سُچیت سَسّا کہ زانَگ بُن گِران اِنت
گِہێں لَبزانی وانَگ بُن گِران اِنت
زَدَگ بیت اَنت ھَمُک سالۆنکیێں دِل
کہ بانۆری بَشانَگ بُن گِران اِنت
سَدَکَّہ سَد بَر ءَ باتاں مَن ءُ تَو
کہ بے مِہرێں زَمانَگ بُن گِران اِنت
تَئی یاتانی رۆچ ءِ آچِش ءَ چَہ
وَتی زِند ءِ مئے تْرانَگ بُن گِران اِنت
ھما کہ مَن پہ اُمّێتے کَماتَگ
آ دُرّێں لاس ءِ دانَگ بُن گِران اِنت
اُو مَہگۆنَگ تَئی گۆں مَوجِریا
مَنی شَیر ءِ ھَزانَگ بُن گِران اِنت
رَمَگ مُمتاز نَمانیت واہَگانی
اگں مِہرانی شْوانَگ بُن گِران اِنت
مُمتاز اِیسُپ
Momtáz Isop