زَگرێں ھۆناں گۆں ھِنّیاں مێنێں
گْواڈَگێں کِشکاں جَور رۆدێنێں
چَمّ ءُ دِل مئے سَدَکَّہ اَنت پہ تَو
گُش، تَرا ما کُج ءَ بِنادێنێں
مارا ھَست اَژدِہائیں دَریایے
مَرکَبێں راچِناں بِنازێنێں
آہِنێں رَنج زَنگ بُوان اَنت
شیشَگێں دِل گُبار ءُ دَنزێن اِنت
بَشّ ءَ گِپتَگ کہ ساہِجیا سَنگَر
زاناں دێمپاں کێچ ءِ ھامێن اِنت
شۆرَہی تْراک پُلّ سْراپێن اَنت
مێتَگ اِنت مئے، ھَمے مئے ھَنکێن اِنت
شیر ماتی گْوَرانی ھُشک بِبَنت
مَلّێں بَچّاں ما ھۆن مێچێنێں
بَسّ ھَمے ھاکُمێں مَڈاہ اِنت مئے
گْرێتَگێں گْواڈَگاں نَکَندێنێں
چارێں کُنڈاں تَہارماہی اِنت
شَپچِراگے کُج ءَ بِبالێنێں
ھُشک ءُ ھَیراں مَنتَگێں، نوں ما
زِندَگی ءَ چِہ وَڈ بُگوازێنێں
آجِز ءَ بِلّ، گار ءُ گُمراہ اِنت
جِند مئے دانکہ گَردِن ءَ مێن اِنت
<سترُنگ><اِم>مَجید آجِز