Némróchay wahd ent. Mahdémay sobáreg per ent. Á wati chokkán goshit ke waragán becháret gón, man rawán chátá lóhigé áp kárán. Mahdém cha wati kanwarjáhá dar kayt o dém pa chátá ráhádag bit o ráhá Delmoráday bárawá jédhán bit. “Bahtáwar cha lógá dar nayat. Choshén sangaté ham áiá nést ke byayt o majbury bekant o dhanná dary bekant. Hodá wat hayré byárit.”
Mahdém o áiay lógwájah Delmorád o áyáni do kasánén chokk wati kampánay pasht kaptagén mardom ant. Delmoráday mát o pet bérán butagant, áiá brát o gohár ham nést.
Pésará Delmorád darmolká butag, bale lahtén sál ent ke penesh ent o lógá neshtag. Delmorád ke darmolká at, pa áiay katth o kamái Mahdémay brát o brázatk harwahdá gón áyán lecchetagatant. Mahdémay brát o brázatkán hamá róchá á yalah dátant ke Mahdémay lógwájahay zarr o mál halás butant. Pa kár o rózagár o pa wati chokkáni wasshén bándátá Mahdémay brát o brázatk dege halkéá shotant.
Mahdém o áiay lógwájahá wati surá rand dán 20 sálá chokk nabut. Delmorád har do sálay sará cha darmolká atk o say máhá nesht o padá darmolká shot.
Bale Delmorád wati chotthiáni wahdá cha wati kampáná báz kamm dhanná dar atk.
“Tará hejbar chokk nabit.”
“Taw balkén bagáé ay?”
Mardomán á baré shegán jat o baré kalág gept. É paymén habarán á géshter torsént o dhanná rawagá naesht.
Delmoradá hejbar mardománi habaráni passaw nadát.
Áiá mardománi passaw é paymá Mahdémárá dátant, “Bechár má zánén márá chokk nabit. Bale tai brázatk may chokkáni paymá ant. Annun ke má áyán komakk kanén má zánén yakk róché ke má pir bén zalur áyáni démá may néki káyant. Á márá yalah nadayant.”
Delmoráday lógbánoká wati marday choshén habar modám dóst butant. Bale áiay delá harwahdá lóthet ke márá watá chokk bebit.
Delmoráday lógbánok zrengén janéné at. Harwahdá ke Delmorád cha darmolká atk, áiá yakk randé allamá Delmorád zort o Karáchiá shot. Dáktarán gón áyán gosht ke shomárá hecch bimári nést, náomét mabet, róché na róché shomárá chokk bit.
Hamá ent ke nun Delmorád cha darmolká atkag, á modám gón wati lógbánoká goshit, “Marchán dhann o gwarán ganter tarrag nabit, locch báz ent. Métagay hóthal wa ganter ant. Ódá hamá mardom záh warant ke áyán darzen darzené chokk hast, may wadhén kojá máp bant ke márá dah sál pésar do chokk but o padá dege hecch chokk nabut.”
Marchán Delmorád pésari wadhá naent, neshtag o jédhit parcháke á éok o tahná ent.
Wahdé Mahdém pa chollá áp kárit o nun pa wati pasilá ápay áragá chátá rawt ta gendit ke Shambeh kampáná poterit.
“Koj ent? Koj ent, Delmorád? Goshay janénchokké hecch gendag nabit.”
Shambeh, Delmoráday dursyádé. Marchi áiay cháragá atkag. Shambeh wat ham pésará darmolká butag, nun penesh ent. Áiay darmolkay katth o mál ham áiay brát o brázatkán wártagant.
“Marchán Delmorád gendag nabit? Hayr ent?” Shambeh cha Mahdémá jost kant.
Mahdém passaw dant, “Shambeh, é drájén kessahé. Taw wat cha darmolká kadi atkagay?”
Shambeh goshit, “Maná wa sálé bit.”
Mahdém goshit, “Pahell kan má sahig nabutagén, dege má tai cháragá atkagatén.”
“Haw, shomá cha wati kampáná dar nayáet. Shomá chón dege métagay mardománi hálá sahig bet.”
“Sharr, byá lógá rawén, habar kanén o taw wati syádá sarpad bekan ke á kammé dhanná borawt. Á bass sajjahén róchá lógá neshtag o jédhit.”
“Bégam bay. Man zánán ke gón wati syádá ché bekanán. Man o á yakkén máray wártagénén.”
Shambeh o Mahdém lógá káyant.
Anchosh ke Shambeh lógá poterit, gón Delmorádá goshit, “Tayár bay bégáhá Kolbará shekárá rawén.”
Delmorád goshit, “Taw salám o alayké bekan o wati halá beday ke kadi cha darmolká atkagay. Randá bogosh ke kojá rawén. É ham jost bekan ke man dhanná rawag lóthán yá nalóthán.”
Shambeh goshit, “Salámá bell, watá tayár kan.”
Delmorád bechkandit o goshit, “Annun sobáregay wahd ent. Man o taw sobáreg kanén o randá é chizay sará habar kanén.”
Shambeh zánt ke shekárá rawag Delmoráday delá naent. Shambeh goshit, “Man hamá shartá sobáreg kanán agan taw pa shekárá byáay gón.”
Delmorád goshit, “Man wa shekár nazánán.”
Shambeh goshit, “Man ham shekár cha mátay lápá dar nabortag. Anchosh ke man shekár kanag dar bortag, anchosh taw ham róché na róché dar baray.”
Nun Delmorád ham zánagá ent ke Shambeh maná yalah nadant. Á goshit, “Sharr. rawén shekárá.”
Shambeh o Delmorád sobáreg kanant. Bégáhay wahdá shekárá rawant. Wahdé á Kolbará sar bant, Shambeh ásé rók kant o cháhay grádagá laggit o Delmorádá jost kant, “Taw maná bogosh ke taw parchá dhann o dar nayáay?
Delmorád goshit, “O Shambeh! Taw maná pa é jostá inchok dur Kolbará áort? É jost taw maná lógá bokotén.”
Shambeh goshit, “Edá man o taw shekár ham kanén o habar ham kanén.”
Delmorád goshit, “Á habará bell ke man parchá dhanná tar o gard nakanán. Taw maná bogosh taw parchá hejbar lógá nanenday, baré Kolbará ay, baré Gazzená ay baré Zámoráná ay, baré Dashtá ay?
Shambeh cháhé pa wat o cháhé pa Delmorádá ér réchit o goshit, “Taw zánay man o taw yakkén ásay sotkagénén. Tai zarr o mál tai lógbánokay brát o brázatkán wártant o mani zarr o mál mani brát o brázatkán. Tará tán báz wahdá hecch chokk nabut o padá do chokk but o padá dege chokk nabut. Nun tará tai métagay mardom kalág bandant. Mani métagay mardom mani bárawá goshant ke mani zarr o mál mani brát o brázatkán wártant pameshká man ganók o rays án. Aslá man o taw chosh naén. Bale mardománi dapá kay dásht kant.”
Delmorád kammé gal bit o goshit, “Taw rást goshay. May zenday katth o kamái may wati mardomán wártant. Má pa wati mardomán inchok kár kot, nun márá dapi josté nakanant. Métagay mardom márá bagá o ganók goshant. Man pameshká tarr o gard nakanán.”
É shapá Delmorád o Shambeh dán dérá nendant o habar kanant. Delmorád wati delay habarán darshán kant o Shambeh wati delaygán.
Wahdé sohb bit Delmorád cha wábá pád kayt, márit ke goshay cha mani kópagá gránén báré dur atkag.
Á Shambehá jost kant, “Marchi goshay man sobak sobak án.
Shamebh bechkandit o goshit, “ É darshán kanagay kamál ent. Man o taw dóshi dán dérá wati delay zang shoshtagant, pameshká man o taw doén sobakk sobakk én. Báyad ent har mardomá sangaté, syádé o wáresé bebit ke gón áiá wati delay habarán darshán kot bekant.”
Delmorád ham bechkandit o goshit, “Haw, taw rást goshay.”
Domi róchá doén shekár kanant. Delmorádá shekár kanag ham wassh bit.
Wahdé Delmorád wati lógá sar bit, á wati dóshigén shapay sarjamén habarán gón Mahdémá kant o goshit, “Nun maná sharrén sangaté dast kaptag. Man harwahdá gón Shambehá kóh o jangalán shekárá rawán.”
Mahdém galá bál bit ke nun mani mardá sharrén sangaté dast kaptag.
Cha hamá róchá o rand baré Shambeh o Delmorádá Kolbaray kóhá o baré Gazzenay kóhá o baré Dashtay kóhán shekárá rawant. Nun na áyán wati katthay zawáliay gam ent o na wati métagay mardománi kalágáni.
Zahir Kawmi