar kapagá bésób butagat o poshtokái padá gón téziá jahlá pédág at.
Isáyá gádhi dásht nakot o kashay derrá kapt o chappi but.
É sahtá delá bázén wahm o bimé atk, é hamá kóh o gatth ant ke edá é sarzeminay mardom marg o zenday nyámá pa chondhé náná dar pa dar ant. May ham rózgár hamesh at. Rózgár ennán, zendagi. Dhizalay áragá simsará hamá dém shotén. Haptagé haptagé cha métagá dir atén, yakk róché dam kot padá rawánag butén. Anchén talár o dhakk ke 30 kilumitharay ráhá sarjamén róch shot.
É randi ham panch zambádén gádhi hamráh atén, bár jatagat o Kéchá rawagá atén o taniga Kolbará narasetagatén ke ...
Má ke gádhiay gwará atkén, wazhbahtiá Isá cha gádhiá dar atkagat o salámat at.
Gádhiay porrén gélenáni kasshag o dege gádhiéay komakká eshiay pa hilaté léthénag o techk kanagá panch adár gwast. Má sakk dam bortagat, rékay sará techk butén. Danzán estáláni nedárag gobár kotagat bale man dist ke Moshtari o Bahrám angat drapshagá atant o á shapi wat mán watá sakk nazzik atant.
Sohbá édege bachakk shotant, man o Nabil gádhiay pánagiá jalletén dánke á wati mohimá bejanant o gádhiay addh kanagá mesterié byárant. Nabil may galay kárzánt at, o beh wati hamráhy yalah nadát. Ráhá harwahdá may gádhié haráb but, bé goshagá addh kangáy atk, bale é randi áiay wasá dhann at. Gádhi goshaygá karotkagat, démay thayráni yakkéay dém shagrabá at o yakkéay magrabá! Isáay wa baht zór at ke hecchy nabut.
Do róchá rand mesterié áortesh. Mesteriá dán shapé o róché gádhi chondhet o adhal dát o má rahádag butén...
* * *
Yakk róché má lógá neshtagatén ke Nabil atk o márá bárá rawagay shawry dát.
Bachakkán darráént: "Haw berénet."
Hamé tawáráni tahá Isáay tawár ham gón at.
Nabilá dém gón Isáyá kot: "Hán! Taw á randi tawbah nakotagat ?"
"Walláh, walláh, man sakk katháp án!"
Sangat kandagá laggetant. Bale, á kandagán tám mán nést at.
(2 Jun, 2026)
Mahmad Mehr