مَن تَلکے آں۔ مَن ءَ کِساس سالے بیت کہ اِد ءَ بُرزێں کَہیرے ءِ ٹُلّ ءَ دْرَنگ آں۔ رۆچانی گَرمی ءُ شَپانی سارتی ءَ ، نَمب ءُ دْرُشکاں، گْوات ءُ ھَوراں، تَبد ءُ لِواراں مَن ءَ سَکّ نِزۆر تَرّێنتَگ۔ مَنی لَبَّڈ سَڈِتَگ ءُ سِستَگ اَنت، نْیامدار وَرۆکاں وارتَگ ءُ نال زَنگاں گِپتَگ۔
مَن پَرچا اِد ءَ بے گْوَمی دْرَنگ آں؟ مَن ءَ پَرے ھال ءَ کئے ءَ کُت؟ اِے دْراجێں کِسَّہے۔
آ پاریگێں گَرماگ ءِ یَکّ وَشّ ءُ ساہێلێں سُہبے اَت۔ بَدَل ءَ مَن ءَ ءُ مَنی اێدِگِ دوێں ھَمراہانا چَہ لَچُکّا دَر کُت ءُ دێم پہ وَتی پِت ءِ ڈِگار ءَ رَہادَگ بُوت۔ آ مارا پہ چێر کَنَگ ءَ بَرَگ ءَ اَت۔
مَنی ءُ مَنی دوێں ھَمراہانی شَپ ءَ وَپسَگ ءِ جاگَہ ھَمے لَچُکّ اَت۔ بَدَل ءَ شَپ ءَ مارا چێر نَکُت، چی ءَ کہ شَپ ءَ مارا پُگُل ءُ مُشک ءُ کَڈُکّاں سْرَپێنت یا مۆر ءُ سُلۆراں داں بُرت اَنت۔ پَمِشکا رۆچ ءَ ما مُلک ءَ مُرگ گِپت ءُ شَپ ءَ ھَمے لَچُکّ ئے تَہا آرام کُت ءُ وَتی سَرگوَست ءُ کِسَّہ آُرت اَنت۔
سئے رۆچ اَت کہ بَدَل ءَ مَن ءَ اَڈّ کُتَگَت ءُ چێر کَنَگ ءَ بَرَگ ءَ اَت بلے مَن دَنینگَہ ھِچّ مُرگ گِپت نَکُتَگَت، پَمِشکا وَتی ھَمراہانی کِرّا کَمّے پَشَل اَتاں کہ آیاں باز شِکار گِپتَگَت۔
مَن شِکار گِپت نَکُتَگَت پَرچا کہ اَوَلی رۆچ ءَ مَن اَنچۆ ڈَکّ اَتاں کہ مَنی داں مُرگاں بُرت بلے مَن نَسرَپتاں، ءُ دُمی رۆچ ءَ اَنچۆ سُنّ اَتاں کہ وَسَّرا وَت سْرَپتان ءُ نِشتَگێں مُرگاں بال کُت۔ مُرگ پَدا جۆہان ءَ نِشت اَنت بلے مَنی نَزّیک ءَ نَیَتک اَنت۔
ھَیر، نۆکانیا چُش بیت بلے بایَد اِنت تَلک چۆ ڈَکّ ھَم مَبیت کہ مُرگ آئی ءِ کُبلُک ءِ دان ءَ بْوَر اَنت ءُ اَنگَت مَسرَپیت ءُ چۆ سُنّ ھَم مَبیت کہ کَوش ءِ کَشَّگ ءَ بِسرَپیت۔
آ سُہبی بَدَل ءَ مارا زُرت ءُ تَچک ءَ سُہرُو ءِ جۆہان ءَ اَتک کہ ڈِگار ءِ گْوَر ءَ پْراہێں سیرکَگے ءِ سَر ءَ کۆت اَت۔ اِے جۆہان ءَ بازێں مُرگے اَتک۔ کَپۆت ءُ شاتُلاں اَبَید بَرے بَرے پینتۆل ءُ جِنگُل ھَم اَتک اَنت۔
اَنّی جۆہان ءَ لَہتے شاتُل نِشتَگ ءُ دان ءِ چِنَگ ءُ وَرَگ ءَ اَت۔ وَہدے بَدَل نَزّیک ءَ رَسِت، آیاں بال کُت ءُ کَمّے پَسِّند، سۆلے ءِ سَر ءَ نِشت اَنت۔ بَدَل ءَ دوێں تَلک بُن ءَ اێر کُت اَنت ءُ مَن ءَ چێر کَنَگ ءَ لَگِّت۔ کَنڈُکے جَت ئِے ءُ مَن ءَ ھَمِشی ئے تَہا اێر ئِے کُت ءُ وار وارا بار ئِے دات۔ پَدا کُبلُک ءِ سَر ءَ گۆں سُسُرّ ءَ پِر لِچّێنتَگێں سُہرُوێں دان ئِے ھُپّ جَت ءُ دَر ءَ کُت۔ مَنی پُشتی نێمَگ ءَ لَہتے کَڈَبّی کانڈێل ئِے اێر کُت کہ مُرگ مَن ءَ پُشتُکائی مَجَن اَنت، چی ءَ کہ ما چَہ پُشتی نێمَگ ءَ آۆکێں مُرگاں سَکّ سَکّ ءَ گِپت نَکَنێں۔
بَدَل ءَ آدِگے دوێں تَلک ھَم چێر کُت اَنت۔ چێر کَنَگ ءَ رَند مئے کَش ءُ گْوَر ءَ وَتی پَد ئِے گۆں چادِر ءِ لَمب ءَ گار کُت اَنت کہ مُرگ مَمار اَنت۔ پَدا جۆہان ءَ گِستا کَلێرے ءِ پُشت ءَ نِشت ءُ چَمّ ئِے گۆں جۆہان ءَ کُت اَنت۔
مۆسُم سَکّ وَشّ اَت۔ جَمبَر ساہێل اَت اَنت ءُ سارتێں کَوشے ھَم کَشَّگ ءَ اَت۔ جۆہان ءِ کَش ءُ گْوَر ءِ کَلێر ءُ کَہیرانی سَر ءَ نِشتَگێں مُرگ چَہ مۆسُم ءِ وَشّی ءَ مَست اَت اَنت ءُ گۆں وَتی وَشّێں تَوار ءَ مۆسُم ءَ نازێنَگ ءَ اَت اَنت۔
ھَمے وَہد ءَ دو کَپۆت بال کَنانا اَتک ءُ ھَمے بُرزێں کَہیر ءِ ٹُلّ ءَ کہ اَنّی مَن دْرَنگ آں، نِشت۔ مَنی دِل وَشّ بُوت کہ مُرگ باز بَیان اَنت۔ اِشانی تَہا مَن یَکّے اَلَّما گِراں۔ بلے مَن پێسَر ءَ وَ ھِچّ مُرگ نَگِپتَگ۔ بارێں چۆن باں؟
مَن دِل ءَ جێڈَگ ءَ اَتان ءُ وَدار ءَ اَتاں کہ کَدی مُرگ جۆہان ءَ نِند اَنت۔ بَدَل کَلێر ءِ پُشت ءَ نِشتَگَت ءُ چَہ ما یَکّے ءِ سْرَپَگ ءِ وَدار ءَ اَت۔ مئے دْرُستانی وَدار ءِ دَماں وَدّان اَت اَنت بلے ھِچّ مُرگ بُن ءَ نَنِشتَگَت۔ دْراہ کَش ءُ گْوَر ءِ کَلێر ءُ کَہیرانی سَر ءَ نِشتَگ ءُ زێبائیں مۆسُم ءَ نازێنَگ ءَ اَت اَنت۔
نێٹ، مئے وَدارانی دْراجکَشّێں دَماں کُٹِّت اَنت۔ یَکّ شاتُلے ءَ چَہ کَہیر ءِ سَر ءَ بال کُت ءُ اَتک ءُ جۆہان ءَ نِشت۔ آئی ءِ پُشت ءَ دِگِہ دو سئے شاتُل دُمب پہ دُمب ءَ اَتک ءُ نِشت۔ لَہتے شاتُل آدِگے تَلکانی نَزّیک ءَ اَت ءُ یَکّے وار وارا مَنی نێمَگ ءَ آیان اَت۔ مَنی دِل ءِ دْریکَّگ تْرُند بیت اَنت ءُ مَنی ھَیال ءَ کَلێر ءِ پُشت ءَ نِشتَگێں بَدَل ءِ ھَم۔
شاتُل داں چِنان ءُ وَرانا مَنی دێم ءَ اَتک ءُ اوشتات ءُ پہ دان ءِ چُمب جَنَگ ءَ گێگ اَت کہ ھَمے وَہد ءَ دوێں کَپۆتاں گُشادیا چَہ کَہیر ءِ ٹُلّ ءَ بال کُت ءُ جۆہان ءِ کِرّا اَتک ءُ نِشت اَنت۔ شاتُل گُڈِت اَنت ءُ بالِش کُت ءُ ھما کَلێر ءِ سَر ءَ شُت ءُ نِشت اَنت کہ آئی ءِ پُشت ءَ بَدَل ٹَپِّتَگَت۔ گۆں بَدَل ءِ گِندَگ ءَ آیاں پَدا بال کُت ءُ دِگِہ سۆلے ءِ سَر ءَ شُت ءُ نِشت اَنت۔
مَن ءَ کَپۆتانی سَر ءَ سَکّ زَہر اَتک چی ءَ کہ اِشاں مَنی دَست ءِ شِکار بَراێنتَگَت۔ اگں اِے مَیَتکێن اَنت، اَلَّما مَن وَتی زِند ءِ اَوَلی شِکار گِپتَگَت۔ یَکّ بَرے مَنی دِل ءَ ھُلّ کُت کہ وَت ءَ سْرَپێناں، بِلّ ئِے کَپۆت گُڈ اَنت ءُ چِدا بال کَن اَنت ءُ رَو اَنت۔ اگں آیاں مَنی دَست ءِ شِکار بَراێنتَگ، مَن ھَم اِد ءَ آیاں چێنک ءِ چِنَگ ءَ نَیلاں۔ بلے پَدا مَن چارِت کہ اِشاں چُشێں آسانێں شِزایے نَدیاں۔ اگں اِد ءَ مَنِش بال بِدیاں، آ دِگِہ جۆہانے یا مُلکے ءِ سَر ءَ رَو اَنت ءُ لاپ ءَ پُرّ کَن اَنت۔ شَرتِرێں شِزا ھَمِش اِنت کہ مَن چَرِشاں یَکّے شِکار بِکَناں۔
دوێں کَپۆت کَش ماں کَش لُڈّانا جۆہان ءِ کِرّا گَردَگ ءَ اَت اَنت۔ ھَمے وَہد ءَ کَپۆتانی بال داتَگێں شاتُل ھَم پَدا اَتک ءُ نِشت اَنت۔ مَنی دِل وَشّ بُوت ءُ کَپۆتانی سَر ءَ زَہر اێر اَتک اَنت۔ اَوَلی رَند ءَ مَن آ شَرّی ءَ چارِت اَنت۔ آ وَرنا ءُ بینکَسێں کَپۆت اَت اَنت۔ یَکّ نَرےنے اَت ءُ یَکّ مادَگێںے۔ کَش ماں کَش لُڈّانا دوێں سَکّ بْرَہدار اَت اَنت۔ اِے چۆن گَل ءُ شادان اَنت۔ بے چارَگ نَزان اَنت کہ مَلکَمیت ھَر دَماں آیانی سْراپ ءَ اِنت۔
یَکّ بَرے مَن ءَ کَمّے بَزَّگ بُوت بلے پَدا چَرِشاں یَکّے ءِ گِرَگ ءِ واہَگ ءَ، زِند ءِ اَوَلی شِکار ءِ گِرَگ ءُ ھَمراہانی ءُ بَدَل ءِ دێم ءَ وَژنام بَیَگ ءِ واہَگ ءَ مَنی دِل ڈَڈّ کُت۔
نَرێں کَپۆت مَنی نێمَگ ءَ آیان اَت ءُ مادَگێں آئی ءِ پُشت ءَ گۆن اَت۔ مَنی دِل ءِ دْریکَّگ پَدا تْرُند بیت اَنت۔ اِشانی تَہا یَکّے مَنی شِکار بَیَگی اَت۔ نی مَنی ءُ بَدَل ءِ وَدار کُٹَّگی اَت۔ نَرێن ءَ مَنی سُہرُوێں داں کہ دیت، گام ئِے پہ مَن تْرُند کُت اَنت ءُ اَتک ءُ مَنی دان ئِے چُمب جَت۔ مَنی کێرُک چَہ کُبلُک ءَ دَر اَتک ءُ مَن دَمان ءَ کَپۆت ءِ گُٹّ ءَ گِپت۔
گۆں مَنی سْرَپَگ ءَ جۆہان ءَ نِشتَگێں مُرگاں بال کُت بلے گِپتَگێں کَپۆت ءِ مَٹّ مَنی سَر ءَ چَکَرُّکی وَرَگ ءَ لَگِّت۔ گۆں مَنی سْرَپَگ ءَ بَدَل ءَ ھَم دْرِکّ زُرت اَنت۔ وَہدے کَپۆت ءِ مَٹّ ءَ بَدَل آیَگ ءَ دیت، نَزّیک ءَ کَلێرے ءِ سَر ءَ شُت ءُ نِشت۔
بَدَل ءَ کَپۆت چَہ مَنی دَپ ءَ دَر کُت کہ مارتۆسَگ اَت۔ کَپۆت ئِے چارِت ءُ بِچکَندِت ئِے۔ “مُژدَوار ئے تَو، بْوَر سُہرُواں!” بَدَل ءَ بے بَزَّگێں گالِوارے ءَ گُشت ءُ چَہ گَل ءَ کْریشتَگے جَت۔
مَن ءَ بَزَّگ بُوت۔ چۆنێں وَشّێں زِندے اَت اِشانی۔ یَکّێں دَمان ءَ چۆ کُکُّلیانی کَلات ءَ کَرُتک۔ نی چۆن بے وَس اَنت، دِلترَکّ اَنت بے چارَگ۔ دْرێگَتێں مَن اِے مَگِپتێں۔ مَن گۆں پَشۆمانی کَپۆت ءِ نێمَگ ءَ چارِت کہ بَدَل ءَ مُہر داشتَگَت۔ نی بَدَل اِشیا کُشیت ءُ اِشی ئے مَٹّ گَماں مِریت۔ اِے دُێنانی ناوَہدێں مَرگ ءِ زِمَّوار مَن آں۔ مَن اِشانی وَشّێں زِند بَرباد کُت۔
مَن وَت ءَ مَلامَت کَنَگ ءَ اَتاں بلے نی آپ چَہ سَر ءَ پِر گْوَستَگَت۔ بَدَل ءَ چَہ لانک ءَ داس کَشِّت ءُ دێم کِبلَہ ءَ کُت ءُ پہ مُرگ ءِ ھِلار کَنَگ ءَ گێگ بُوت۔ کَلێر ءِ سَر ءَ نِشتَگێں کَپۆت نالَگ ءَ اَت۔
مَن سَکّ پَشۆمان اَتاں کہ اِے ھۆنِ ناہَکّ پَرچا وَتی سَر ءَ کُت۔ نی مَن چۆن اِشیا چَہ مَلکَمیت ءِ سَہگِرێں پَنجَگاں رَکّێنت کَناں۔ بلے رَند ءِ “ھِٹِّر ئے” چِہ دَرد ءَ وارت۔ کار وَ ھَراب بیتَگَت اَنت۔
بَدَل ءَ کَپۆت ءِ پاد وَتی راستێں پاد ءِ چێرا ءُ بانزُل چَپّێں پاد ءِ چێرا کُت اَنت۔ چَپّێں دَست ءَ گُٹّ ءُ سَر ئِے داشت اَنت ءُ داس ءَ کَپۆت ءِ گُٹّ ءَ پِر مُشانا “بِسّمِلّاہ، اَلّاہ اَکبَر” وانَگ ءَ لَگِّت۔ چَہ مَرگ ءِ تُرسا کَپۆت ءَ وَتی چَمّ نَزّ کُت اَنت ءُ مادَگێں کَپۆت بَدَل ءِ سَر ءَ چَکَرُّکی وَرَگ ءَ لَگِّت۔ داس کَپۆت ءِ گُٹّ ءَ اێر کَپت ءُ ھۆناں پینژار بَست۔ کَپۆت ءَ پَرپَرُّکی جَت دانکہ سارت بُوت۔
بَدَل ءَ چَہ کَپۆت ءِ زَگرێں ھۆناں سئے چار پِٹّ مَنی نْیامدار ءِ سَر ءَ پِر مُشت کہ مَن شَرتِر ءُ گێشتِر مُرگ گِپت بِکَناں بلے مَن… مَن پَشۆمانی ءِ ژَمبُورێں آس ءَ سُچان اَتاں۔
چَما رۆچ ءَ رَند مَن ھِچّ مُرگ نَگِپت۔ ھَروَہدا کہ مُرگ مَنی نَزّیک ءَ اَتک اَنت، مَن وَت ءَ سْرَپێنت ءُ چَرِشیا مَنی نَزّیک ءَ ءُ جۆہان ءَ چێرێں اێدِگِ تَلکانی کِرّا نِشتَگێں مُرگاں بال کُت۔ وَتی کُتَگێں گُناہ ءِ گْرانێں بار ءِ سُبَکتِر کَنَگ ءِ بَسّ ھَمے یَکّێں راہ پَشت کَپتَگَت۔
بَدَل ءَ داں ھَپتَگے کَپّے ءَ اوپار کُت بلے داں کَدێنا؟ چَہ مَنی ناوَہدێں سْرَپَگاں یَکّ رۆچے سَکّ زَہر گِپت ءُ مَن ءَ زۆراں کُورّات ئِے۔ مَن چَرائی ئے دَست ءَ لَگُشتان ءُ اِے بُرزێں کَہیر ءِ ٹُلّ ءَ جَمکے ءَ مان اَتکان ءُ چَما رۆچ ءَ بِگِر داں رۆچہ مَرچی ھَمِد ءَ دْرَنگ آں۔
نی رۆچ ءَ ءُ ھَوراں مَنی نْیامدار ءِ سَر ءَ لَگِّتَگێں ھۆنانی پۆلِنگ شُشتَگ اَنت بلے پَشۆمانی ءِ زیمسَرێں کاٹارانی ٹَپّ اَنگَت تازَگ ءُ آزَگ اَنت ءُ ھَروَہدے کہ کَپۆتے ءِ زَہیرنالێں کُوکُواں اِشکُناں، دِل ءَ دَردے چِست بیت ءُ دْراہێں جَہاں اَبێتک بیت۔
<سترُنگ><اِم>ناگُماں