ٹێبَل ءِ سَر ءَ کَہوا ءِ نێمانێں گِلاسے ءُ تَلپَچێں کِتابے اێر اِنت۔ دَریگ ءِ پَردَہ پَچ اَنت۔ دَریگ ءِ دێم ءِ کانچ ءَ رۆکێں آس ءِ تِکَہێں اَکس ءَ پُشت دْرَچکے ءُ دْرَچک ءِ سَر ءَ نِشتَگێں مُرَگ ءِ بانزُل رۆک اَنت۔ رۆٹِکّ ءِ بْرانزاں دیر چَرچ ئے مِکّێں مِہتِر اِیسّا ئے سَلیب تْرِپَگ ءَ اِنت۔ دَمک ءَ بُرزێں مَردُمانی رَشّ اِنت۔ رَوَگ ءُ آیَگ اِنت ۔ ھَمے مَردُمانی تَہا کَسے وَدارچاڈێں دابے ءَ چَرچ ئے دَپ ءَ کِرّے ءَ جَتَگێں لَیٹ ءِ کَمبَہا تِکَہ اِنت ءُ اوشتاتَگ۔
شَلوار ءِ پانچُک ئِے پَر نَہ اَنت، پَشک ءِ کالَر ئے بُکرَم ئِے زاہِر اِنت ، کَوش ئِے سیتَگ اَنت ءُ ھاکاں ھَوار اَنت۔ پاد ءُ زَمین ھَمرَنگ اَنت۔ سَبزێں رَنگ ئِے لَگُشتَگ، سْیاہ تَرِّتَگ ءُ چَمّ ئِے سُہر اَنت ۔
چَہ آئی ءِ دێم ءَ کَرنے ءِ بے وابیانی ژَندی سَہرا اِنت۔ بازێں پَنداں آئی ءِ بالاد شَمپێنتَگ، چۆ کَرز ءَ اَنت۔ بُرزێں مَردُمانی رَشّ ءِ تَہا رَوۆک ءُ آیُکاں چَمّ ئِے سَکّ اَنت۔ اَنچۆ ھیرتیا چارَگ ءَ اِنت گُش ئے کہ سَکّێں ھیرتێں چیزے پَٹَّگ ءَ اِنت ۔ کَمبَہ ئے بُرز ءَ لَیٹ ءِ پِلێٹ ءِ سَر ءَ دو کَپۆدَر بال بَندَگ ءَ اِنت۔ دْراجێں دَمک ءِ ھَر دو دَستاں دَروازَگ اَنت ءُ چَہ ھَمے دَروازَگاں یَکّے نێمپَچ اِنت۔ ھَرکَس کہ گْوَزیت ءُ ھَمے نێمپَچێں دَروازَگ ءَ کہ چَمّ ئِے کَپ اَنت تَ اَلَّم چَکّے جَنت ءُ دَمانے مَہتَل بیت ءُ چَہ ھَمے نێمپَچێں دَروازَگ ءَ سْرُکّے کَنت ءُ کَمبَہا گۆں کَپۆدَر ءُ بُن ءَ وَداریگێں مَردُم ءَ کہ چَمّ ئِے کَپ اَنت، مُورکاں مُجێنیت ءُ پُشت ءَ ماں دَنت۔
<سترُنگ><اِم>ھَسا بِجّار