مَنی، تَئی سَلاہ چِہ پَیم بیت
تَو شَہر ءِ ٹیٹَلێں جِنِکّ
مَن کۆہسار ئے شْوانَگ آں
مَنی ھَیال ءِ بُنزِہ ءَ
چِراگ رۆژنا بَنت
مَنی تَہاریاں شَپ ءِ
ھَزار ماہِکاں تْرِپ اَنت
مَن زِندَگ آں پہ واہَگے
بَہار ءِ سَنج ءِ نَوبَتاں
بلے تَچیت ھِرس تَئی
پہ رَنگ رَنگێں ماڈیاں
تَئی دِل ءِ مُراد بَسّ
ماں سُہر ءُ سَبزێں گاڈیاں
مَن ءَ را دۆچ دۆست بیت
تَو لۆٹ ئے شَہر ءِ ساڈیاں
بَہار ءِ سُہرێں دۆچ مَن
ھَتَم مَنی دِل ءِ پَہار
بلے چَہ زِرد ءِ واہَگاں
تَو بے سَما ءُ بے مَیار
مَن تَلوَساں تَو بے گَم ئے
مَن رۆچ ءِ شَہم آں تَو شَپ ئے
مَنی، تَئی سَلاہ چِہ پَیم بیت
تَو شَہر ءِ ٹیٹَلێں جِنِکّ
مَن کۆہسار ئے شْوانَگ آں
<سترُنگ><اِم>مُبارِک کازی