اُو مِہرَبانێں ماہِکاں
اَمباز مَن ءَ ماں بانزُلاں
چۆ مادَر ءَ نازێں مُدام
مِہرانی شاگێں گْوانزَگاں
اُو مِہرَبانێں ماہِکاں!
دْرَپش چۆ دْرین ءِ دْرۆشُماں
نُورانی دْرَنز مُروارِداں
بُرز ءُ ھَشیمێں کُہسَراں
دَشت ءُ نِگوَردێماں بَلاں
اُو مِہرَبانێں ماہِکاں!
سَیل کَن مُلُورێں مێتَگاں
ھَلک ءِ اَبێتکێں رَہسَراں
اِنسِرتَگ چۆکہ مانِشاں
بے زِند ءُ زْرانکێں زِندماں
اُو مِہرَبانێں ماہِکاں!
نیلێں زِر ءِ دَرداں بِمار
چیہالاں چَول ءِ گۆش بِدار
دۆشی پَدا گْرێتَگ شَپ ءَ
سُہب ءِ سَر ءِ نَمب ءَ بِچار
اُو مِہرَبانێں ماہِکاں!
اِے کُوچَگ ءُ اِے کَہچَراں
وَیرانێں بَرّ ءُ بے دِہاں
پہ کَرن ءِ کَریاباں کَدی
شِنگیت تَئی آبِرَواں
اُو مِہرَبانێں ماہِکاں!
جۆہاں داں جۆن ءِ نَبیت
مۆسُم سَر ءِ رۆن ءِ نَبیت
سَنجے چِہ رَنگ ءَ سَمبَہیت
ھَورے شَلاں ھۆن ءِ نَبیت
اُو مِہرَبانێں ماہِکاں!
اِے شَپ چِہ پَیم اَنچۆ گْوَزیت
اِستاراں یَکّ یَکّ ءَ کُشیت
رۆزَرد ھَزار بَر گیمُریت
جَزم آں پَدا بامے بَلیت
اُو مِہرَبانێں ماہِکاں!
<سترُنگ><اِم>بَشیر بێدار