دَرد ءِ سَگَّگ، اَرس ءِ رێچَگ، رَنج ءِ بَڈَّگ ھێل کُتَگ
اَچ تَو پَد نوں تَئی شَیدا ءَ زِندَگ بَیَگ ھێل کُتَگ
ما اِے اَہد ءِ گُڈّی شَیدا، ما چۆن دۆداں مَٹّ کَنێں
تَو کہ دێم ءَ جُنزَگ لۆٹِت، ما کہ جَلَّگ ھێل کُتَگ
دَرد ءَ اَسَل ءَ وَہد پَکار اَت، مارا ھَم اِشتاپ نَہ اَت
اَچ تَو پَد داں اَہدے گْرێتَگ، نوں ما کہ کَندَگ ھێل کُتَگ
اِشک وَتی دۆدانی پابَند، دۆد اِش اِنت کہ رَنج بِدئے
اَرس چے اَنت کہ تَئی نابُودا ھۆن ءِ تِنگَگ ھێل کُتَگ
تَہنائی ئے جێڈَہ تَہنا اوپار ءَ گۆں پْرۆش نَوارت
ما اِے اَبێتکی شَپ چارێنتَگ، ما نوں سَگَّگ ھێل کُتَگ
گُشت ئِے آزِر بَسّ یَکّ جَنِکّے چۆن داں اُمرے پَہرێز ءِ
مَن گُشت جَنگَل جُنزِت نَکَن اَنت، مُرگاں لَڈَّگ ھێل کُتَگ
<سترُنگ><اِم>آزِر مُراد