یار گْیابان ءَ دَر کَپ اَنت ءُ رَو اَنت
کَنداں کَندان ءَ دَر کَپ اَنت ءُ رَو اَنت
زِندَگی گراں، دَم بَر اَنت مَردُم
چاچ بۆجانا دَر کَپ اَنت ءُ رَو اَنت
مُرگ تَئی سَبزَزارێں آتراپاں
سَوت شَنزان ءَ دَر کَپ اَنت ءُ رَو اَنت
چینچو گران ءَ رَس اَنت اِزم ءِ پُلّ
چینچو اَرزان ءَ دَر کَپ اَنت ءُ رَو اَنت
کاینت اِمرۆز ءَ آپ مَنتانا
آس تَندانا دَر کَپ اَنت ءُ رَو اَنت
اَچ مئے دیوان ءَ چادِر ءَ چَنڈ اَنت
یار مَلّان ءَ دَر کَپ اَنت ءُ رَو اَنت
تَئی زَہیر جِنگُل اَنت، تَہا لۆگ ءِ
تَرّاں تَرّانا دَر کَپ اَنت ءُ رَو اَنت
دَست ھَتَمسازے ءِ اِد ءَ کاینت
پُلّ سِندان ءَ دَر کَپ اَنت ءُ رَو اَنت
رَپتَگێنانی چَمّ اِستار اَنت
دُور آزمان ءَ دَر کَپ اَنت ءُ رَو اَنت
راچِنێں وَہد ءِ گْوانزَگ ءَ مَردُم
لُڈّاں لُڈّانا دَر کَپ اَنت ءُ رَو اَنت
چَمّ ءِ آپار ءَ شاِرێں اَرواہ
شَیر جێڈان ءَ دَر کَپ اَنت ءُ رَو اَنت
تَئی گَنۆکاں پہ زِندَگی چیے
رۆچ رێسان ءَ دَر کَپ اَنت ءُ رَو اَنت
آشِکێں چَمّ اَمیر وَتی وَتَن ءَ
واب گِندانا دَر کَپ اَنت ءُ رَو اَنت
<سترُنگ><اِم>اَمیر دۆست