پَتَنگے بان ءُ دَیاں پہ تَو بال زِندَگی ءَ
اَگاں بُزُور ئے مَن ءَ پہ مِسال زِندَگی ءَ
کَسے چَہ کَبر ءِ سَرُون ءَ داں اُمر پاد نَیَیت
نَیَتکَگ مُرتَگێں مَرد ءَ ھَیال زِندَگی ءَ
کَپۆدَرے ءِ کُلَو گۆن اَت اَنت بَہارگاہ ءَ
اِے باگ ءَ پُلّ نَیار اَنت چِنال زِندَگی ءَ
تَرا چَہ پێش، چَہ تَو پَد اِد ءَ اوں رَووا اِنت
پَدانی پۆل مَکَنت پادمال زِندَگی ءَ
نوں ماں گیشِّتَگ اَنت مَلکَمُوت ءُ اُمر دوێں
کَمال مَرگ ءَ کُتَگ یا کَمال زِندَگی ءَ
آ دَرد ءِ چاڈ دِل ءِ دْریکَگانی تۆک ءَ اِنت
گۆں پْرُشت ءُ پْرۆشیا کاریت دَمال زِندَگی ءَ
تَو اَتکَگ ءِ پہ تَرا اِے نَپَس مَن اێر کُتَگ
بَباتَگ اَنت نوں وَتی ماہ ءُ سال زِندَگی ءَ
پَدا اوں دَست چی ءَ بارێں کیسَّگ ءَ نَشُتَگ
ما زانتَگ ھَرچی نَہ اِنت زَرّ ءُ مال زِندَگی ءَ
گِدارے اَتک ءُ شَپێں اُمرے ءِ وَدار رَسێنت
دُبَر دُچار نَکَپت مَہجَمال زِندَگی ءَ
پہ دْرۆگ ءُ راست دوێں ماسَگانی مِستاگی
جَتَگ ما نێک ءُ بَدێں باز پال زِندَگی ءَ
نِگاہ ءِ اَلوَتے ءَ بْرَمش بے تَوار کُت اَنت
پَدا نَبُوت گۆں وَت ءَ گَپّ ءُ گال زِندَگی ءَ
چَہ پێژگاہ ءَ سَواساں سَر ءَ مَکَنت، مَگوَزیت
نہ تَوکَلے اَجَل ءَ ، نئے مَجال زِندَگی ءَ
دِل ءَ مَوَر کہ تَرا اَژدِہائیں وَہد مَوارت
زَوال ءَ آیَگی اِنت کئێت زَوال زِندَگی ءَ
تَو لَڈِّت ئے ءُ شُت ئے داد اِے جَہان ءَ چے
مَن ءَ را یار مَرَس(اِ)تێں اِے ھال زِندَگی ءَ
<سترُنگ><اِم>اَلیجاں داد