مُرتَگێں اوستانی دْرَچکے تاک جَنت بارێں نَجَنت
چَہ مَن ءَ پَد زێبَلُک مُزواک جَنت بارێں نَجَنت
گْوانزَگ ءَ کَبرێں، نِپِٹّێں نَوبَتانی بَچکَدَگ
زَہرێں نُکّ ءَ کُچَّلێں تَریاک جَنت بارێں نَجَنت
سُوچِنێں لَبزاں زُبان ءِ آبلَہ تْراکێنتَگ اَنت
گَپّ اَنگَرمِتکَگێں گۆیاک جَنت بارێں نَجَنت
پہ مَنی نِزّ ءَ بَلۆچِستاں وابے دیدَگاں
مات، اَگاں بے وَہد بْیایاں جاک جَنت بارێں نَجَنت
مَرچیگێں سْیَہمار باندات ءَ پِلِکّان اَنت مَنی
باجُوێں بَچّاں زِمین ءِ ھاک جَنت بارێں نَجَنت
کَسّ مَنی کَبر ءَ پہ سالۆنکێں کَپَن لیلَو نَدَنت
ھیسکَگے بانۆرێں تَئی پۆشاک جَنت بارێں نَجَنت
جِکِّتَگ آجِز کَسے چَمّ ءَ مَنی چۆ کُنٹَگے
پَند اِشک ءِ سُورمَگێں اولاک جَنت بارێں نَجَنت
<سترُنگ><اِم>مَجید آجِز