ءُ پَدا کَپۆدَر مِٹُّوے بُوت
وَہدے ھَیال گَپّانی ھَمرَداری مَکنَت گُڈا گَپ پیتاری بَنت۔ اَنچۆ بے کار ءَ مَردُم ڈَمبَریت۔ جُہد کَناں کہ پہ گَپّاں ھَیالے ءُ پہ وَت کارے بِشۆہازاں۔
کار، کار ءَ دِل ءَ کَپۆدَر ءِ دارَگ ءِ اوماں بُوت۔ چونایا کَپۆدَر ءِ ھُبّ مَن ءَ چَہ یَکّ اَنچێں ھَنکێںے ءَ بُوت کہ اُدا سَبزێں دَرامَد مُلکی اِسپێتێں کَپۆدَر دارَگ ءَ اِت اَنت۔ سَبزێں دَرامدانی چُشێں چَتّے نێست اَت کہ آئی ءِ سَر ءَ اِسپێتێں کَپۆدَرے تَو نَدیست۔ اگں چَتّے ءِ سَر ءَ تَو اِسپێتێں کَپۆدَر نَدیست، بِزاں آ نابُودے۔
مُلکی اِسپێتێں کَپۆدَرانی وَتی یَکّ بالے اَت ءُ دابے اَت۔ ھَریَکّے چَہ دُمیگ ءَ باج بَرَگ ءَ وَتی بالاں بُستِر کَنَگ ءُ وَتی سَبزێں دَرامَدانی وَشّ کَنَگ ءَ شَرت ءِ کَٹَّگ ءِ جُہد ءَ اَت۔ اِے اِسپێتێں کَپۆدَرانی نِزۆری آہانی پادانی مُہرَگ اِت اَنت۔ اِسپێتێں کَپۆدَر پہ رَنگ پَرَنگیێں مُہرَگان ءُ سَبزێں دَرامَد پہ اِسپێتێں کَپۆدَرانی بُرزێں بالانی مُزّاں۔
ھَمے دَرامَدێں کَپۆدَریانی مُزّانی پَدا مَنِ نۆکێں دَرامَد ءَ ھَم کَپۆدَر ءِ دارَگ ءِ ھُبّ ءَ گْوَر جَت۔ وَتی مَنّ ءَ مَن ھَم دَست ءُ پاد جَنَگ بِنا کُت ءُ چۆ سَبزێں دَرامَداں وَتی مُہرَگاں کَمایان ءُ پہ اِسپێتێں کَپۆدَراں مۆچکێں کَنان اِتاں۔ یَکّ ءُ دو لَنگ ءُ یَچَّمّ ءُ پُرشتَبانزُل نِندان اَت کہ وَہد ءِ سْیَہگوات ءَ بال دات اَنت۔ ءُ مَن ءَ دیر ئِے دَور دات، اَنچۆ دیر کہ کہ کُلّ پَدی بُوت اَنت۔ چے اِسپێتێں کَپۆدَر ءُ چے سَبزێں دَرامَد، ھِچّ پَشت نَکَپت۔ بَسّ بُرز ءَ اِسپێتێں آزمانے اَت ءُ جَہل ءَ سَبزێں زِمینے۔
اِسپێتێں آزمان ءِ چێر ئے سَبزێں زِمین ءِ سَر ءِ کَپَگ ءَ پَد کہ بۆد کُت تَ زَمانگا ھَوار رَنگ ءُ دْرۆشُم، زێد ءُ دَوار کُلّ مَٹّ اِت اَنت۔ رَنگ ءُ بُوانی یَکّ دِگِہ دُنیایے۔ ھَمے رَنگ ءُ بُوانی تَہا تَرَّگ تَرَّگ ءَ مَنی پادانی دێم ءَ یَبَّر ءَ سْیاہێں پَزّۆرێں کَپۆدَرے ءَ کَپِرَّگ جَت۔ مَن کَپُند کُت گِران ئِے، بلے بال ئِے کُت۔ بلے مَنی بے ھالێں دِل ئِے پَدا پہ کَکپۆدَرے ءَ ماں کُت۔ ءُ مَن کَپتاں ھَمے کَپۆدَر ءِ پَد ءُ رَند ءَ ۔ پَٹَّگ پَٹَّگ ءَ کَپۆدَر مَن یَکّ سِنگی کُلّے ءِ کۆد ءِ کَلَنڈیانی سَر ءَ دیست۔ گۆں کَپۆدَر ءِ گِندَگ ءَ مَن وَتی مۆچکێن ءِ چَنڈَگ بِنا کُت۔ داں ھَمینچُکا چَہ سِنگی کُلّ ءِ کانچێں دَریگ ءَ دو اِسپێتێں ڈَلَگێں چَمّ زَنڈێں اَینَکے ءِ ٹَہا لَٹّ بُوت۔
چَہ دَریگ ءَ زَنڈێں اَینَک ءِ تَہ ئے اِسپێتێں چَمّانی لَٹّ بَیَگ ءَ نازُرکێں لُنٹاں بِچکَندے پۆشِت۔ کَپۆدَر ءَ بال بَست اَتک پادانی دێم ءَ …!
چَمّ سُرِت اَنت، لُنٹاں وَتی بِچکَند سَر چِت۔ مۆسُم مَٹّ بُوت۔ کَپۆدَر اَنگَت گۆں وَتی چێنکان اَت۔
دَریگ بَند بُوت۔ اِسپێتێں ڈَلَگێں چَمّ گۆں زَنڈێں اَینکا اَندێم بُوت اَنت۔ کَپۆدَر ءَ وَت ءَ را مَٹّ کُت ءُ مِٹُّوے بُوت۔ گۆیاک ئِے آُرت ءُ زُبان ئِے مِگرازے بُوت۔ یَکّ اَنچێں مِگرازے کہ بَسّ چِنان ءُ رێچان اَت۔ اِے اَنچێں زُبانے اَت کہ آئی ءَ بَلۆچی ءِ گێدی کِسَّہانی گُشتِن: “دَنتاں ھَڈّے، زُباں گۆشتے اَگاں ماں اَڈِت، مَن ءَ مَیار نێست۔” اَنچُش لَپاشاں کُت کہ ھِچّی سَر نَیاُرت۔ “سَد کَٹّیت زُباں، سَد بَبا دَنت زُباں۔”
زُبان ءَ وَتی کار کُت۔ رۆچ ءِ ھما رۆچ مَن کَپۆدَر ءِ دارَگ ءِ نام نَگِپت۔
ھَسا بِجّار