مَنی اَرواہ
گُش ئے کِرمکَپتَگێں جۆنے
لَگۆرێں زِند ءِ ھاکۆٹ ءِ سَر ءَ کَپتَگ
پہ چۆنێں اُزر ءُ نیمۆنے
تَلان اِنت رێم ناں ھۆنے
سَر ءِ کامپۆل گۆشت ءَ ھَم یَلَہ داتَگ
دِل ءِ دْریکَگ اوں اوشتاتَگ
لَگۆرێں وَہد ءِ دَنتاناں
مَن ءَ چیلێنتَگ ءُ جاتَگ
دَپ ءَ اَنت پِشّیاں مازَگ
دِل ءُ لاپیگاں کَشّ اَنت ھۆنوارێں سَگ
گُراگ ءُ گُوتُو ءُ تۆلَگ
سَر ءَ پِر رِتکَگ اَنت اَنچُش
ھَزار وَنڈ ءَ کُتَگ تُش تُش
مَنی دَم بُرتَگێں اَرواہ
گُش ئے کِرمکَپتَگێں جۆنے
زِمین نادراہ
دَپُونکَہ دْراہێں کِشک ءُ راہ
نَپَس کَشِّت نَکَنت دُنیا
گَہێنتَگ ھَستی ءِ پێژگاہ
نَوَشّێں باتِن ءِ بُواں
چۆ گْوات ءَ ماں رۆپان اِنت
تَوامێں گْرێشَگ ءُ کۆہاں
تَلان اِنت ھارمَلّێں کَور ءُ شَہجُواں
سَڈان اَنت ھَڈّ
رێزان اِنت مَنی کامپۆل
تَنی وَہدی ھما اَنت
جِنتِرێں چَہرانی گَرد ءُ گۆل
ھما پیشکانڈ، پَٹّ ءُ پۆل
جَنۆزامێں شَپ ءَ اَنگَت نَمَٹّێنتَگ
تَہارێں تالِہ ءِ سْیاہێں وَتی گَردۆل
زُبان ءِ آچێں اُپّاراں
چُکُرّیت رێم ناں ھۆنے
لَگۆرێں زِند ءِ ھاکۆٹ ءِ سَر ءَ کَپتَگ
پہ چۆنێں اُزر ءُ نیمۆنے
مَنی اَرواہ گُش ئے کِرم کَپتَگێں جۆنے
زِمین نادراہ مَچِنت پۆنے
<سترُنگ><اِم>مَجید آجِز