نێمرۆچ ءِ وَہد اِنت۔ مَہدێم ءِ سُبارِگ پِر اِنت۔ آ وَتی چُکّاں گُشیت کہ وَرَگاں بِچارِت گۆں، مَن رَواں چات ءَ لۆہیگے آپ کاراں۔ مَہدێم چَہ وَتی کَنوَرجاہ ءَ دَر کئێت ءُ دێم پہ چات ءَ راہادَگ بیت ءُ راہ ءَ دِلمُراد ءِ بارَوا جێڈاں بیت۔ “بَہتاوَر چَہ لۆگ ءَ دَر نَیَت۔ چُشێں سَنگَتے ھَم آئی ءَ نێست کہ بْیَیت ءُ مَجبُور ئِے بِکَنت ءُ ڈَنّ ءَ دَر ئِے بِکَنت۔ ھُدا وَت ھَیرے بْیاریت۔”
مَہدێم ءُ آئی ءِ لۆگواجَہ دِلمُراد ءُ آیانی دو کَسانێں چُکّ وَتی کَمپان ءِ پَشت کَپتَگێں مَردُم اَنت۔ دِلمُراد ءِ مات ءُ پِت بێراں بُوتَگ اَنت، آئی ءَ بْرات ءُ گُہار ھَم نێست۔
پێسَر ءَ دِلمُراد دَرمُلکا بُوتَگ، بلے لَہتێں سال اِنت کہ پِنِش اِنت ءُ لۆگ ءَ نِشتَگ۔ دِلمُراد کہ دَرمُلکا اَت، پہ آئی ءِ کَٹّ ءُ کَمائی مَہدێم ءِ بْرات ءُ بْرازَتک ھَروَہدا گۆں آیاں لِچِّتَگَت اَنت۔ مَہدێم ءِ بْرات ءُ بْرازَتکاں ھما رۆچ ءَ آ یَلَہ دات اَنت کہ مَہدێم ءِ لۆگواجَہ ءِ زَرّ ءُ مال ھَلاس بُوت اَنت۔ پہ کار ءُ رۆزَگار ءُ پہ وَتی چُکّانی وَشّێں باندات ءَ مَہدێم ءِ بْرات ءُ بْرازَتک دِگِہ ھَلکے ءَ شُت اَنت۔
مَہدێم ءُ آئی ءِ لۆگواجَہ ءَ وَتی سُور ءَ رَند داں 20 سال ءَ چُکّ نَبُوت۔ دِلمُراد ھَر دو سال ءِ سَر ءَ چَہ دَرمُلکا اَتک ءُ سئے ماہ ءَ نِشت ءُ پَدا دَرمُلکا شُت۔
بلے دِلمُراد وَتی چُٹّیانی وَہد ءَ چَہ وَتی کَمپان ءَ باز کَمّ ڈَنّ ءَ دَر اَتک۔
“تَرا ھِجبَر چُکّ نَبیت۔”
“تَو بَلکێں بَگایے ئے؟”
مَردُماں آ بَرے شِگاں جَت ءُ بَرے کَلاگ گِپت۔ اِے پَیمێں ھَبَراں آ گێشتِر تُرسێنت ءُ ڈَنّ ءَ رَوَگ ءَ نَِشت۔
دِلمُرَدا ھِجبَر مَردُمانی ھَبَرانی پَسَّو نَدات۔
آئی ءَ مَردُمانی پَسَّو اِے پَیم ءَ مَہدێم ءَ را دات اَنت، “بِچار ما زانێں مارا چُکّ نَبیت۔ بلے تَئی بْرازَتک مئے چُکّانی پَیم ءَ اَنت۔ اَنُّون کہ ما آیاں کُمَکّ کَنێں ما زانێں یَکّ رۆچے کہ ما پیر بے ن زَلُور آیانی دێم ءَ مئے نێکی کاینت۔ آ مارا یَلَہ نَدَ اَنت۔”
دِلمُراد ءِ لۆگبانُک ءَ وَتی مَرد ءِ چُشێں ھَبَر مُدام دۆست بُوت اَنت۔ بلے آئی ءِ دِل ءَ ھَروَہدا لۆٹِت کہ مارا وَت ءَ چُکّ بِبیت۔
دِلمُراد ءِ لۆگبانُک زْرِنگێں جَنےنے اَت۔ ھَروَہدا کہ دِلمُراد چَہ دَرمُلکا اَتک، آئی ءَ یَکّ رَندے اَلَّما دِلمُراد زُرت ءُ کَراچی ءَ شُت۔ داکتَراں گۆں آیاں گُشت کہ شُمارا ھِچّ بیماری نێست، ناُمێت مَبِت، رۆچے نہ رۆچے شُمارا چُکّ بیت۔
ھما اِنت کہ نوں دِلمُراد چَہ دَرمُلکا اَتکَگ، آ مُدام گۆں وَتی لۆگبانُک ءَ گُشیت، “مَرچاں ڈَنّ ءُ گْوَراں گَنتِر تَرَّگ نَبیت، لُچّ باز اِنت۔ مێتَگ ءِ ھۆٹَل وَ گَنتِر اَنت۔ اود ءَ ھما مَردُم زاہ وَر اَنت کہ آیاں دَرزِن دَرزِنے چُکّ ھَست، مئے وَڈێں کُج ءَ ماپ بَنت کہ مارا دَہ سال پێسَر دو چُکّ بُوت ءُ پَدا دِگِہ ھِچّ چُکّ نَبُوت۔”
مَرچاں دِلمُراد پێسَری وَڈ ءَ نَہ اِنت، نِشتَگ ءُ جێڈیت پَرچاکہ آ اێوک ءُ تَہنا اِنت۔
وَہدے مَہدێم پہ چُلّ ءَ آپ کاریت ءُ نوں پہ وَتی پَسیل ءَ آپ ءِ آرَگ ءَ چات ءَ رَوت تَ گِندیت کہ شَمبِہ کَمپان ءَ پُتِریت۔
“کُج اِنت؟ کُج اِنت، دِلمُراد؟ گُش ئے جَنێنچُکّے ھِچّ گِندَگ نَبیت۔”
شَمبِہ، دِلمُراد ءِ دُورسیادے۔ مَرچی آئی ءِ چارَگ ءَ اَتکَگ۔ شَمبِہ وَت ھَم پێسَر ءَ دَرمُلکا بُوتَگ، نوں پِنِش اِنت۔ آئی ءِ دَرمُلک ئے کَٹّ ءُ مال ھَم آئی ءِ بْرات ءُ بْرازَتکاں وارتَگ اَنت۔
“مَرچاں دِلمُراد گِندَگ نَبیت؟ ھَیر اِنت؟” شَمبِہ چَہ مَہدێم ءَ جُست کَنت۔
مَہدێم پَسَّو دَنت، “شَمبِہ، اِے دْراجێں کِسَّہے۔ تَو وَت چَہ دَرمُلکا کَدی اَتکَگ ءِ؟”
شَمبِہ گُشیت، “مَن ءَ وَ سالے بیت۔”
مَہدێم گُشیت، “پَہِلّ کَن ما سَہیگ نَبُوتَگێں، دِگِہ ما تَئی چارَگ ءَ اَتکَگَتێں۔”
“ھَو، شُما چَہ وَتی کَمپان ءَ دَر نَیاِت۔ شُما چۆن دِگِہ مێتَگ ءِ مَردُمانی ھال ءَ سَہیگ بِت۔”
“شَرّ، بْیا لۆگ ءَ رَوێں، ھَبَر کَنێن ءُ تَو وَتی سْیاد ءَ سَرپَد بِکَن کہ آ کَمّے ڈَنّ ءَ بُرَوت۔ آ بَسّ سَجَّہێں رۆچ ءَ لۆگ ءَ نِشتَگ ءُ جێڈیت۔”
“بے گَم بَئے۔ مَن زاناں کہ گۆں وَتی سْیاد ءَ چے بِکَناں۔ مَن ءُ آ یَکّێں مار ءِ وارتَگێنێں۔”
شَمبِہ ءُ مَہدێم لۆگ ءَ کاینت۔
اَنچُش کہ شَمبِہ لۆگ ءَ پُتِریت، گۆں دِلمُراد ءَ گُشیت، “تَیار بَئے بے گاہ ءَ کُلبَر ءَ شِکار ءَ رَوێں۔”
دِلمُراد گُشیت، “تَو سَلام ءُ اَلَیکے بِکَن ءُ وَتی ھَلا بِدئے کہ کَدی چَہ دَرمُلکا اَتکَگ ءِ۔ رَند ءَ بُگُش کہ کُج ءَ رَوێں۔ اِے ھَم جُست بِکَن کہ مَن ڈَنّ ءَ رَوَگ لۆٹاں یا نَلۆٹاں۔”
شَمبِہ گُشیت، “سَلام ءَ بِلّ، وَت ءَ تَیار کَن۔”
دِلمُراد بِچکَندیت ءُ گُشیت، “اَنُّون سُبارِگ ءِ وَہد اِنت۔ مَن ءُ تَو سُبارِگ کَنێن ءُ رَند ءَ اِے چیز ءِ سَر ءَ ھَبَر کَنێں۔”
شَمبِہ زانت کہ شِکار ءَ رَوَگ دِلمُراد ءِ دِل ءَ نَہ اِنت۔ شَمبِہ گُشیت، “مَن ھما شَرت ءَ سُبارِگ کَناں اگں تَو پہ شِکار ءَ بْیا ئے گۆں۔”
دِلمُراد گُشیت، “مَن وَ شِکار نَزاناں۔”
شَمبِہ گُشیت، “مَن ھَم شِکار چَہ مات ءِ لاپ ءَ دَر نَبُرتَگ۔ اَنچُش کہ مَن شِکار کَنَگ دَر بُرتَگ، اَنچُش تَو ھَم رۆچے نہ رۆچے دَر بَر ئے۔”
نوں دِلمُراد ھَم زانَگ ءَ اِنت کہ شَمبِہ مَن ءَ یَلَہ نَدَنت۔ آ گُشیت، “شَرّ۔ رَوێں شِکار ءَ ۔”
شَمبِہ ءُ دِلمُراد سُبارِگ کَن اَنت۔ بے گاہ ءِ وَہد ءَ شِکار ءَ رَو اَنت۔ وَہدے آ کُلبَر ءَ سَر بَنت، شَمبِہ آسے رۆک کَنت ءُ چاہ ءِ گْرادَگ ءَ لَگّیت ءُ دِلمُراد ءَ جُست کَنت، “تَو مَن ءَ بُگُش کہ تَو پَرچا ڈَنّ ءُ دَر نَیا ئے؟
دِلمُراد گُشیت، “ءُ شَمبِہ! تَو مَن ءَ پہ اِے جُست ءَ اِینچُک دُور کُلبَر ءَ آُرت؟ اِے جُست تَو مَن ءَ لۆگ ءَ بُکُتێں۔”
شَمبِہ گُشیت، “اِد ءَ مَن ءُ تَو شِکار ھَم کَنێن ءُ ھَبَر ھَم کَنێں۔”
دِلمُراد گُشیت، “آ ھَبَر ءَ بِلّ کہ مَن پَرچا ڈَنّ ءَ تَر ءُ گَرد نَکَناں۔ تَو مَن ءَ بُگُش تَو پَرچا ھِجبَر لۆگ ءَ نَنِند ئے، بَرے کُلبَر ءَ ئے، بَرے گَزِّنا ئے بَرے زامُران ءَ ئے، بَرے دَشت ءَ ئے؟
شَمبِہ چاہے پہ وَت ءُ چاہے پہ دِلمُراد ءَ اێر رێچیت ءُ گُشیت، “تَو زان ئے مَن ءُ تَو یَکّێں آس ءِ سُتکَگێنێں۔ تَئی زَرّ ءُ مال تَئی لۆگبانُک ءِ بْرات ءُ بْرازَتکاں وارت اَنت ءُ مَنی زَرّ ءُ مال مَنی بْرات ءُ بْرازَتکاں۔ تَرا تاں باز وَہد ءَ ھِچّ چُکّ نَبُوت ءُ پَدا دو چُکّ بُوت ءُ پَدا دِگِہ چُکّ نَبُوت۔ نوں تَرا تَئی مێتَگ ءِ مَردُم کَلاگ بَند اَنت۔ مَنی مێتَگ ءِ مَردُم مَنی بارَوا گُش اَنت کہ مَنی زَرّ ءُ مال مَنی بْرات ءُ بْرازَتکاں وارت اَنت پَمِشکا مَن گَنۆک ءُ رَیس آں۔ اَسلا مَن ءُ تَو چُش نَہ اێں۔ بلے مَردُمانی دَپ ءَ کئے داشت کَنت۔”
دِلمُراد کَمّے گَل بیت ءُ گُشیت، “تَو راست گُش ئے۔ مئے زِند ءِ کَٹّ ءُ کَمائی مئے وَتی مَردُماں وارت اَنت۔ ما پہ وَتی مَردُماں اِینچُک کار کُت، نوں مارا دَپی جُستے نَکَن اَنت۔ مێتَگ ءِ مَردُم مارا بَگ ءَ ءُ گَنۆک گُش اَنت۔ مَن پَمِشکا تَرّ ءُ گَرد نَکَناں۔”
اِے شَپ ءَ دِلمُراد ءُ شَمبِہ داں دێرا نِند اَنت ءُ ھَبَر کَن اَنت۔ دِلمُراد وَتی دِل ءِ ھَبَراں دَرشاں کَنت ءُ شَمبِہ وَتی دِلَیگاں۔
وَہدے سُہب بیت دِلمُراد چَہ واب ءَ پاد کئێت، ماریت کہ گُش ئے چَہ مَنی کۆپَگ ءَ گْرانێں بارے دُور اَتکَگ۔
آ شَمبِہ ءَ جُست کَنت، “مَرچی گُش ئے مَن سُبَک سُبَک آں۔
شَمِبہ بِچکَندیت ءُ گُشیت، “ اِے دَرشاں کَنَگ ءِ کَمال اِنت۔ مَن ءُ تَو دۆشی داں دێرا وَتی دِل ءِ زَنگ شُشتَگ اَنت، پَمِشکا مَن ءُ تَو دوێں سُبَکّ سُبَکّ ایں۔ بایَد اِنت ھَر مَردُم ءَ سَنگَتے، سْیادے ءُ وارِسے بِبیت کہ گۆں آئی ءَ وَتی دِل ءِ ھَبَراں دَرشاں کُت بِکَنت۔”
دِلمُراد ھَم بِچکَندیت ءُ گُشیت، “ھَو، تَو راست گُش ئے۔”
دُمی رۆچ ءَ دوێں شِکار کَن اَنت۔ دِلمُراد ءَ شِکار کَنَگ ھَم وَشّ بیت۔
وَہدے دِلمُراد وَتی لۆگ ءَ سَر بیت، آ وَتی دۆشیگێں شَپ ءِ سَرجَمێں ھَبَراں گۆں مَہدێم ءَ کَنت ءُ گُشیت، “نوں مَن ءَ شَرّێں سَنگَتے دَست کَپتَگ۔ مَن ھَروَہدا گۆں شَمبِہ ءَ کۆہ ءُ جَنگَلاں شِکار ءَ رَواں۔”
مَہدێم گَل ءَ بال بیت کہ نوں مَنی مَرد ءَ شَرّێں سَنگَتے دَست کَپتَگ۔
چَہ ھما رۆچ ءَ ءُ رَند بَرے شَمبِہ ءُ دِلمُراد ءَ کُلبَر ءِ کۆہ ءَ ءُ بَرے گَزِّن ئے کۆہ ءَ ءُ بَرے دَشت ءِ کۆہاں شِکار ءَ رَو اَنت۔ نوں نہ آیاں وَتی کَٹّ ئے زَوالی ئے گَم اِنت ءُ نہ وَتی مێتَگ ءِ مَردُمانی کَلاگانی۔
زَہیر کَومی