ھۆن داتَگ ءُ دْرَچک بَر کُتَگ اَنت
ما پَدا بیر کۆہاں سَر کُتَگ اَنت
اِشک وَ یَبَّرے بیت بَلکێں بلے
لَہتے کار اَنت کہ ما دُبَر کُتَگ اَنت
مَن مَیاریگ نَہ آن ءُ تَو اوں نا ئِے
رَنگ دُنیا ءَ بے اَسَر کُتَگ اَنت
ھِچّ تَماشا تَرا چَہ پَد نَکُتَگ
بَسّ تَئی نیمۆن ءَ چَمّ تَرّ کُتَگ اَنت
مئے مَیار اِنت کہ دُکِتابی گَنۆک
زُرتَگ اَنت آزمان ءَ سَر کُتَگ اَنت
جَنگ کَرزیت تَئی بَدَن، جاناں
ما وَتی دَست ھۆن ءَ تَرّ کُتَگ اَنت
مئے شَپ ءِ کِسَّہاں نَزانت کَسے
تیر پہ دُژمِناں نَپَر کُتَگ اَنت
لَہتے گَپّ اَنت کہ یَبَّرے بَنت بلے
سَکّ نَگێگ آں کہ مَن دُبَر کُتَگ اَنت
جَنگ ءُ آشۆب ءِ میان ءَ بامَرداں
گِس وَتی زُرتَگ اَنت، کَبَر کُتَگ اَنت
بے وَسی بے وَسی اِنت، باوَر کَن
ما تَلَب زُرتَگ اَنت، سَبَر کُتَگ اَنت
اِے وَدارے نَہ اِنت یَکّ وَیلے پہ تَو
ھۆن شانتَگ ءُ چَمّ دَر کُتَگ اَنت
اَندَر ءَ کَسے مۆتک جَنت آزِر
تَئی تَوار ءَ نی گۆش کَرّ کُتَگ اَنت
آزِر مُراد
Ázer Morád