دُمی دَر
ھۆتمان ءُ دَشتی ءِ پِتانی میراس
تُرس ئے جاگَہ ءَ کَور ھَم کُچّ جَنت، اِنساں وَ اِنسانے۔ شَمبِہ ءَ واکی چَہ اَلبَلُوشی ئے کَپتَگێں ھَبَرانی تُرسا داں سئے ھَپتَگ ءَ وَتی ویزا ءِ ھال نَگِپت۔ بَسّ چۆ ھَر ءَ کار ئِے کُت دانکہ پہ وَتی سَپَر ءَ زَرّ ءُ مَرّے بِچِنت ءُ اێر بِکَنت۔
وَہدے سئے ھَپتَگ سَرجَم بُوت نوں دِل ئِے داشت نَکُت۔ “باندا یَکشَمبِہ اِنت، زَلُور اَلبَلُوشیا پَون کَناں۔”
چَہ کار ءَ اَتک شام ئِے کُت، وابی گۆلیے وارت ئِے، کَمّے جَوَڈِت ئِے ءُ وَپت۔
بانگواہ ءَ شَمبِہ ءِ پَون ءَ تَوار کُت۔ چَہ واب ءَ گُڈِت ھَیراں بُوت کہ اِے وَہد ءَ کئے پَون ءَ اِنت؟ آئی ءَ دَست شَہار دات کہ پَون ءَ بَند کَناں، پَدا ھَیال ئِے کُت، بَلکێں مَنی جَن ءُ چُکّ بِبَنت؟ بَلکێں اَلبَلُوشی بِبیت؟ یَکّ چَمّے پَچ اَت ئِے ءُ یَکّے بَند، پَون ئِے گِپت۔
“بْیا کہ مَن ءَ ھۆتمان ءَ جَتَگ مَرچی۔” اِے شَمبِہ ءِ سَنگَت دَشتی اَت، چَہ جَرمَنی ءَ پَون ءَ اَت۔
ھالکہاں شَمبِہ ءَ اِشکُت کہ دَشتی ءَ چے گُشت، بلے باوَر ئِے نَبُوت کہ ھۆتماں چۆن دَشتی ءَ جَنت؟ اِے سَنگَت اَنت۔ ھَر پَیم ناتِپاک بِبَنت یَکدُمیا نَجَن اَنت۔
شَمبِہ ءَ وَتی چَمّ لَتارت اَنت ءُ گُشت، “پَدا بُگُش تَرا کئے ءَ جَتَگ؟”
“ھۆتمان ءَ ۔” دَشتی ءَ گۆں لَرزۆکێں تَوارے گُشت۔
گُش ئے دَشتی گْرێوَگ ءَ اَت۔
شَمبِہ بِرّ اَت، نَزانَگ ءَ اَت چے بُگُشاں۔ بلے زُوت تْرانَگ ءَ کَپت کہ اِے پَیمێں جاوَراں ما گُرُو ھَم پَون کُتَگ۔
“تَو گۆں گُرُوا ھال کُتَگ؟” آئی ءَ دَشتی جُست کُت۔
گُرُو، شَمبِہ ءُ دَشتی ءُ ھۆتمان ءِ سَنگَتے اَت، کَراچی ءَ پَشت کَپتَگَت جُہد ءَ اَت کہ یُورُپ ءَ بُرَوت۔
دَشتی ءَ پَدا گۆں لَرزۆکێں تَوارے گُشت، “مَن دَہ دْوازدَہ رَند ءَ گُرُو پَون کُتَگ، پَون ءَ چِست نَکَنت۔ بارێں آئی ءَ زْیارَتے ءِ سَر ءَ گۆں مَلَنگے ءَ چَرسے کَشِّتَگ ءُ واب کَپتَگ؟”
شَمبِہ ءَ کَمبَل دُور کُت، تَہت ءِ سَر ءَ نِشت ءُ گُشت ئِے، “شَرّ اِنت گُرُو چَرسے کَشّیت ءُ واب کَپیت، شُمئے پَیم ءَ سْیاسَت نَکَنت ءُ وَت یَکّ ءُ دُمی ئے گُٹّ ءَ نَگیپت۔”
دَشتی ءِ کِرّا گاڈیانی گیرّ ءُ گار ءِ تَوار اَت، شَرّی ءِ سَر ءَ نَِشکُت ئِے کہ شَمبِہ ءَ چے گُشت۔
“پَدا بُگُش، تَو چے گُشت؟” دَشتی ءَ شَمبِہ جُست کُت۔
شَمبِہ چَہ تَہت ءِ سَر ءَ پاد اَتک، چَمّ ئِے پَون ءَ کَپت اَنت تَ دیست ئِے کہ دَشتی رَشّ ءُ کَشّێں دَگّے ءِ کَش ءَ پاد جَنَگ ءَ اِنت۔ آئی ءَ بَئێگے بَڈّ ءَ اِنت، سَکّ ھَور اِنت، گُد ئِے میسِّتَگ اَنت، سارتی ءَ جَتَگ، لَرزَگ ءَ اِنت۔
شَمبِہ ءَ دَشتی اِے ھال ءَ دیست ھَیراں بُوت کہ مُلک ءَ دَشتی گَریب ءُ وار اَت، بلے چۆ بَزَّگ نَہ اَت۔ اَنُّون جَرمَنی ءَ اِنت، اَنگَت چۆ بے لۆگێں مَردُم ءَ بَد-ھال اِنت۔
“بُرَو، پہ وَت ءَ باپێں جاہے شۆہاز کَن، آرام ءِ سَر ءَ ھَبَر کَنێں۔”
دَشتی باپێں جاہے ءِ شۆہاز ءَ شُت ءُ شَمبِہ دێم پہ پَسیل ءَ ۔
شَمبِہ ءَ پَسیل ءِ لَیٹ رۆک کُت، لَیٹ رۆک نَبیت۔ نَل ئِے پَچ کُت، گَرمێں آپ نێست۔ دَست ئِے ھیٹَر ئے نَزّیک ءَ بُرت اَنت، ھیٹَر ھَم کار ءَ نَہ اِنت۔ آئی ءَ گۆں سارتێں آپ ءَ چَمّ شُشت، نُرُنڈاں بُوت ءُ شُت کۆٹی ءَ ۔
اَنچۆکہ کۆٹی ءَ پُتِرت، چَمّ ئِے دَریگ ءَ ڈَنّ کَپت اَنت۔ دیست ئِے کہ دۆشی کَمّے بَرپ بُوتَگ، لۆگانی سَر ءُ دْرَچکانی شاہَڈ چۆ پُکّی ءَ اِسپێت اَنت۔ چَمّ ئِے پَہک کُت اَنت ءُ گۆں وَت ھَبَر ءَ لَگِّت:
“اوہِ مَنی نادانێں سَر۔ وَہدے مَن مُلک ءَ اَتاں، چۆنێں واب کَماتَگَت۔ اَلَّم دَرمُلکا رَواں، وَتی مُلک ءَ آزات کَنان ءُ دَرمُلک ئے وَشّێں مۆسُم ءُ زێبائیں نِدارَگاں دِلوَشّی کَناں۔ نوں کہ دَرمُلکا آں، نہ سْیاسَت کَنَگی آن ءُ نہ زێبائیں نِدارَگ دِل ءُ جان ءَ کَپ اَنت۔ سْیاسَت ءِ دێم ءَ ھُدا بِزانت بلے زێبائیں مُلک ءِ چارَگ ءِ دێم مَن وَت سْیاہ کُت۔ اَنچێں لۆگے ءَ سَر کَپتَگ، نہ لَین ئِے مان ءُ نہ گَیس۔ اَنچێں مێتَگے ءَ نِشتَگاں کَسّ ءَ لْیاریا اِینچُک گێنگوار نَدیستَگ، اِد ءَ گِندیت۔ اِے پَیمێں جاگَہاں چۆن دِلوَشّی کَنَگ بیت…”
آ اَنگَت جَوَڈَگ ءَ اَت، اَناگَتا تْرانَگ ءَ کَپت کہ مَن پَون ءِ سَر ءَ مَردُمے نادێنتَگ۔
آ گُشاد گُشاد ءَ دێم پہ پَون ءَ شُت۔
“ھاں داشتی! تَو باپێں جاہے دَر گێتک؟”
“ھَو۔ کَہوایے ھَم پہ وَت بَہا زُرت۔”
نوں دَشتی باپتِر اَت بلے اَنگَت لَرزَگ ءَ اَت۔
“ھال کَن، شُما پَرچا داوا کُتَگ۔”
“اگں تَرا وَہد ھَست مَن سَرجَمێں کِسَّہ ءَ کاراں۔”
شَمبِہ ءَ ٹێمب چارِت ءُ دَرّاێنت ئِے، “بْیار کِسَّہ ءَ ۔”
“گُڈا گۆش دار۔” دَشتی ءَ چَہ کَہوا ءَ گُٹّے گِپت ءُ ھَبَر ءَ لَگِّت:
“دو سئے ماہ اَت ھۆتماں مَنی سَر ءَ کَپتَگَت کہ دێر اِنت مئے اَساِلَم ئے کێس پاس بُوتَگ اَنت، نوں ما بایَد اِنت سَرکاری لۆگاں یَلَہ بِدَیێں۔ اَنچێں شَہرے ءَ بِنِندێں کہ اود ءَ باز بَلۆچ بِبیت۔ اود ءَ مَردُم شَرّێں سْیاسَتے کُت کَنت ءُ گۆں بَلۆچاں گێشتِر نَزّیک ھَم بُوت کَنت۔ مَن داں باز وَہد ءَ دُدِلَگ اَتاں۔ بلے مَن ءَ زۆر ئِے دات، مَن اِنّاں کُت نَکُت۔
گْوَستَگێں ھَپتَگ ءَ آئی ءَ مَن ءَ پَون کُت ءُ گُشت کہ مَن لۆگے دَر گێتکَگ۔ لۆگ یَکّ نَوَمبَر ءَ ھالیگ بیت۔ بلے یَکّ ءُ دو رۆچ پێسَر رَوێں، اود ءَ گۆں لَہتێں سَنگَتاں دُچار کَپێں۔
مَن ءَ شُومی ءَ جَت، باز پِگر نَکُت ءُ سَرکار ھال دات کہ شُمئے لۆگ ءَ نَوَمبَر ءِ یَکّ تاریک ءَ یَلَہ کَناں۔
سئے رۆچ پێسَر ھۆتمان ءَ پَدا مَن ءَ پَون کُت ءُ گُشت کہ وَہدے مَن ءُ تَو دێم پہ دێم بے ن مَن ءَ گۆں تَو جێڈَہے ءِ سَر ءَ ھَبَر کَنَگی اِنت کہ مَن ءَ پَرێشاں کَنَگ ءَ اِنت۔ مَن گُشت کہ اگں تَرا چیزے پَرێشاں کَنَگ ءَ اِنت، آئی ءَ دِل ءَ مَدار، گێشتِر پَرێشاں بَئے۔
یَبَّرے آئی ءِ دِل ءَ نَہ اَت بلے اِے ھَبَر آئی ءَ بے وار کَنَگ ءَ اَت گُڈا گُشت ئِے، کہ لَہتێں رۆچ بیت مَنی دِشتار ءَ سئے تَواربَند مَنی سَر ءَ راہ داتَگ۔ اِے تَواربَنداں مَنی سَر ءِ واشَل چَکَرّێنتَگ اَنت۔ مَن اِے ھَبَر ءَ باوَر کُت نَکَنَگ ءَ آں کہ واکی اِے پیرێں مَرد چُشێں کِردَگار کَنت۔
مَن جُست کُت کہ زانا اِے پیرێں مَرد ءَ چے کُتَگ کہ تَئی سَر ءِ واشَل چَکَرِّتَگ اَنت؟
گُشت ئِے کہ جُست ءَ مَکَن۔ مَن ءَ لَج کَنت کہ اِے مَرد ءِ نام ءَ بِگِراں۔
مَن گُشت کہ نوں تَو آپُس کُتَگ گُڈا زاێن ئِے۔
گُشت ئِے اِے کہ مَرد مئے نامدارێں اِزمکار، دِلیپ اِنت کہ نُنُّکێں چُکّے ءِ پَیم ءَ مَنی دِشتار ءِ کِرّا گِرّ ئِے بَستَگ کہ اگں تَوِ مِہری پَکّ ءَ گُش ئے کہ مَن دِلێر ءُ آزاتَیالێں مَردُمے آن ءُ شَپ ءِ نِسپا تَئی پَیزبُکّ ءُ اِکس ئے لاِباں گۆش داران ءُ وَتی تْرُندێں پِت ءُ بْراتانی کِرّا نَتُرساں گُڈا ھَمے اَنُّون وَتی اَکسے مَن ءَ راہ بِدئے نوں زانَگ بیت کہ تَو واکی اَسَلیا دِلێر ءُ آزاتَیالێں مَردُمے ئے۔ اگں تَو چُش مَکَن ئے گُڈا تَو پَکّ ءَ لَگۆر ءُ تَنگنِزَرێں مَردُمے ئے۔
اِے پیرێں مَرد یُورُپ ءَ نِشتَگ، ھَرّۆچ چَہ وَتی پَیزبُکّ ءُ اِکسا لاِب بیت ءُ بَلۆچِستان ءِ وَرنایاں لِکچَر دَنت کہ پاکِستاں مارا چُکچێں کَنَگ ءَ اِنت۔ ما بایَد گۆں پاکِستان ءَ اَنچُش بِکَنێں۔ سَر ءِ بَدَل سَر، چَمّ ءِ بَدَل چَمّ، دَست ءِ بَدَل دَست، پاد ءِ بَدَل پاد۔ ھَمے پَیم ءَ بَلۆچِستاں آزات بُوت کَنت۔ وَرنائی ءَ ما وَتی سۆشَل مێڈیایانی پْرۆپاِل ءُ کِتاب ءُ کاپیانی پُشت ءُ دێم، اِے پَیمێں لیڈَر ءُ دانِشوَرانی اَکس ءُ اِسٹیکَراں گَہێنتَگ اَنت کہ اِے مئے مُلک ءَ آزات کَن اَنت۔ نوں ما زانتَگ اِے واجَکار رۆچ ءَ بَلۆچِستان ءَ آزات کَن اَنت ءُ شَپ ءَ وَتی ھَوَسّ ءَ ۔
مَن لۆٹِت کہ سَنگَت ءَ تَسَلّا بِدَیاں دانکہ وَت ءَ باز پَرێشاں مَکَنت، بلے سَنگَت ءَ مَن ءَ ھَبَر کَنَگ ءِ مۆہ نَدات۔ گُشت ئِے کہ اَنُّون اِے ھَبَر ءَ بِلّ، وَہدے دێم پہ دێم بے ن تَرا دِلیپ ئے تَواربَنداں گۆش دارێناں نوں مَن ءَ سۆجے بِدئے کہ چے بِکَناں۔
گُڈا پَرَندۆشی ما وَتی نۆکێں مێتَگ ءَ شُتێں، اود ءَ سَنگَتے ءِ مِہماں بُوتێں۔ سَنگَت کار ءَ ژَند کُتَگَت، مَہلَہ وَپت۔ رَند ءَ مَن ءُ ھۆتمان ءَ دِلیپ ئے تَواربَند گۆش داشت اَنت ءُ داں دێراں سَکّ کَندِت۔”
“گُڈا تَو ھۆتمان ءَ را سۆجے دات؟” شَمبِہ ءَ دَشتی جُست کُت۔
دَشتی ءَ پَسَّو دات، “اِنّاں، آئی ءَ مَن ءَ جُست نَکُت ءُ مَن بے ھال اَتاں۔ بلے مَن گۆں آئی ءَ کِسَّہے کُت، ھَمے کِسَّہ ءِ سَوَب ءَ آئی ءَ مَن ءَ جَت۔”
“چۆنێں کِسَّہے تَو کُت؟” شَمبِہ ءَ زانت کہ دَشتی ءَ وَتی لُچّێں کار کُتَگ۔
دَشتی لَرزێناں بُوت ءُ شُت دِگِہ کَہوایے زُرت ئِے ءُ اَتک ءُ ھَبَر ءَ لَگِّت:
“وَہدے اِلتاپ بائی نۆک نۆک اِمکیُوِم ئے سَرۆک بیت، سَکّ زۆرمَند ءُ نامدار بیت۔ ھَروَہدا کہ آ ساہیگ بیت مَرچی شَرَّنگێں جَنێںے مَنی مِلَّگ ءَ پێداک اِنت، آ وَتی دَپتَر ءِ دَروازَگ ءَ آنجَگے بَندیت۔ وَہدے جَنێں دَپتَر ءَ پُتِرَگ ءَ بیت اِلتاپ بائی جَنێن ءِ آنجَگ ءِ نێمَگ ءَ اِشارَہ کَنت ءُ گۆں تْرُندێں تَوارے گُشیت ‘آنجَگ ءَ بۆج ءُ بْیا’۔
اگں جَنێن ءَ گُشت پَرچا مَن وَتی آنجَگ ءَ بُبۆجاں گُڈا اِلتاپ بایا پَسَّو داتَگَت کہ شاباش، مَن اَنچێں دِلێرێں کارکُن لۆٹاں کہ مَن ءَ ھَم ٹیکاٹیک جَواب دات بِکَنت۔ اگں جَنێن ءَ چَہ اِلتاپ بائی ئے تْرُندێں تَوار ءَ تُرسِت وَتی آنجَگ ئِے بۆتک بِزاں آ رۆچ ءَ اِلتاپ بائی ئے تَماشَہ اَت…
وَہدے ما دِلیپ ئے سَر ءَ کَندَگ ءُ مَسکَرا کَنَگ ءَ اَتێں، مَن ءَ شُومی ءَ جَت مَن ھَمے کِسَّہ گۆں ھۆتمان ءَ کُت ءُ گُشت کہ وَتی دِشتار ءَ بُگُش سَمبال بِکَن دِلیپ گۆں تَو اِلتاپ بائی ئے لَیب ءَ کَنَگ ءَ اِنت۔ بِزاں سَنگَت ءَ مَنی اِے ھَبَر دۆست نَبُوت۔ مَن ءَ یَکّ ءُ دو رَند ءَ گُشت ئِے کہ تَو نوں گێشێں کَنَگ ءَ ئے۔ چِد ءُ دێم مَرَو۔ مَن ھَم دِگِہ گێشێں ھَبَرے نَکُت۔ ما وَپتێں۔”
نوں شَمبِہ ءِ کۆٹی سارت بَیَگ ءَ اَت۔ آئی ءَ لۆٹِت کہ دَشتی ءَ مَیلاں وَتی ھَبَراں دْراجکَشّ بِکَنت، بُرَواں پہ وَت ءَ ھَم باپێں جاہے شۆہاز بِکَناں۔ بلے گُش ئے دَشتی ءُ ھۆتمان ءِ کِسَّہ ءَ تَژن ءُ بِچَکَندے مان اَت۔ اِے تَژن ءُ بِچکَند شَمبِہ ءَ دَمانے چَہ وَتی جَنجالاں بے ھال کَنَگ ءَ اَت۔
“گُڈا دێم ءَ چے بُوت؟” شَمبِہ ءَ چُکّانی وَڈ ءَ جُست کُت۔
دَشتی ءَ وَتی دوێں دَستَنی مُکّ ٹێبَل ءِ سَر ءَ اێر کُت اَنت ءُ وَتی سُنٹ ئِے دوێں دَستانی مُچّاں اێر کُت۔ پُورَہ نوں دَشتی بَلُّکے اَت ءُ پہ وَتی نُماسَگ ءَ کِسَّہے آرَگ ءَ اَت:
“بلے۔ سُہبا مَہلَہ ھۆتماں پاد اَتک ءُ وَتی دِشتار ئِے پَون کُت ءُ اِلتاپ بائی ئے کِسَّہ ئِے آُرت۔ آئی ءَ وَتی دِشتار ھَبَر ءُ ھَکَّل دات۔
ھۆتمان ءِ کُوکاراں مَن ءَ چَہ واب ءَ گُڈێنت۔ مَن ءَ مِہری ءِ سَر ءَ بَزَّگ بُوت ءُ وَت ءَ مَلامَت کُت کہ مَن بایَد اِنت اِلتاپ بائی ئے کِسَّہ گۆں ھۆتمان ءَ مَکُتێں۔ وَہدے ھۆتمان ءَ وَتی پَون ھَلاس کُت مَن گۆں آئی ءَ گُشت کہ اِے تَئی دِشتار ءِ رَدی نَہ اِنت۔ تَو وَتی مِسکینێں دِشتار ءَ اِینچُک ھَبَر نَگُش ئے۔ بَسّ آئی ءَ بُگُش کہ دِلیپا بُلاک بِکَن۔ کِسَّہ ھَلاس۔ ھۆتماں پَدا مَنی سَر ءَ زَہر گِپت ءُ گُشت ئِے کہ اِے مَنی گَیرَت ءُ نَنگ ءِ ھَبَر اِنت۔ تَو وَت ءَ چَہ اِے چیز ءَ دُور بِدار۔ مَن پَدا ھامۆش بُوتان ءُ ھِچّ نَگُشت۔
اِے ھَبَران ءُ رَند مئے سَنگَت ءَ مارا ھَرَزبَندے وارێنت۔ ھَرَزبَند ءَ رَند، ما ڈَنّ ءَ شُتێن ءُ کَمّے تَرّ ءُ تاب کُت۔ بے گاہ ءِ وَہد ءَ ما دِگِہ سَنگَتے ءِ لۆگ ءَ مِہماں بُوتێں۔ چَہ ما پێسَر اود ءَ دِگِہ ھَپت ھَشت سَنگَت نِندۆک اَت۔ ما دیواں کُت۔ جَہک ءَ جیک بُوت۔ شَراب ءُ کَباب بُوت۔ سْیاسَت ءُ دانِشوَری بُوت۔ لَہتێں سَنگَت ءَ گُشت کہ بایَد دوێں بَلۆچِستاں، بِزاں رۆبَرکَتی ءُ رۆدَرَتکی بَلۆچِستاں یَجّاہ آزات کَنَگ بِبَنت۔ دِگِہ لَہتێں سَنگَت ءَ گُشت کہ اِنّاں یَبَّرے یَکّ بَلۆچِستانے آزات کَنَگ بِبیت ءُ رَند ءَ دُمی۔ یَکّ ءُ دو سَنگَت ءَ گُشت گُڈا سَیمی بَلۆچِستاں؟ بِزاں اَوگانِستان ءِ بَلۆچِستاں؟ گُڈا دِگِہ یَکّ ءُ دو سَنگَت ءَ گُشت کہ مئے اِے لیڈَرانی دَست ءَ یَکّ بَلۆچِستانے آزات نَبیت۔ شُما دو سئے بَلۆچِستان ءِ ھَبَر ءَ اِت۔ ھۆتمان ءَ ھَمے وَہد ءَ کَشُکانی دِلیپ ئے پُچُّک ھَم شُشت اَنت، بلے سَنگَتاں نَزانت کہ ھۆتماں کئے ءَ گُشَگ ءَ اِنت۔
دیوان ءَ رَند سَنگَت یَکّ یَکّ ءَ وَتی لۆگاں شُت اَنت۔ ما پَنچ سَنگَت سَر اَتکێں۔
مَن ءُ ھۆتماں یَکّ کۆٹیے ءَ وَپتێن ءُ سئے سَنگَت دِگِہ کۆٹیے ءَ۔ سُہب بُوت، ھۆتمان ءَ پَدا وَتی دِشتار پَون کُت۔ مَن ھَم چَہ واب ءَ پاد اَتکاں۔ وَہدے دُێنانی ھَبَر ھَلاس بُوت اَنت ءُ دِگِہ ھَبَرِش دَست نَکَپت، ھۆتمان ءَ یَکّ رَندے پَدا گۆں وَتی دِشتار ءَ اِلتاپ بائی ئے کِسَّہ کُت ءُ ھَبَر ءُ ھَکَّل ئِے دات۔ بَزَّگێں مِہری ءِ گْرێوَگ ءُ ھیسکارَگانی آواز مَن چَہ پَون ءَ ڈَنّ اِشکُت اَنت۔ مَن وَت ءَ گێشتِر مَیاربار کُت۔ ھۆتمان ءَ پَون بَند کُت ءُ مَن ءَ کِمار ئِے نَکُت ءُ شُت پَسیل ءَ ۔ مَن جێڈَگ ءَ اَتاں کہ وَہدے ھۆتماں چَہ پَسیل ءَ دَر کئێت مَن چَہ آئی ءَ ماپی لۆٹان ءُ اِے ھَم گُشان ئِے کہ مِہری دِلیپ ئے چُکّی ءَ رَوا بیت، اِے مِہری ءِ رَدی نَبُوتَگ اِے دِلیپ ئے رَدی اِنت۔ تَو دَم پہ سَہت مِہری ءَ ھَکَّل نَگُش ئے، آ دِل ءَ کاریت۔”
نوں دَشتی ءَ بَلُّکانی پَیم ءَ نِندَگ ھَلاس کُت۔ وَت ءَ کُرشی ءَ تِکَہ ئِے دات ءُ چَہ کَہوا ءَ گُٹّے گِپت ئِے ءُ وَتی ھَبَر ئِے دێم ءَ بُرت اَنت:
“ھۆتماں اَنچۆکہ چَہ پَسیل ءَ دَر اَتک، چۆ وَرۆکێں کُچِکّ ءَ مَنی سَر ءَ اِنزار ئِے بَست۔ واجَہ مَنی دِلبَند ءِ سَر ءَ نِشت ءُ وَتی یَکّ دَستے مَنی گُٹّ ءَ سَکّ ئِے دات ءُ گۆں دُمی دَست ءَ مَنی دێم ئِے شَہمات پہ شَہمات کُت۔ مَن چارپادَگ اَتاں۔ ھِچّ سُرِت کَنَگ ءَ نَہ اَتاں۔
کِساس دَرزِنے شَہمات ءَ رَند گُرّانا گُشت ئِے کہ اِے مَنی گَیرَت ءُ نَنگ ءِ مَسلَہ اِنت۔ اِے بارَوا تْرِکَّگ نَوَر ئے۔ مَن لۆٹِت کہ بُگُشاں کہ مَردُم ءِ دَست کہ ھَر ءَ نَرَسیت، کُرَّگ ءَ پالام کَنت۔ تَئی دَست دِلیپا نَرَسیت، زَہراں مَنی ءُ مِہری ءِ سَر ءَ کَشّ ءِ۔ بلے مَن ساہ کَشِّت نَکَنَگ ءَ اَتاں، ھَبَر وَتی جاگَہ ءَ ۔
اَناگَت مَن ھَیال کُت کہ مَن دیوال ءِ نَزّیک ءَ آں۔ مَن چار پَنچ رَند ءَ دیوال گۆں زۆراں جَت۔ چَہ دُمی کۆٹی ءَ سَنگَتے تَچانا اَتک۔ آئی ءَ مارا دیست ھَبَکَّہ بُوت کہ ما دۆشی بْرات ءُ سَنگَت اَتێں، اَنُّون چۆن دُژمِن بُوتێں؟
مَن ھیلَتے ھۆتمان ءِ دَست چَہ وَتی گُٹّ ءَ دُور کُت ءُ جَلدی جَلدی گُشت کہ اِے مَرد ءَ چَہ مَنی سَر ءَ دُور بِکَن کہ مَن مُرتاں۔ سَنگَت ءِ دَماگ کار ءَ نَہ اَت کہ چے بِکَنت۔ گُڈا مَن سَنگَت ءِ نام گِپت ءُ کُوکار کُت کہ جَلدی بِکَن کہ مَن مُرتاں۔ سَنگَت ءَ کہ مَن ءَ کُوکار ءَ دیست، وَت ھَم کُوکار ءَ لَگِّت، ھۆتماں! یَلَہ دَئے وَتی سَنگَت ءِ گُٹّ ءَ ۔ تَئی سَنگَت مِریت، ما بَنّام بے ن۔
بلے ھۆتماں مَن ءَ یَلَہ دَیَگ ءِ وَڈ ءَ نَہ اَت۔ نوں آ چَہ کُچِکّ ءَ گْوَستَگَت ءُ چۆ اُشتِر ءَ بۆلارَگ ءَ اَت۔ ‘مَرچی تَرا زِند مات اِنت۔’
سَنگَت ءِ دَماگ کار ءَ نَہ اَت۔ شُت دُمی سَنگَت ئِے آُرت۔ دُمی سَنگَت اَتک۔ آ ھَم کُوکار کَنَگ ءَ لَگِّت کہ ھۆتماں! شُما دۆشی یَکّێں کاشی ءِ تَہا وَرَگ وارت، یَکّێں گِلاس ءِ تَہا شَراب وارت ءُ یَکّێں سِگرێٹ ءِ تَہا چَرس کَشِّت، اَنُّون چۆن وَت ماں وَت ءَ یَکّ ءُ دُمی ئے گُٹّ ءِ ھۆنان اِت؟
بلے ھۆتماں مَن ءَ اَنگَت یَلَہ دَیَگ ءِ وَڈ ءَ نَہ اَت۔ نوں بۆلارَگ ئِے ھَلاس کُتَگَت۔ بَسّ تُربَتی گۆک ءِ پَیم ءَ مَنی دِلبَند ءِ سَر ءَ نِشتَگَت۔ مَن ءَ شَہمات پہ شَہمات کَنَگ ءَ اَت۔
مَن پَدا کُوکار کُت کہ سَنگَتاں اِے مَرد ءَ چَہ مَنی دِلبَند ءِ سَر ءَ دُور بِکَنِت۔
دُمی سَنگَت ءَ کہ مَن ءَ چۆ کُوکار ءَ دیست، شُت سَیمی سَنگَت ئِے چَہ واب ءَ پاد کُت ءُ آُرت۔ سَیمی سَنگَت ءَ ھَم دِگِہ ھِچّ نَکُت ءُ بَسّ کُوکار ئِے کُت کہ ھۆتماں! تَو دۆشی گُشَگ ءَ اَت ءِ کہ ما سَیێں بَلۆچِستان ءِ بَلۆچاں یَجّاہ کَنێں۔ یَکّ بَلۆچِستانے جۆڈ کَنێں۔ جَہندَم چَہ سَیێں بَلۆچِستان ءِ بَلۆچاں یَجّاہ کَنَگ ءَ، تَو وَتی جِند ءِ بْرات ءِ گُٹّ گِپتَگ۔
مَنی دِل کَمّے ڈَڈتِر بُوت کہ بَلکێں اِے سَنگَت ءِ ھَبَر ھۆتمان ءَ کار کَن اَنت۔ بلے اِے وَہد ءَ ھۆتماں نہ وَتی دۆشیگێں ھَبَرانی سُدّ ءَ اَت ءُ نہ آئی ءَ مَنی اِزَّت ءِ ھَیال گْوَر اَت کہ مَن پیر ءَ پیر نۆکێں سَنگَتانی دێم ءَ چارپادَگ اَتاں۔
نوں مَن وَتی چَمّ سَیێں سَنگَتاں سَکّ دات اَنت ءُ باز کُوکار کُت کہ اگں شُما اِے مَرد ءَ چَہ مَنی سَر ءَ دُور مَکَنِت، مَن پَکّاءَ مِراں۔
آہِر ءَ سَنگَتاں ھِمَّت کُت، دێم ءَ کِنزِت اَنت ءُ بازێں گِر ءُ چیلے ءَ رَند آیاں ھۆتماں چَہ مَنی سَر ءَ دُور کُت۔
ھۆتماں سَنگَتاں داشتَگَت۔ مَن زُوت پاد اَتک ءُ پَشَل پَشَلا دێم پہ لۆگ ءِ دَروازَگ ءَ شُتاں کہ وَتی بُوٹاں پاد ءَ کَنان ءُ ڈَنّ ءَ رَواں، سارتێں گْواتے وَراں کہ مَنی دَم دَر آیَگ ءَ نَہ اَت۔ مَن بُوٹاں پاد ءَ کَنَگ ءَ اَتاں تَ گِنداں کہ ھۆتماں چَہ سَنگَتانی دَست ءَ لَگُشتَگ ءُ چۆ کُچِکّ ءَ مَنی نێمَگ ءَ سِستَگ ءُ پێداک اِنت۔ مَن جێڈِت اگں ھۆتماں اِے رَندی پَدا کُچِکّ ءُ اُشتِر ءُ گۆکَئێگ ءَ مَنی سَر ءَ اُرُش بِکَنت نوں مَن پَکّاءَ مِراں۔
دِلے ءَ گُشت کہ دَشتی وَتی بُوٹاں دَست ءَ کَن ءُ بِتَچ کہ تَو مُلک ءَ پَوجیانی دَست ءَ نَمُرت ئے، دَرمُلکا وَتی سَنگَت ءِ دَست ءَ مِر ئے، ءُ دِگِہ دِلے ءَ گُشت کہ تَچَگ اَیبے، اگں تَو تَتک ئے داں زِندَگ ءِ اِے سَنگَتانی دێم ءَ بَنّام ئے۔ گُش ئے کَسے ءَ مَن ءَ گُشت کہ تَچَگ دِگِہ کُجام اِنت؟ تَو چَہ مَرگ ءِ تُرسا چَہ جَنگ ءَ تَتک ئے، چَہ مُلک ءَ تَتک ئے، چَہ وَتی اَزیز ءُ وارِساں تَتک ئے۔ آ تَچَگ اَیبے نَہ اَت، اِے تَچَگ اَیبے؟
مَن اَنگَت شَش ءُ پَنچ ءِ تَہا اَتاں۔ اَناگَتا لۆگ ءِ گَنٹی ءَ تَوار کُت۔
‘ما پُلیس ایں، لۆگ ءَ پَچ کَنِت۔’
مَن لۆگ پَچ کُت۔ دَرزِنے پُلیس لۆگ ءَ پُتِرت۔ اِشانی تَہا یَکّ مَردے ءَ پُلیس ءِ گُد گْوَر ءَ نَہ اَت، کُوکار ءَ لَگِّت کہ دۆشیگێن اِنت، اِے پَنَہگیراں مارا بَزَّگ کُتَگ۔ اِشاں دۆشی پاٹی کُتَگ ءُ مئے واب ھَراب کُتَگ۔ اَنُّون جَنگ ءَ اَنت، مئے چُکّ دِلترَکّ اَنت۔ اِے اَنگَت نِشَہ اَنت۔ اِشاں دَزگیر کَنِت، چَہ مئے مُلک ءَ دَر کَنِت۔
اِے مَرد مئے مێزبان ئے ھَمساہِگ اَت۔ راست گُشَگ ءَ اَت کہ واکی شَپ ءَ مئے سْیاسَت ءَ اِشی ئے واب ھَراب کُتَگَت ءُ سُہبا مئے جَنگ ءَ ۔ نوں مئے دْرُستانی شَلوار چَہ گُوت ءَ پُرّ بُوت اَنت، چۆ مَبیت کہ پُلیس ھَکّ ءُ دِل مارا مُلکبَدَر بِکَن اَنت۔
پُلیساں مارا وَتی گاڈی ءَ سَوار کُت ءُ تانَہ ءَ بُرت۔ مارا کۆٹیے ءِ تَہا پہ سئے چار گَنٹَہ ءَ بَندِش کُت۔ رَند ءَ مئے کِرّا اَتک اَنت ءُ گُشتِش کہ گِندَگ ءَ نوں شُما نِشَہ نَہ اِت، بَلکێں دۆشی نِشَہ بُوتَگِت ءُ مَردُمانی واب ھَراب کُتَگ۔ اَنُّون بُرَوِت بلے پَدا اِے پَیمێں کار مَکَنِت۔
ما کہ چَہ تانَہ ءَ دَر اَتکێں، شُتێں سَنگَت ءِ لۆگ ءَ وَتی بَئێگ زُرت ءُ دَر کَپتاں۔ نوں نَزاناں کُج ءَ بُرَواں۔ سَرکاری لۆگ مَن یَلَہ دات۔ گۆں ھۆتمان ءَ وَ نِندَگ نَبیت۔”
وَہدے دَشتی ءَ وَتی ھَبَر ھَلاس کُت اَنت، شَمبِہ جێڈَگے ءَ کَپت کہ واکی مَن اَنُّون اَسَلی کِسَّہے اِشکُنَگ ءَ اَتاں یا اِے بَسّ پِلِم ءُ کِتابی کِسَّہے اَت کہ دَشتی گۆں مَن کَنَگ ءَ اَت ئِے۔
شَمبِہ ءَ وَتی وَرنائی ءِ وَہد ءَ اِے پَیمێں کِسَّہ ءُ کِردار کِتاب ءُ تامُرانی تَہا وَنتَگ ءُ دیستَگَت اَنت کہ مُلکے ءَ شۆرِشے بِندات بیت، لَہتێں وَرنا پہ زانت ءُ لَہتێں پہ نَزانتکاری گۆں شۆرِشا گۆں کَپیت۔ کَمّے وَہد ءَ رَند شۆرِش مَزَنێں جَنگے ءِ تَہا بَدَل بیت۔ لَہتێں وَرنا جَنگ ءِ بِنداتی رۆچاں جَنَگ بیت، لَہتێں دَزگیر ءُ بے گْواہ کَنَگ بیت۔ لَہتێں جَنگ ءَ دێم ءَ بارت، لَہتێں دَرانڈێہ بیت۔ لَہتێں مُلک ءَ ءُ لَہتێں دَرمُلکا سْیاسَت ءِ سَوَب ءَ ناتِپاک بیت ءُ وَت ماں وَت ءَ جَنگ ءُ داوا ءَ لَگّیت۔۔۔
بلے نوں پانزدَہ بیست سال ءَ رَند، گُش ئے اِے کِتابی ءُ تامُری کِسَّہ ءُ کِردار اَسَلیا شَمبِہ ءِ زِند ءِ تَہا بَیَگ ءَ اَت اَنت۔
شَمبِہ تَچیت ءُ اِے کِسَّہ ءُ کِردار شَمبِہ ءِ رَند ءَ گۆن اَنت۔
ھَشت سال اِنت ھۆتمان ءُ دَشتی جَرمَنی ءَ شُتَگ اَنت، ھما اِنت وَت ماں وَت ءَ اَڈِتَگ اَنت۔ ھَروَہدا کہ مِڈ اَنت گُڈا وَٹسَپ ئے سَر ءَ بَرے ھۆتمان ءِ یا بَرے دَشتی ءِ پَون چُٹِّتَگ کہ بْیاِت مئے سُہل ءُ سَلاہ ءَ بِکَنِت، ما اَڈِتَگێں۔
شَمبِہ وَٹسَپ گْرُوپ ئے کالا بِندات کَنت ءُ گُرُو بُنگَپّ ءِ جِند ءَ ۔ “ھاں شُمارا چۆن اِنت؟ یَکّے مارا وَ پاکِستان ءَ کُشت ءُ دُمی شُمئے ھَرّۆچیگێں اَڈ ءُ کُڈاں۔ شُمئے پِتانی میراس بَہر نَبیت۔ بارێں مَرچی شُما چے کُتَگ؟”
اگں آ رۆچ ءَ ھۆتماں مْیاریگ اِنت، دَشتی وَتی تَہلُچّێں کَندَگ ءَ جَنت ءُ گۆں ھۆتمان ءَ گُشیت، “دِگِہ وَہد ءَ تَو مئے گۆش کَرّ کُتَگ اَنت، نوں تْرِکَّگ نَکَن ئِے؟”
اگں آ رۆچ ءَ دَشتی مْیاریگ اِنت، ھۆتماں وَتی دَست ءَ دِلبَند ءَ جَنت ءُ سِگرێٹے رۆک کَنت ءُ گۆں دَشتی ءَ گُشیت، “نوں ھَبَر کَن، پَرچا گُنگ ئے؟”
دَشتی گۆں تَہلُچّێں کَندَگے وَتی ھَبَراں بِندات کَنت:
"شَرّ واجَہ! تَو کہ مَن ءَ مۆہ داتَگ گُڈا مَن وَتی ھَبَراں دیوان ءِ دێم ءَ اێر کَناں۔ سَنگَتاں، گَپّ چُش اِنت۔ بِزاں دۆشی مَن گۆں لَہتێں سْیاسی سَنگَت ءَ اِکس ئے اِسپَیسا اَتاں۔ ما داں دێراں نِشت ءُ چاگِردی ءُ سَماجی سارہالانی سَر ءَ ھَبَر کُت۔ وَہدے مئے سَرہال ھَلاس بُوت اَنت، اِسپَیس ئے مَردُم کَمّ بُوت اَنت۔ نوں ما بَسّ لَہتێں پَجّارۆکێں سَنگَت سَر اَتکێں۔ ما بَلۆچ ءِ اَنُّونگێں سْیاسَت ءِ نێمَگ ءَ اَتکێں۔ اِے سَرہال ءِ سَر ءَ ھَم ما داں دێراں رَپَٹِت۔ ھَمے رَپَٹَگانی میان ءَ مَن ھۆتمان ءِ لیڈَر، نَواب ساہِب ئے پُچُّک کَمُّک شُشت اَنت۔ اَنچۆکہ ما دیواں ھَلاس کُت ھما دَمان ءَ مَن ءَ ھۆتمان ءَ پَون کُت ءُ بازێں بَد ءُ رَدے کُت۔”
“اِے وَ سَرجَمێں گَپّ نَہ اَت، سَرجَمێں گَپّاں بِجَن۔” مُدام ءِ پَیم ءَ ھۆتماں گَپّ ءِ تَہا دَور کَنت ءُ گُشیت۔
پَرچاکہ دَشتی ھِجبَر اَوَلی رَند ءَ وَتی سَرجَمێں کِسَّہ ءَ نَیاریت۔ آئی ءَ تُرسیت کہ مَن یَکّ رَندے پَدا ھۆتمان ءِ دَست ءَ بَد ءُ رَد مَوَراں۔ دَشتی گۆں شَمبِہ ءُ گُرُوا دَزبَندی کَنت کہ مَن ھما شَرت ءَ سَرجَمێں کِسَّہ ءَ کاراں کہ پَدا بَد ءُ رَد کَنَگ مَباں۔ شَمبِہ ءُ گُرُو چۆ کازی ءَ آئی ءَ دِلبَڈّی دَ اَنت کہ نوں تَو مئے ھَکدیوانا ئے، تَرا ھۆتماں ھِچّ نَگُشیت۔
دَشتی وَتی ھَبَراں دێم ءَ بارت:
“وَہد ءَ مئے مێتَگ ءَ مُلایے ھَست اَت، آئی ءِ نام مُلا بَرکَت اَت۔ اَنچۆکہ آئی ءَ پَجَر ءِ نُماز کُت، وَتی بَیٹِک ئے دَپ ئِے پَچ کُت ءُ نِشت۔ سَجَّہێں رۆچ ءَ آئی ءِ بَیٹِکا ھَپۆگیانی رَووا اَت۔
ھَپۆگیاں وَڈ وَڈێں جێڈَہ گۆن اَت۔ اگں کْوَہنێں ھَپۆگے بِزاں بُنجَنے اَت گُڈا آئی ءِ گَپّ اِش اَت کہ ھما اِنت مَنی مَرد ءَ دُمی جَن گِپتَگ، مَنی لۆگ ءِ دَپ ءَ نَیَیت۔ گُش ئے مَنی لۆگ ءِ دَپ ءَ گَرّیێں کُچِکّے مُرتَگ۔ مانا اَنچێں تایدے بِدئے کہ مَنی مَرد گۆں مَن پێش ءِ وَڈ ءَ بِبیت۔
ءُ اگں نۆکێں ھَپۆگے اَت گُڈا اِے واست ءَ اَتک کہ مَنی مَرد ءِ دِل ءَ مَنی نێمَگ ءَ بِتَرّێں۔ بِلّ ئِے آ وَتی پێسَری جَن ءُ چُکّاں یَلَہ بِدَنت۔ اگں مَنی مَرد چُش مَکَنت، مَنی لُولُک مانا یَلَہ نَدَ اَنت۔
ءُ ھَمایاں کہ ھَپۆگی ئے تُرس اَت بِزاں آیانی مَرد دِگِہ جَنے ءِ گِرَگ ءَ دِلمانَگ اَت اَنت، آیاں اِے وَڈێں زَنگ جَت کہ ھما اِنت مَن اِشکُتَگ کہ مَنی مَرد دِگِہ جَنے ءِ گِرَگ ءَ سَر گِپتَگ، مَنی سَر بال اِنت ءُ دِل لَرزیت۔ نہ مَن وَتی لۆگ ءَ نِشت کَناں، نہ وَتی مات ءُ پِتانی لۆگ ءَ ۔ مَن تُربَت ءُ کَراچی ءِ داکتَر ھَلّێنتَگ اَنت، بلے اَنگَت دْراہ نَباں۔ مَنی گُڈّی اُمێت اَوَل ھُدا ءُ دُمی تَو ئے۔
مُلا بَرکَت ءَ اِے جَنێں کَمّے زَرّ گِپتَگ ءُ بَند ءُ تاید ءُ دَم ءُ چُوپ کُتَگ اَنت۔ اگں لَہتێں جَنێں چَہ بَند ءُ تاید ءُ دَم ءُ چُوپ ءَ دْراہ نَبُوتَگ گُڈا بَلۆچی دَوا دَرمانِش داتَگ اَنت۔ اگں اَنگَت اِے جَنێں وَشّ ءُ دْراہ نَبُوتَگ اَنت آہِر ءَ اَندَر ءَ کُتَگَنتِش۔ ءُ لَہتێں بَند ءُ تاید ءُ بَلۆچی دَوا ءُ دَرمانِش دَم جَتَگ ءُ داتَگَنتِش کہ ھَپتَگ ھَپتَگے ءَ یا دو دو ھَپتَگ ءَ وَت ءَ اَندَر ءَ بِکَنِت۔ شُمارا کَسّ مَگِندیت۔ شُمئے مَرد ھَم شُمارا مَگِند اَنت۔ مئے دَمَگ ءِ دُجَنی ھَروَہدا مُلا بَرکَت ءِ سَر ءَ چۆ گُنج ءَ زَہر بُوتَگ اَنت۔
نوں لَہتێں سال بیت گُش ئے مُلا بَرکَت ءَ نَواب ساہِب ھَم اَندَر ءَ کُتَگ۔ واجَہ مُپتا بَلۆچ ءِ لیڈَر اِنت، بَلۆچ لَٹّاں کُشت، بلے واجَہ گِندَگ نَبیت۔ ما، بِزاں لَس مَہلُوک چۆ دُجَنیا ایں۔ سَر سَر جَنێں، مئے لیڈَر گِندَگ نَبیت۔
ما کَراچی ءَ وانَگ ءِ زَمانَگ ءَ کالِج ءُ اُونیوَرسِٹی ئے کِلاساں رَند سَجَّہێں رۆچ ءَ لْیاکَت کِتابجاہ ءَ نِشتَگ ءُ تَوار اَکبارا نَواب ساہِب ئے ھِژمگِرێں بَیان ءُ نِبِشتانک وَنتَگ اَنت ءُ وَت ءَ دَرانڈێہ کُتَگ۔ مَرچاں کہ اِکس ءُ پَیزبُکّ ءُ اِنِسٹَگرام ءُ ٹِکٹَوک ءُ بَرێں دِگِہ چے چے ءِ دَور اِنت، بلے نَواب ساہِب گِندَگ نَبیت۔ اگں مَن دْرۆگبَند مَباں 27 مارچ، 11 اَگَست، ءُ 13 نَوَمبَر ءَ اَبَید ناوَب ساہِب دِگِہ ھِچّ رۆچ ءَ گِندَگ نَبیت۔
بَسّ ھَمے رۆچاں واجَہ ٹْویٹے ٹْویٹے کَنت ءُ رَوت، بِزاں آئی ءَ وَتی پَرز پُورَہ کُت۔ ھُدا زانت کہ واجَہ چے کَنَگ ءَ اِنت، بلے اَنُّون اِے ھَبَر ءَ بَزَّگێں کَوم شَرّ زانت کہ مارا لَٹّاں کُشت بلے مئے لیڈَر گار اِنت۔
مَنی ھَبَر بَسّ ھَمے بُوتَگ اَنت۔” دَشتی تَہلُچّێں بِچکَندَگے جَنت ءُ ھامۆش بیت۔
ھۆتماں زَہر گیپت، سِگرێٹ ءَ سُوٹ پہ سُوٹ کَنت ءُ گُشیت، “سَنگَتاں! نوں شُما وَت بُگُشِت، اِے شَرّێں ھَبَر اَنت کہ دَشتی ءَ کُتَگ اَنت؟ اِے مَرد ءَ وَتی دَپ ءِ سُدّ نێست۔”
ھَر سْیاسی وَرکَر ئے دِل ءَ مَنی لیڈَر دُنیا ءِ تَہا شَرتِرێں لیڈَر اِنت۔ دَشتی کُج ءَ وَتی سَنج ءَ جَہل کَنت۔
شَمبِہ ءُ گُرُو لۆٹ اَنت کہ ھَبَرے نہ ھَبَرے بِکَن اَنت بلے دَشتی مُدام ءِ وَڈ ءَ تَہا دَور کَنت ءُ گُشیت، “بِچار ھۆتماں! تَو اِے گَپّ ءَ ھِجبَر مَجَن کہ مَن ءَ وَتی دَپ ءِ سُدّ نێست۔ تَرا زانا کُج ءَ وَتی دَپ ءِ سُدّ ھَست؟ گْوَستَگێں ھَپتَگ ءَ تَو اِکس ئے اِسپَیسا مَنی لیڈَر ءِ پِت ءُ پیرُک نَنازێنت اَنت؟”
نوں ھۆتماں وَتی ھَبَر ءَ بِندات کَنت:
“مَن وَ بَدێں ھَبَرے نَکُتَگ تَئی لیڈَر ءِ بارَوا۔ مَن بَسّ ھَمے گُشتَگ کہ تَئی مِڈِلکِلاسێں لیڈَر، اَلی گُونی ئے چُکّ اِنت۔ اَلی گُونی، وَلی مُکچَٹّ ئے چُکّ اِنت۔ وَلی مُکچَٹّ، شَمبِہ شَگَزّ ءِ چُکّ اِنت۔ شَمبِہ شَگَزّ، اَلَّبَکش گَیس ءِ چُکّ اِنت۔ اِے مَردُماں ناں پہ وَرَگ ءَ نَبُوتَگ۔ اَلی گُونی ئے پِت ءُ پیرُکاں دِہکانکاری کُتَگ ءُ سئے وَہد ءِ ناں پہ اَزابے شۆہاز کُتَگ۔ اَلی گُونی ئے بُنمال یَکّ کُلّے بُوتَگ۔ ھَمے کُلّ ءِ تَہا آئی ءَ وَتی ھَپتێں بَچّ پێدا کُتَگ اَنت۔ رَند ءَ تَئی مِڈِلکِلاسێں لیڈَر ءَ بَلۆچِستان ءِ جَنگ ءِ پُشت ءَ مال ءُ مَڈّی مُچّ کُتَگ ءُ اَلی گُونیا پہ وَت بان ءُ بَنگُلَہ بَستَگ۔
اِے سَرجَمێں ھانداں بَسّ یَکّ سێرێں دُورسیادے بُوتَگ کہ آئی ءِ پِت ءُ پیرُک چَہ شَپُکّی کارُبار ءِ راہ ءَ سێر بُوتَگ اَنت۔ آئی ءِ نام میر جاپَر بُوتَگ۔
ءُ دِگِہ مَن بَسّ اِے گُشتَگ کہ یَکّ رَندے میر جاپَر سَپَر ءَ بیت، اَلی گُونی ئے مێتَگ ءَ چاہ ءِ ھۆٹَل ءَ پہ چاہ ءُ آپے ءَ اوشتیت۔ اَلی گُونی ھَمۆدا نِندۆک بیت۔ وَہدے میر جاپَر چاہ ءُ آپ کَنت ءُ پہ رَوَگ ءَ سَر گیپت، اَلی پہ سُبارِگ ءَ سَلاہے جَنت ئِے۔ میر گُشیت کہ مَرچی مَن داشت نَکَناں، بلے دێم ءِ ھَپتَگ ءَ جُمَہ ءِ رۆچ ءَ سُبارِگ ءَ تَئی کِرّا کایاں۔
اَلی زانت کہ میر گۆں وَتی گاٹ ءُ پَرێٹاں مَنی گَریبی کُلّ ءَ سُبارِگ ءَ نَیَیت۔ اَلی اِے رۆچاں واجَہ ناسِر ئے مُلک ءِ شَریک بیت۔ اَلی وَتی اَرز ءَ واجَہ ناسِر ئے کِرّا بارت کہ میر جُمَہ ءِ رۆچ ءَ پێداک اِنت، ما تَئی مُلک ءَ پِکنِک کَنَگ لۆٹێں۔ واجَہ اِنّاں نَکَنت۔
جُمَہ ءِ رۆچ ءَ میر گۆں وَتی سَنگَت ءُ گاٹ ءُ پَرێٹاں کئێت۔ پَسے کُشَگ بیت۔ پَس ءِ نێم سَجّی کَنَگ بیت ءُ نێم نارُشت ءُ بِریانی۔ وَرَگ گۆں مَیوَہ ءُ شَراباں مَردُمانی دێم ءَ اێر کَنَگ بَنت۔ میر گِندیت کہ سَجَّہێں مَردُم گۆں شَراب ءَ وَرَگ وَرَگ ءَ اَنت، بلے اَلی بے شَراب وَرَگ وَرَگ ءَ اِنت۔
میر دَرّاێنیت کہ اُو مَنی سْیاد! مئے دیوان ءَ یَکّ ھَبَرے مَہشُور اِنت کہ بے شَراب ءَ کَباب وَشّ نَہ اِنت ءُ بے کَباب ءَ شَراب۔ تَو اِے کَسانێں پَس ءِ گۆشت ءَ اێوک ءَ مَوَر۔ تْرُنداپ ءَ گُٹّے گُٹّے کَش ءَ بِدئے گۆں گُڈا بِچار کہ پَس ءِ گۆشت چۆن وَشّ اِنت۔
چونایا اَلی شَرابی مَردُمے نَبُوتَگ۔ بلے اِے رۆچ ءَ اَلی، میر ءَ اِنّاں کُت نَکَنت۔ اَلی شَرّ کَباب ءُ شَراب وارت۔ وَرَگ ءُ چَرَگ ھَلاس بیت، میر گۆں وَتی مَردُماں رَوت، بلے اَلی ھَمۆدا تَگِرد ءِ سَر ءَ داں شَپ ءِ ساہَت 9 بَج ءَ واب بیت۔ وَہدے چَہ واب ءَ پاد کئێت ماریت کہ مَن شُدیگ آں۔ تَتَّراں بیت ءُ وَتی لۆگ ءَ رَوت۔
بَرُنک ءِ سَر ءَ نِندیت، وَتی جَنا تَوار کَنت کہ اُو نازاتُون! تَو کُج ءَ مُرتَگ ءِ مَرچی، جَلدی کَن مَنی شام ءَ بْیار کہ مَن ءَ شُد ءَ کُشت۔’
یَکّ بَرے نازاتُون پَرێشاں بیت کہ اَلی ءَ چۆن اِنت کہ آئی ءَ ھِجبَر چۆ ھَبَر نَکُتَگ۔ بلے پَدا دِل ءَ گُشیت بَلکێں اَلی گۆں میر ءَ باز دَزگَٹّ بُوتَگ، نوں دَم ئِے بُرتَگ پَمێشکا جِژّ اِنت۔ نازاتُون گُشادیا کُلّ ءَ رَوت، چَہ دْرَنگ ءَ کاشُکێں ماہیگ ءِ تَل ءَ ءُ کُتَدّان ءِ سَر ءَ اێرێں لۆہیگ ءَ زُوریت کہ سَر اَتکَگێں بَٹّ ئِے مان اَنت، اَلی ءِ دێم ءَ کاریت ءُ اێرِش کَنت۔
وَہدے اَلی لۆہیگ ءِ دَپ ءَ پَچ کَنت تَ گِندیت کہ لۆہیگ ءَ تُشے بَٹّ ءُ تَلے کاشُک ماں، زَہر گیپت، لۆہیگ ءَ چِست کَنت ءُ پێژگاہ ءَ مان ئِے بُرّیت ءُ گُشیت کہ شَراب ءُ کَباب۔ کَباب ءُ شَراب۔ کَسّ گۆں شَراب ءَ سِرتَگێں بَٹّ ءُ کاشُکێں ماہیگ نَوارت۔ پَدا وَتی جَن ءُ ھَمساہِگانی مات ءُ گُہاراں نازێنیت۔ اَلی ءِ لۆگ ءِ مَردُم سَکّ پَرێشاں بَنت کہ بَلکێں اَلی جِنّے ءَ گِپتَگ پَمێشکا بے سُدّێں ھَبَر کَنَگ ءَ اِنت۔
اَلی ءِ لۆگ ءِ مَردُم ھما دَمان ءَ واجَہ ناسِر ئے لۆگ ءَ رَو اَنت ءُ آئی ءَ گُش اَنت کہ گُشاد کَن، مُلایے بْیار کہ اَلی جِنّے ءَ گِپتَگ۔ واجَہ ناسِر وَتی دِل ءَ گُشیت کہ اَلی وَ بے گاہ ءَ سَلامَت اَت ءُ گۆں میر ءَ شَراب ءُ کَباب وَرَگ ءَ اَت، اَنُّون چۆن جِنّ ءَ گِپتَگ۔ مُلا ءِ آرَگ ءِ بَدَل ءَ واجَہ ناسِر تَچاں تَچانا اَلی ءِ لۆگ ءَ رَوت تَ گِندیت کہ اَلی وَتی کُلّ ءِ دَپ ءَ اوشتاتَگ، پَشک ءُ شَلوار ئِے کَشِّتَگ اَنت ءُ بَٹّ ءِ لۆہیگ ءِ تَہا مان ئِے کُتَگ اَنت۔ لۆہیگ ءَ گۆں گُداں مِسّ جَنَگ ءَ اِنت ءُ کُوکار ءَ اِنت کہ شَراب ءُ کَباب، کَباب ءُ شَراب۔ کَسّ گۆں شَراب ءَ سِرتَگێں بَٹّ نَوارت۔
واجَہ ناسِر آئی ءِ نَزّیک ءَ کئێت، اَلی ءَ ھَکَّل دَنت، کُلّ ءَ راہ ئِے دَنت ءُ کُلّ ءَ ڈَنّ ءَ بَند کَنت ءُ گۆں آئی ءِ لۆگ ءِ مَردُماں گُشیت کہ اِشیا ھِچّ مَرگ نَہ اِنت۔ اِے جِنّ ءَ نَگِپتَگ۔ اِشیا مَرچی گۆں میر جاپَرا پِٹّے شَراب وارتَگ، نِشَہ اِنت۔ سُہبا ھۆش ءَ کئێت، وَت شَرّ بیت۔”
ھۆتماں وَتی ھَبَر ءَ ھَلاس کَنت۔ اگں آئی ءِ سِگرێٹ ھَلاس اِنت، دِگِہ سِگرێٹے رۆک کَنت، اگں سِگرێٹ ھالاس نَہ اِنت ھَمے سِگرێٹ ءَ دَمے جَنت ءُ گُشیت کہ مَن دَشتی ءِ لیڈَر ءِ بارَوا بَسّ ھَمینچُک گُشتَگ۔ اگں مَن کُشَگی کارے کُتَگ مَنی گَردِن جَنَگی اِنت۔
پێسَر ءَ دَشتی ءُ ھۆتمان ءِ اَڈ ءُ کُڈ اَنچێں جێڈَہانی سَر ءَ بُوتَگ اَنت۔ بلے مَرچی اِشانی اَڈ ءُ کُڈ ءَ سَر دِگِہ جاہے کَشِّتَگَت۔ نوں گَیرَت ءُ نَنگ ءِ ھَبَر اَت، جَنَگ ءُ پْرۆشَگ ءِ ھَبَر اَت۔ شَمبِہ ءَ نَزانت کہ مَن دَشتی ءَ چے سَر ءُ سۆج بِدَیاں۔
“اَنُّون مَنی سَر ھِچّ کار ءَ نَہ اِنت کہ چے بُگُشاں۔ تَو وَتی نۆکێں لۆگ ءَ بُرَو۔ مَن گُرُو ئے ھال ءَ گِراں، پَدا تَرا پَون کَناں۔ چارێں ما چے کُت کَنێں۔” شَمبِہ ءَ گۆں دَشتی ءَ گُشت۔
بلے دَشتی ءِ دِل ءَ نَہ اَت کہ نۆکێں لۆگ ءَ بُرَوت۔“اود ءَ ھَم ھۆتماں مَن ءَ جَنت۔”
“نوں ھۆتمان ءَ وَتی زَہر وارتَگ اَنت۔” شَمبِہ ءَ پَون بَند کُت۔
شَمبِہ ءَ یَکّێں وَہد ءَ وَتی ھال ءِ سَر ءَ کَندَگ ھَم آیَگ ءَ اَت ءُ گْرێوَگ ھَم۔ آ نَزانَگ ءَ اَت کہ بِنِندان ءُ دَشتی ءُ ھۆتمان ءِ اَڈ ءُ کُڈانی کِسَّہاں گۆش بِداراں یا وَتی جَنجالاں گیش ءُ گیوار بِکَناں۔
(رَوان اِنت)
نۆرۆز ھَیات