مُراد ءِ کۆہ ءِ سُجدَہا کَپ ئے، دِل ءِ تَلَب اَلَنگ بَنت
پَلار تَبد ءَ شُونزَر اَنت، پَپُک مَچّ ءَ رَنگ بَنت
بِجێڈ بَسّ پہ گُلزِمین ءِ آجُوی ءَ جَنگ پَش(ت) کَپیت
تَئی تَوکَل ءِ کَلاشێں ڈۆبَر ءِ اِرادَہاں پَشَنگ بَنت
بَلۆچ ءِ بَچّاں مَہزَبا چَہ ڈَنّ چَمّاں شانک دَئے بِچار
پہ ڈێہ ءَ زِگری نہ نُمازی اَنت، ماں سَنگَر ءَ پُلَنگ بَنت
مَنی دِل ءَ کہ زُوریت رَوت تَ اَسپ ءُ مَہری ءِ چِہ گَپّ
اِے جاتُوانی کِسَّہ اِنتم اِد ءَ سَواری کَنگ بَنت
تَئی مِہر ءِ کَلَّرێں زِمین ءِ رُستَگێں کِشار مَن
تَو گَپّاں واد پِر کن ئے، دِل ءِ مُراد زَنگ بَنت
ھَزار واہَگ اَنت پہ شاری ءَ تُری ھَمُک وَڈ ءَ بِبیت
اِے دْرَچک ءِ تاک سَبز بَنت یا مُرگ داراں دْرَنگ بَنت
شاری بَلۆچ
Shári Balóch