<سترُنگ>نۆرۆز ھَیات
<سترُنگ><اِم>اَوَلی دَر
<سترُنگ>داکتَر مَلگُزار ءُ گْوانزَگی شُوم
کِساس ماہے اَت شَمبِہ ءَ اِے جێڈَگ چُنڈَگ ءَ اَت کہ پہ وَتی اِے کار ءَ کَئی دَر ءَ بُٹُکّاں کہ مَنی دَرد ءَ بْوارت۔ آئی ءَ وَڈے نہ وَڈے ءَ وَتی دْرُستێں سَنگَت ءُ اَزیز گۆں وَت ناراز کُتَگَت اَنت۔ بَسّ دو سئے سَنگَت سَر اَتکَگَت۔ اِے اَبَید چَہ دِلرێشیا ھِچّ دَرد ءِ دَوا نَہ اَت اَنت۔
اَناگَتا شَمبِہ مَشکَتی مَردُمے ءِ تْرانَگ ءَ کَپت کہ دَرانڈێہا آئی ءِ پَجّارۆک بُوتَگَت۔ گۆں وَت گُشت ئِے، “بَلکێں ھَمے مَرد مَنی کار ءَ بِکَنت۔”
اِے ھَبَر ءِ کَنَگ ءَ رَند گُش ئے شَمبِہ چَہ گَل ءَ بال بُوت ءُ ھما دَمان ءَ پَون ئِے چَہ کیسَگ ءَ کَشِّت کہ ھَمے مَرد ءَ پَون کَناں۔ بلے آ کْوَہنێں یاتے ءَ ھَکَّل دات ءُ گُشت، “اُو شَمبِہ! تَرا اِے مَرد ءِ دَہ دْوازدَہ سال ءِ پێسَر ءِ ھَبَر یات نَہ اَنت؟ اِے مَرد وَ پہ وَشّێں دِل کَسّی کار ءَ نَکَنت۔ تَرا اِیسُپ ءِ کَتَب ءَ رَسێنیت ءُ نوں تَئی کار ءَ کَنت۔”
گۆں ناکامێں دِلے شَمبِہ ءَ وَتی دَست ءِ پَون کیسَگ ءَ کُت۔ بلے دَمانُکے ءَ رَند جَوَڈِت ئِے، “اِیسُپ ءِ کَتَب ءَ دِگِہ کانٹے وَ پِر نَبیت۔ تَو چونایا وَت ءَ اِیسُپ ءِ کَتَب ءَ سَر کُتَگ۔”
گُش ئے اِے ھَبَر ءَ آئی ءِ دِل کَمّے ڈَڈتِر کُت۔ آئی ءَ پَون پَدا چَہ کیسَگ ءَ کَشِّت ءُ دْرُستێں پیر ءُ زْیارَت ئِے تَوار پِر کُت اَنت کہ اِے مَرد پہ آرام ءُ ھَیوَلّائی مَنی کار ءَ بِکَنت ءُ گۆں مَن کَپتَگێں ھَبَرے مَکَنت۔
پَون ءِ رینگا سئے رَند ءَ ٹُو ٹُو کُت، اَلبَلُوشیا پَون چِست کُت۔ نہ وَت سَلامے دات ئِے ءُ نہ شَمبِہ ءَ سَلام دَیَگ ءِ مۆہ ئِے دات۔ تَچک ءَ تَچک گُشت ئِے، “ھاں واجَہ، وَتی کار ءَ بُگُش۔ تَو چے لۆٹ ئے؟ شُمئے کارے گَٹّ مَبیت شُما ھِجبَر مَردُم ءِ ھال ءَ نَگِرِت۔ مَن وَ گُشتَگ کَراچی ءِ بَلۆچ، بلے شُما بَلۆچِستان ءِ بَلۆچ وَ کَراچی ءِ بَلۆچاں دو دَست دێم ءَ اِت۔”
اَلبَلُوشیا دِگِہ بازێں کَپتَگێں ھَبَرے ھَم کُت۔ بلے مَنی دَست ءُ دِل نَگِر اَنت کہ اَلبَلُوشی ئے اِے ھَبَراں شَمبِہ ءِ کِسَّہ ءَ نِبِشتَہ بِکَناں۔
شَمبِہ ءَ یَبَّرے وَتی دِل ءَ جێڈِت کہ بُگُشان ئِے، “اُو واجَہ اَلبَلُوشی! بَتَلے ھَست کہ مَجبُوریا مَردُم وَتی مات ءِ یار ءَ سَلام دَنت۔ مَرچی تَئی کَستِر مَجبُور اِنت کہ تَرا پَون ءَ اِنت۔ راستێں ھَبَر اِش اِنت، تَئی پَون جَنَگ وَ دُورێں ھَبَرے تَئی اَبێل ءَ گْوَزَگ ھَم رَوا نَہ اِنت۔”
بلے ھَمے دَمان ءَ شَمبِہ اِے ھَبَر ءِ تْرانَگ ءَ کَپت کہ ھێل رَوت بلے آدَت نَرَوت۔ اَلبَلُوشیا کَپتَگێں ھَبَر ءِ کَنَگ آدَت کُتَگ۔ نوں ھِجبَر اِے آدَت چَہ آئی ءِ جان ءَ دَر نَیَیت۔ تَوِ شَمبِہ مُپتِ ھُدا وَت ءَ پہ اَلبَلُوشی ئے ھَبَراں گێشتِر پَرێشاں مَکَن۔ وَتی کار ءِ ھَبَر ءَ بِکَن شَرتِر اِنت۔
شَمبِہ ءَ گۆں پَشَلێں گالِوارے گُشت، “اُو اَلبَلُوشی! مَن ءَ مَشکَت ءِ وِزِٹ ویزاے ءِ کار اِنت۔ دِلمانَگ آں مَشکَت ءَ بْیایاں، وَتی مات ءُ جَن ءُ چُکّاں بُلۆٹاێنان ءُ بِگِندانِش کہ پانزدَہ سال بیت نَدیستَگ اَنت۔”
اَلبَلُوشیا شاکارَگے جَت ءُ گُشت، “پہ تَو ویزا مُچّ اِنت۔ بلے تَو مَن ءَ وِڈِۆکالے بِکَن تَرا چاراں، مَن نوں تَئی رَنگ شَمُشتَگ۔”
شَمبِہ کَمّے گێشتِر پَشَل بُوت کہ مَن وَسَّرا وَت اِے مَرد ءِ سَر ءَ زَہر اَتاں۔ اِے مَرد ءَ وَ پہ مَن زَہیر بُوتَگ۔ شَمبِہ ءَ ھما دَمان ءَ اَلبَلُوشی وِڈِۆکالے کُت، تَ دیست ئِے اَلبَلُوشیا شَراب ءِ بۆتَلے دێم ءَ اِنت۔ شَمبِہ ھَبَکَّہ بُوت۔ ھَمینچُکا آئی ءِ دَپ ءَ دَر بْیَتکێں کہ اَلبَلُوشی تَو وَ پێسَر ءَ دِگِہ مَردُم شَراب ءِ وَرَگ ءَ دیستَگ اَنت، اِسلامی لِکچَر داتَگ اَنت، شَراب چینچو ھَرام اِنت۔ مَرچی تَو وَت گۆں شَراب ءَ گُلاێش ئے۔ بلے چَہ کَپتَگێں ھَبَرانی تُرسا آئی ءَ ھِچّ نَگُشت۔
اَلبَلُوشیا چَہ شَراب ءِ پَیک ءَ تِنگے گِپت ءُ پہ گَل گُشت ئِے، “تَو مَن ءَ وَتی پاسپۆٹ ءِ پۆٹۆے ءُ وَتی اَکسے وَٹسَپا راہ بِدئے، مَن باندا تَئی ویزا ءَ کَشّارێناں۔ پۆشی بْیا مَشکَت ءَ ۔”
شَمبِہ ءَ زانت، اِے اَلبَلُوشی نَہ اِنت، اِے شَراب اِنت کہ مَرچی اَلبَلُوشیا چُش ھَبَر پَرمایَگ ءَ اِنت۔
شَمبِہ ءَ وَتی سَر کِچێنت ءُ گُشت ئِے، “اَلبَلُوشی! اگں مَن ءَ اَمریکَہ ءِ پاسپۆٹ بُوتێں، مَن ءَ پہ مَشکَت ءِ آیَگ ءَ ویزایے پَکار نَہ اَت۔ پاکِستاں ما وَ زَہر بَراێنتَگ، نوں پَکِستاں مَن ءَ پاسپۆٹ نَدَنت۔ مَنی سَر ناکارێں رِپیُوجی ٹْرَیوَل ڈاکُومِنٹا کَپتَگ۔ مَن تَرا رِپیُوجی ٹْرَیوَل ڈاکُومِنٹ ءُ وَتی اَکسے راہ دات کَناں۔”
اَلبَلُوشیا چَہ پَیک ءَ دِگِہ تِنگے گِپت ءُ گُشت، “بے پِگر بَئے۔ ھَمِشاں راہ بِدئے، تَئی کار بیت۔”
دَماںے ءَ دوێں ھَمۆش بُوت اَنت۔
شَمبِہ ءَ ھامۆشی پْرۆشت۔ “مَنی کِرّا نۆک کَشِّتَگێں پۆٹۆ نێست، یَکّ پۆٹۆے ھَست کہ سالے بیت مَن کَشِّتَگ۔ ھَمے پۆٹۆ شَرّ اِنت؟”
اَلبَلُوشیا کَمُّک شَراب وَتی گِلاس ءَ ماں کُت۔ کَندِت ءُ گُشت ئِے، “نَگُش ئے تَو مَشکَت ءَ پہ ماہے ءَ وَتی چِلّیێں جَن ءُ مات ءِ چارَگ ءَ پێداک ئے، پُورَہ مَشکَتیانی کِرّا زاماتیا پێداک ئے۔ نۆکێں پۆٹۆ نالۆٹیت۔ تَئی کار کْوَہنێں پۆٹۆ ءِ سَر ءَ ھَم بیت۔”
شَمبِہ گَنتِر پَشَل بُوت ءُ گُشت ئِے، “مَن ءَ گَریبێں گَزُّک ءَ کُچِکرُزوائی وَتی جِنِکّ داتَگ۔ اِے مَشکَتی سێٹ مَنی وَڈێں شَرچیزاں کُج ءَ وَتی زامات کَن اَنت۔”
اَلبَلُوشیا وَتی پَیک ءَ کَمُّک بَرپ ماں کُت ءُ دَرّاێنت ئِے، “مَرچاں مَشکَتی پێشی مَشکَتی نَہ اَنت۔ تَو بَسّ اَمریکَہ ءِ نام ءَ بِگِر بَہر نَبَئے۔”
نوں اَلبَلُوشی مَشکَتیانی بَڈّ ءَ کَپت…
شَمبِہ ءَ وَت ءَ مَیاربار کُت کہ کار وَ مَنی گَٹّ اِنت، مُپتِ ھُدا بَزَّگێں مَشکَتیانی پُچُّک شۆدَگ بُوَگ ءَ اَنت۔
آئی ءَ اَلبَلُوشی ئے ھَبَرانی تَہا دَور کُت۔ “اَلبَلُوشی! بْیا تَرا مَردُمے ءِ بارَوا کِسَّہے گُشاں۔ مارا سْیادے ھَست اَت، نامی داکتَر مَلگُزار ساہِب…”
اَلبَلُوشیا، شَمبِہ وار نَدات کہ آ وَتی ھَبَر ءَ دێم ءَ بِبارت۔ “داکتَر مَلگُزار ساہِب اِمبیبیِس (مبّس) داکتَرے بُوتَگ یا پیِچڈی (پی اِیچ ڈی)؟”
شَمبِہ ءَ نَزانت کہ اَلبَلُوشیا چے پَسَّو بِدَیاں۔ شَمبِہ ھامۆش بُوت۔ اَلبَلُوشی ھَم ھامۆش بُوت۔
دَمانُکے ءَ رَند شَمبِہ ءِ چَمّ وَتی کۆٹی ءِ آدێنک ءَ کَپت اَنت، دیست ئِے کہ نوں مَنی سَر تاک اِنت ءُ پێشانیگ کْرِچکاں گِپتَگ۔ پیری ءِ تُرسا شَمبِہ ءِ ھۆش بَرگَشت۔ سَہتُکے بے ھال بُوت کہ مَن کَئی بارَوا کِسَّہ کَنَگ ءَ اَتاں۔ گُش ئے یَکّے آئی ءِ گۆشانی تَہا کُوکار ءَ اَت۔ “اُو شَمبِہ! تَو چَہ وَہد ءَ پێسَر پیر بُوت ئے!”
بلے اَلبَلُوشی ئے تَوار زۆرمَند بُوت، شَمبِہ ءِ ھۆش ئِے بَرجاہ کُت۔ “ھاں شَمبِہ، تَو کُج ءَ شُت ئے؟ شَراب وَ مَن وَرَگ ءَ آں، ھۆش تَئی شُتَگ۔”
شَمبِہ ءَ وَتی دِل ءَ گُشت ھۆش ءِ وَ دێر اِنت، دێم سْیاہ اِنت۔ بَسّ زُوتاں مَن ءَ اَلسَیمَر ئے نادراہی مَگیپت۔ “پَہِلّ کَن مَرچی مَن دَہ گَنٹَہ ءَ مُزُّوری کُتَگ، کَمّے دَم بُرتَگ۔” شَمبِہ ءَ پَسَّو دات ءُ پَدا وَتی ھَیال ئِے تاتک کہ مَن کَئی کِسَّہ ءَ کَنَگ ءَ اَتاں۔
اَلبَلُوشیا پَدا جُست کُت، “گُڈا داکتَر مَلگُزار ساہِب اِمبیبیِس (مبّس) داکتَرے بُوتَگ یا پیِچڈی (پی اِیچ ڈی)؟”
شَمبِہ گَل بُوت کہ شَرّ اِنت اَلبَلُوشیا پَدا مَن ءَ جُست کُت۔ اگں جُست ئِے مَکُتێں مَن چَٹ بے ھال اَتاں کہ مَن ءَ کَئی کِسَّہ کَنَگی اَت۔ نوں شَمبِہ گُشاد گُشاد ءَ ھَبَر کَنَگ ءَ لَگِّت کہ پَدا بے ھال مَبیت:
“داکتَر مَلگُزار ساہِبا نہ اِمبیبیِس کُتَگ ءُ نہ پیِچڈی۔ بَسّ تَو آئی ءِ کِسَّہ ءَ گۆش دار۔ مَلگُزار آئی ءِ اَوَلی نام اَت کہ مات ءُ پِتاں پِر کُتَگَت۔ داکتَر آئی ءِ دُمی نام اَت کہ مێتَگ ءِ مَردُماں پِر کُتَگَت، پَرچاکہ آ مێتَگ ءِ اَوَلی کَمپۆڈَر اَت۔ ساہِب آئی ءِ سَیمی نام اَت کہ سْیاسی سَنگَتاں پِر کُتَگَت، پَرچاکہ آ یَکّ زَمانَگے بیِنپی (بی این پی) اَوامی ئے لیڈَر، اِہساں شاہ ءِ ھاس ءُ ناسێں مَردُمے بُوتَگ۔
بلے باپُشت ءَ بَزَّگێں مَلگُزار کَسّ ءَ اِے نامانی سَر ءَ تَوار نَکُتَگ۔ بَسّ ھما وَہد ءَ کَسے ءَ مَلگُزار اِے نامانی سَر ءَ تَوار کُتَگ کہ چَہ آئی ءَ کارے بُوتَگ ئِے۔ مِسال، اگں کَسے ءَ چَہ مێتَگ ءِ سَرکاری ھِسپِتال ءَ مُپتی پِناڈۆل ءُ بُرۆپینے پَکار بُوتَگ گُڈا مَلگُزار ئِے، داکتَر داکتَر گُشتَگ۔ اگں کَسے ءَ چَہ اِہساں شاہ ءَ نَوکَریے گِرَگی بُوتَگ، گُڈا مَلگُزار ئِے، ساہِب، ساہِب گُشتَگ۔
آئی ءِ باپُشت ءِ نام مَلگُزار مَنُوس بُوتَگ۔ مَردُمانی ھَیال ءَ مَلگُزار بَلاہێں مَنُوسێں مَردُمے بُوتَگ۔ اگں مێتَگ ءِ مَردُمے پہ کارے ءَ رَہ ءَ بُوتێں، مَلگُزار ئِے بِدیستێں گُڈا اَلَّم وَتی راہ ئِے تاب دات یا ھما دَمان ءَ وَتی کار ئِے کۆت ءَ کُت۔
مَرچاں نَزاناں بلے شانزدَہ ھَبدَہ سال پێسَر مئے مێتَگ ءِ اُستاد ھَمُک ماہ ءِ یَکّ تاریک ءَ پہ وَتی پَگار ءِ گِرَگ ءَ تُربَت ءَ شُتَگ اَنت۔ پَگار ءِ گِرَگ ءَ رَند آیاں پہ وَتی لۆگ ءَ راشِن ماشِن زُرتَگ ءُ رَند ءَ گُلرَنگ ھۆٹَل ءَ گۆں کَڈائی ءُ بِریانی ءَ اَلکاپێں سُبارِگے کُتَگِش۔ بلے آیاں مُدام یَکّ تُرسے دِل ءَ بُوتَگ کہ ما اِے رۆچ ءَ داکتَر ءَ ماگِندێں۔ تُربَت ءِ گاڈیانی اِسٹاپ سَولُک ءِ ھۆٹَل ءِ دێم ءَ بُوتَگ۔ داکتَر ءِ آدَت بُوتَگ ھَر سُہبا سَولُک ءِ ھۆٹَل ءَ چاہے وارتَگ ئِے ءُ کار ءَ شُتَگ۔
اِے ھَبَر ءِ شاہِدیا نَدَیاں، بلے مَن اِشکُتَگ اگں تَنکاہ ئے رۆچ ءَ بیست اُستاد ءِ تَہا تُرے یَکّے گۆں داکتَر ءَ دُچار بِکَپتێں، یا چَہ دُورا داکتَر ئِے بیدیستێں بِزاں آ رۆچ ءَ نِشنَل بَینک ءِ سِسٹُم ھَراب بُوتَگَت یا تُربَت ءِ شَہر ءَ اَرتالے بُوتَگَت یا اُستادانی گاڈی ھَراب بُوتَگَت۔ زَلُور مَسلَہے نہ مَسلَہے بُوتَگَت۔
یَکّ رَندے مئے مێتَگ ءِ گاڈیوالا، کییُکا گُشت:
‘یَکّ رۆچے مَن سُوپی ءِ ھۆٹَل ءَ پُتِراں تَ گِنداں ماسٹَر مِہر ءَ ، ماسٹَر ھَپیز دێم ءَ کُتَگ، شَرّ مان ئِے بَستَگ کہ تَو اِے نَکس ءِ بَدَل ءَ وَتی چِلّیێں جَن گُلاێش بِکُتێں شَرتِر اَت۔ بَلکێں مَن ءُ تَو سُوپی ءِ ھۆٹَل ءِ کاشُکانی بَدَل ءَ گُلرَنگ ءَ پَس ءِ کَڈائی وَرَگ ءَ اَتێں۔
مَن گِنداں کہ سُوپی ءِ ھۆٹَل چَہ مَردُماں دَپ ءَ دَر اَتکَگ۔ دْرُستێں مَردُمانی چَمّ ماسٹَر ھَپیزا سَکّ اَنت۔ آئی ءِ دێم سُہر ءُ شُونز تَرِّتَگ۔ مَن تَہا دَور کَناں، ‘ھاں مِہر! چے بُوتَگ؟ تَو بْرانز گِپتَگ ءِ؟’
مِہر پَسَّو دَنت، ‘یار جُست ءَ مَکَن۔ مَرچی سُہبا کُچِکّاں گُوت نَریتَگ، ھَپیزا، مَلگُزار مَنُوس گُلاێش کُتَگ۔ مَنُوسی ئے اَسَر ئِے گۆں وَت تُربَت ءَ آُرتَگ اَنت، نِشنَل بَینک ءِ سِسٹُم ھَراب ئِے کُتَگ۔ اِے نوں مئے ھال اِنت، ماہ ءِ اَوَلی رۆچ ءَ سُبارِگ ءَ کاشُک ءُ ڈَکّێں ناں وَرَگ ءَ این ءُ شَپ ءَ بَٹّ ءُ چَٹَنی بْوَرێں۔ مَن نِگبَسَرێں ھَپیزا گُشَگ ءَ آں تَو مَلگُزار چَہ دُورا سَلامے بِداتێں، مَشُتێن ئے گُلاێش مَکُتێں، بَلکێں گۆں وَت مَنُوسی ئے مَزَنێں اَسَرے نَیاُرتَگَت۔ چَمّاں شانک دَئے ءُ بِچار مَرچی مێتَگ ءِ نازاکێں اُستاد سُوپی ءِ ھۆٹَل ءَ کاشُک ءِ سَر ءَ اَنت۔ بارێں اِے بَزَّگاں واپَسی ئے کِرێہ گۆن اَنت یا نہ۔ نوں تَو وَت مَن ءَ بُگُش کہ ھَپیزا شاباش بِدَیاں یا سَرا ئِے بِنُرُڈاں؟’
مَن ھما دَمان ءَ زانت مَرچی داکتَر ءِ مَنُوسیا وَتی کار کُتَگ۔ بلے مَن ءَ اِے ھَبَر داکتَر ءِ سَر ءَ لَڈَّگی نَہ اَت، مَن دَرّاێنت، ‘اَنچۆ اِے مُلک ءُ اَنچۆ اِے مُلک ءِ نِشنَل بَینک… تَو مُپتِ ھُدا داکتَر ءَ بُہتام جن ئے۔’
نوں ماشٹَر ھَپیز ئے دێم ءِ سُہر ءُ شُونزی کَمّے کَمتِر بَنت، دِل ئِے ڈَڈّ بیت ءُ گُشیت، ‘اُو مِہر! تَرا یات نَہ اِنت دو سئے ماہ ءَ پێسَر ھَم نِشنَل بَینک ءِ سِسٹُم ھَراب بُوتَگ، آ رۆچ ءَ مَن وَ مَلگُزار چَہ دُورا سَلامے داتَگ۔’
مِہر ءَ پَدا مۆہے رَسیت، ‘گُڈا مَن ھَمے ھَبَر ءَ کَنَگ ءَ آں نہ۔ پَگار ءِ رۆچ ءَ تَو ھَمینچُک چَہ مَلگُزار ءَ دُور بَئے، ھَمینچُک مئے واست ءَ شَرتِر اِنت۔ اِے رۆچ ءَ سْیاہێں پِشّیے بِگِند بلے اِے مَرد ءَ مَگِند۔’
رَند ءَ اێدِگِ اُستاد گِند اَنت مِہر گێشێں کَنَگ ءَ اِنت، گُڈا یَکّ یَکّ ءَ ھَبَر کَنَگ ءَ لَگّ اَنت تکہاں مِہر، ھَپیز ئے بَڈّ ءَ مَکَپیت۔ یَکّے گُشیت کہ مَن مارچ ءِ ماہ ءَ گۆں مَلگُزار ءَ ڈیک وارتَگَت، بلے تُرسا گۆں شُما ھَبَر نَکُتَگَت۔ ما تُربَت ءِ راہ ءَ اَتێں، سَہیگ بُوتێں کہ تُربَت ءَ اَرتال اِنت۔ دِگِہ یَکّے گُشیت کہ مَن جُون ءِ ماہ ءَ داکتَر چَہ دُورا دیستَگَت، پُشت ئِے پِر اَت، مئے گاڈی تُربَت ءِ رَہ ءَ شَش رَند ءَ ھَراب بُوت ءُ وَہدے ما تُربَت ءَ سَر بُوتێں بَینک بَند اَت۔ دِگِہ یَکّے گُشیت کہ اَگَست ءِ ماہ ءَ داکتَر مَنی چُکّ ءَ دیستَگَت ءُ مَن ءَ ھال ئِے داتَگَت کہ ھَیال بِکَن مَرچی مَن داکتَر دیستَگ۔ اَنچُش مَن تُربَت ءِ گاڈی ءَ سَوار بُوتَگاں گاڈی اوشتَگی جاہ ءَ دو رَند ءَ پَنچَر بُوتَگ۔”’
اَلبَلُوشی دِلگۆش ءِ سَر ءَ مَلگُزار ءِ کِسَّہ ءَ گۆش دارَگ ءَ اَت۔ شَمبِہ ءَ وَتی ھَبَر دێم ءَ بَراں کُت اَنت:
“ھَیر باز وَہد ءَ کییُک ئے ھَبَر باوَر کَنَگی نَبُوتَگ اَنت، پَرچا آ یَکّ وَژگَپّ ءُ تَریاک ءَ پَلَجێں مَردُمے بُوتَگ۔ آئی ءِ آدَت بُوتَگ مُدام وَتی سَپَر ءِ بِندات کَنَگ ءَ پێسَر تَریاکی ڈِکّے وَتی لِلِّک ءِ چێرا اێر ئِے کُتَگ ءُ سَجَّہێں راہ ءَ زَلُور یَکّ دو مَردُم ءِ پُچُّک ئِے شۆشتَگ اَنت تکہاں آ واب مَکَپیت ءُ مَردُماں پہ سَلامَتی وَتی مِنزِل ءَ سَر بِکَنت۔
بلے مَن داکتَر ءِ اِے کَزا ءِ شاہِدیا دَیاں کہ آئی ءِ کِسَّہ داکتَر ءِ گُہارزَتک ءَ وَت گۆں مَن کُتَگَت۔ 2002 ءَ آئی ءِ گُہارزَتک تُربَت ءَ نۆک نۆک اِنجیے ءَ کار ءَ اَت ءُ پہ لَہتێں وَہد ءَ مئے کِرّا ھاسٹَل ءَ جَلِّتَگَت۔ آئی ءَ وَتی سئے چار ماہ ءِ پَگار چِت اَنت ءُ یَجّاہ کُت اَنت کہ پہ وَت نۆکێں بَیپار مۆٹَرسَینکَلے زُوراں۔ بَیپار ئے پاداں مێتَگ ءُ تُربَت دُور نَہ اَنت۔ شَپ ءَ ھاسٹَل ءَ لُنڈانی پادُونانی کَپَگ ءِ بَدَل ءَ وَتی چُکّانی دێم ءَ باں شَرتِر اِنت۔
داکتَر ءِ گُہارزَتک کِسَّہ کَنت:
‘یَکشَمبِہ ءِ رۆچ ءَ مَند ءَ رَواں، پَنجاہ ھَزار ءَ نۆکێں بَیپارے کہ اَنگَت ٹێل ءُ آێل کَنَگ نَبُوتَگ، بَہا زُوراں۔ مۆر ءِ گام ءَ لۆگ ءَ کایاں کہ بَیپارا ھِچّ مَبیت۔ چَہ گَل ءَ سَجَّہێں شَپ ءَ واب نَکَپاں کہ چۆن وَتی نۆکێں بَیبارا دَپتَر ءِ سَنگَتاں پێش بِداراں۔ دُمی رۆچ ءَ سُہبا مَہَلَّہ چَہ واب ءَ پاد کایاں، جانے شۆدان ءُ بَیپَرا چالُو کَناں کہ بَیپار گَرم بِگیپت ءُ پہ سَپَر ءَ تَیار بِبیت۔ سَرسُلۆنٹُکی دو دَپار نان ءُ پْیالَہے چاہ وَران ءُ چَہ چُلّ ءَ دَر کایاں تَ گِنداں داکتَر گۆں مَنی مات ءَ بَیپار ئے کِرّا اوشتاتَگ ءُ ھَبَر ءَ اِنت، بلے دِلگۆش ئِے گۆں مَنی بَیپارا اِنت۔
مَنی دِل ھما دَمان ءَ جَنت، وَلید! مَرچی تَئی بَیپارا مات اِنت کہ تُربَت ءَ پہ سَلامَتی سَر بِبیت۔ تَو بایَد دَپتَر ءَ پَون بِکَن ءُ بُگُش کہ مَن تَپیگ آں، کار ءَ اَتک نَکَناں۔
بلے چے کن ئے مَنی سَر ءَ نۆکێں بَیپار ئے تاچَگ ءِ گَنۆکی سَوار اَت۔ مَن وَتی دِل ءَ گُشت، ھَیر بیت۔
مَن آیانی کِرّا رَوان ءُ پہ نادِلکَشّی داکتَر ءَ را سَلامے دَیان ءُ مات ءَ اِجازَت کَناں۔ گُشاد گُشاد ءَ بَیپار ئے نێمَگ ءَ رَوَگ ءَ لَگّاں۔ داکتَر ءِ تَوار مَنی گۆشاں کَپیت، ‘وَلید جاں! مَن تُربَت ءَ کایاں گۆں، مَن ءَ لَہتێں زَلُوری کار ھَست۔’
مَن وَتی دِل ءَ گُشاں نوں کَلام ءَ شَرّ جَت۔ جَلدی جَلدی دْرۆگے ءِ سازَگ ءَ لَگّاں کہ داکتَر ءَ بُگُشاں کہ پَہِلّ کَن ناکۆ مَن مَرچی تُربَت ءَ رَوَگ ءَ نَہ آں، مَند ءَ رَوَگ ءَ آں۔ بلے دَمان ءَ مَنی مات دَرّاێنیت، ‘شَرّ بُوت، وَلید جاں! تَرا ھَمراہے رَسِت۔ ناکۆ ءُ گُہارزَتک ھَبَر کَناں بِت ءُ تُربَت ءَ بُرَوِت۔’
مَن دێم ءَ چَکَرّێناں، مات ءَ لۆنسُکے دَیاں کہ بِزانت مَن زی پَنجاہ ھَزار نَگد پہ اِے پَرپَٹ ءَ داتَگ ءُ تَو مَرچی وَتی بْرات ءَ تاں ھَدِّ تُربَت ءَ مَنی ھَمسَپَر کن ئے؟
بلے مَنی مات مَن ءَ کِمار نَکَنت، زانت مَن نیمۆنے جۆڈ کَنَگ ءَ آں۔ بَسّ گُشیت، ‘شُمئے سَپَر وَشّ بات۔’
وَہدے داکتَر وَتی گُہار ءِ ھَبَراں اِشکُنت اَنچُش مَنی نێمَگ ءَ کئێت گُش ئے گۆکے ءَ کَڈَب دیستَگ۔ مَن دِل ءِ تَہا دْوا کَناں، ‘اُو واجَہێں ھُدا! مَرچی مَنی پَرپَٹ ءِ سَلامَتی ءُ ناکۆ ءِ اِزَّت، دوێں تَئی پُرشَوکَتێں دَست ءَ اَنت۔’
ما دوێں دێم پہ وَتی مِنزِل ءَ رَہادَگ بے ن۔
ما کِساس تاں بیست مِلِٹّ ءَ ھَبَر نَکَنێں، دِگِہ بیست مِلِٹّ ءَ کَمّے کَمّے ھَبَر کَنێں۔ نوں ما تُربَت نَزّیک کُتَگ۔ مَن سارتێں گینے کَشّان ءُ گۆں وَت ءَ کَول کَناں کہ اگں مَرچی ما پہ سَلامَتی وَتی مِنزِل ءَ سَر بِبێں، مَن پَنجاہ کَلدار ءِ پُدَنی ھَیرات کاہ…’
کَول اَنگَت مَنی دَپ ءَ اِنت۔ نۆکێں پَرپَٹ ءِ پُشت ءُ دێم ءِ ٹَیر پَنچَر بَنت۔ ما زُوت زُوتا اێر کائیں تَ گِندێں پَرپَٹ ءِ پُشت ءُ دێم ءِ ٹَیر زِمین ءِ سَر ءَ پَتَن پَتَنا اێر اَنت۔ اگں زُباں کَزا مَبیت دوێں ٹَیراں کَدِ بِچیلے تَل ماں۔
داکتَر دَگّ ءِ دوێں نێمَگاں چاریت، گِندیت کہ مئے نَزّیک ءَ دِگِہ ھِچّ مَردُم نێست۔ چَہ وَتی کیسَگ ءَ دو ھَزار کَلدار کَشّیت ءُ مَنی کیسَگ ءَ ماں کَنت ءُ پہ ھَلوَت گُشیت، ‘دوێں ھَزاراں بُزُور، کَمّے دێم ءَ دُکّانے ھَست، وَتی پَرپَٹ ءَ نۆکێں ٹَیر ءُ ٹُوب ماں بِکَن۔ بلے اِے واکیَہ ئے بارَوا گۆں کَسّ ءَ ھَبَر مَکَن۔ تَو زان ئے مَردُم لُچّ اَنت، کَلاگ گِرَگ ءَ ھِچّ مَہتَل نَبَنت۔’
مَن وَتی کیسَگ ءِ زَرّاں کَشّان ءُ پَدا داکتَر ءَ دَیاں۔ ‘داکتَر ساہِب! نوں ھَبَر چَہ ھَلوَت ءَ گْوَستَگ۔ چِد پێسَر کہ مَن ءَ ءُ تَرا پَجّارۆکے گۆں نۆکێں پَرپَٹ ءُ آئی ءِ دِرتَگێں ٹَیراں بِگِندیت، گێشتِر رُزوا بِبێں، تَو وَتی زَرّاں بُزُور ءُ زُوت بِکَن تُربَت ءِ گاڈیے بِگِر ءُ بُرَو۔ مَن وَت ءَ ٹَہێناں۔’
داکتَر ھما دَمان ءَ گاڈیے گیپت ءُ دێم پہ تُربَت ءَ رَوت۔ مَن پہ ھَمے گاڈی ءُ گاڈی ءِ مُساپِراں دْوا کَناں بان ءُ مِستِریے ءِ دُکّان ءَ رَواں۔
مِستِری یَبَّرے مَنی نۆکێں پَرپَٹ ءَ چاریت ءُ پَدا پَرپَٹ ءِ دِرتَگێں ٹَیراں، رَند ءَ مَن ءَ جُست کَنت، ‘اِے نۆکێں پَرپَٹ ءِ ٹَیر چۆن اِے پَیم ءَ دِرتَگ اَنت؟’
مَن پَسَّو دَیاں، ‘جُست ءَ مَکَن۔ بَسّ مَن ءَ پہ شَرّێں کیمَتے ءَ دو نۆکێں ٹَیر ءُ ٹُوب بِدئے، تَئی باز مِنَّتوار باں۔’
مِستِری سَرجَمێں کِسَّہ ءَ نَزانت کہ چے بُوتَگ۔ آ کَمّے زانتکاری پێش داریت ءُ گُشیت: ‘ھَو، مَرچاں بَیپارانی ٹَیر چینی اَنت پَمێشکا دَمان ءَ دِر اَنت۔’
مَن وَتی دِل ءَ گُشاں مَرچی اگں مَنی بَیپار ئے ٹَیر ءُ ٹُوب جاپانی بُوتێن اَنت ھَم دِرتَگَت اَنت۔
مِستِری بَیپارا نۆکێں ٹَیر ءُ ٹُوب ماں کَنت۔
مَن مِستِری ءِ زَرّاں دَیان ءُ زُوت بَیپارا سَوار باں کہ نوں پہ دَپتَر ءَ دێر بَیَگ ءَ اِنت۔ مَن جَناں کِکّ، جَناں کِکّ، جَناں کِکّ، بلے بَیپار چالُو نَبیت۔ یَبَّرے مَن ءَ اِیماں یَلَہ دَنت کہ چۆ بیت بَیپار ئے اِنجِن ئے دێم ھَم سْیاہ بُوت۔ مَنی ھۆش رَوت، مِستِری ءَ پَدا تَوار کَناں کہ مَنی بَیپارا بِچار کہ چالُو نَبیت۔ مِستِری ھَم دُنیا ءِ کِکّاں جَنت، بلے بَیپار چالُو نَبیت۔ مِستِری ھَم ھَیراں بیت کہ اِے نۆکێں بَیپارا چے بُوت۔ کَمّے جێڈَگ ءَ رَند مِستِری گُشیت کہ بَلکێں پَلَگ ئِے سُتکَگ۔ نۆکێں پَلَگے مان ئِے کَنت، نوں بَیپار چالُو بیت۔ داکتَر ءِ مَنُوسی چِلّ مِلِٹّ ءِ تَہا مَن ءَ دو نۆکێں ٹَیر ءُ ٹُوب ءُ نۆکێں پَلَگے ءِ نُکسانا دَنت۔ ھما رۆچ ءَ ءُ رَند مَن پَدا ھِجبَر داکتَر ءَ وَتی پَرپَٹ ءَ سَوار نَکَناں۔”’
شَمبِہ ءَ وَتی کِسَّہ ھَلاس کُت۔ نَزانت ئِے دِگِہ چے بُگُشاں۔ وَدار ئِے کُت بارێں اَلبَلُوشی چے گُشیت۔
اَلبَلُوشیا پَیک ءِ آہِری تِنگ گِپت ءُ پاد اَتک، شَراب ءِ بۆتَل ئِے پِرێج ءَ اێر کُت ءُ بَرپ ئِے چُلّ ءِ کَباتا۔ تْرَپُونزِت ءُ گُشت ئِے، “پَُوُوُو! واکی داکتَر ءِ مَنُوسیا نَبُوتَگێں کار کُتَگ۔” اَتک وَت ءَ کۆٹی ءِ دیوال ءَ تِکَہ ئِے دات ءُ نِشت، پَدا ھَبَر کَنَگ ءَ لَگِّت، “تَو وَ ویزا ءِ واست ءَ مَن ءَ پَون کُتَگَت، پَرچا داکتَر ءِ کِسَّہ آُرت؟”
شَمبِہ ءَ وَ زانت کہ مَن پَرچا داکتَر ءِ کِسَّہ آُرت۔ بلے تُرسِت ئِے کہ اگں بُگُشان ئِے مَن پہ تَئی ھَبَر ءِ تاب دَیَگ ءَ داکتَر ءِ کِسَّہ آُرت، اَلَّم اَلبَلُوشی پَدا مَشکَتیانی بَڈّ ءَ کَپیت۔ آئی ءَ ھَیال کُت مَشکَتیانی پُچُّکانی شۆدَگ ءِ بَدَل ءَ وَتی پُچُّکاں شۆداں، شَرتِر اِنت۔
شَمبِہ ءَ پَسَّو دات، “اُو اَلبَلُوشی! تَو ھَبَرے زان ئے، اِینچُک دَر پہ دَری ءُ بَزَّگیا رَند مَرچاں مَن ءَ وَہمے ءَ گِپتَگ۔ گُش ئے مَنی پێداکی ئے اَوَلی رۆچ ءَ مَن داکتَر دیستَگ۔ نوں ھما اِنت آئی ءِ مَنُوسی ئے اَسَر مَن ءَ یَلَہ نَکَنت۔ مَن ھَر کارے کَناں یا ھَر چیزے کہ مَنی نام ءَ بیت، آ دێم ءَ نَرَوت۔
اَلبَلُوشیا کَندِت ءُ گُشت، “گِندَگ ءَ مَرچی تَو وَتی پُچُّکاں ھَم شۆدَگ لۆٹ ئے۔ بِکَشّ وَتی دِل ءِ گَکّاں۔”
شَمبِہ ءَ دَرّاێنت، “اگں مَنی دِل ءِ گَکّ بُوتێن اَنت وَ سَکّ شَرّ اَت، مَن گْوات ءَ داتَگَت اَنت، بلے زَنگ اَنت، گُش ئے ھِجبَر ساپ نَبَنت۔”
اَلبَلُوشیا پَدا کَندِت ءُ گُشت، “اَڈ ءِ شَمبِہ! تَو وَت ءَ چۆ دِلپرۆش مَکَن، اگں تَئی دِل ءِ گَکّ اَنت پَکّ ءَ گْواتِش بارتِ، اگں واکی زَنگ اَنت بْیا مَشکَت ءَ ، اِد ءَ سَُودی نَزّیک اِنت، تَرا اود ءَ بَران ءُ تَئی زَنگاں گۆں آپِ زُمزُما شۆداں۔”
شَمبِہ سَکّ گَل بُوت کہ مَرچی کَپتَہَبَرێں اَلبَلُوشی چۆ شَرّ ھَبَر ءَ اِنت۔ آئی ءَ پہ گَلے پَسَّو دات، “اِے زَنگاں آپِ زُمزُم نہ، تُرے تَو گۆں تێزاپ ءَ بُشۆد، نَرَو اَنت۔”
اَلبَلُوشی کَمّے زَہر گِپت ءُ گُشت ئِے، “دانِشوَری مَکَن، وَتی کِسَّہ ءَ بِکَن۔”
شَمبِہ گُشاد گُشاد ءَ ھَبَر ءَ لَگِّت:
“وَہدے مَنی مات ءُ پِتاں سُور کُت، آیاں تاں بازێں وَہدے ءَ چُکّ نَبُوت۔ آیانی سُور ءِ دَہُمی سال ءَ مَن پێداک بُوتاں۔ مَنی مات ءُ پِت ءُ سْیاد ءُ وارِس دْرَہ گَل بُوت اَنت۔ مَنی تْرُو ءَ ، پِت ءِ گُہار ءَ گۆں مَنی مات ءُ پِتاں گُشت کہ مَن کَول کُتَگ کہ اگں شُمارا چُکّے بِبیت، مَن شُمارا شُمئے نامانی بَدَل ءَ چُکّ ءِ پِت ءُ مات ءِ نام ءَ تَوار کَناں۔
اِے پَیم ءَ مَنی پِت “شَمبِہ ءِ پِت” بُوت ءُ مات “شَمبِہ ءِ مات”۔
اِے ھَبَر ءَ دَہ رۆچ نَگوَست۔ مَنی مات ءُ پِت سَکّ بیمار بُوت اَنت۔ مات رَکِّت، بلے پِت سَکیدادێں ھُدا ءَ پہ وَت بُرت۔ نوں مَن نَزاناں اِے وَیل چَہ مَنی سَوَب ءَ بُوت یا وَت بُوت۔ بلے مَن اِے ھَرَبا شَرّ زاناں کہ ما سَکّ گَریب ءُ وار بُوتێں۔ پَرچاکہ نہ مارا دِگِہ دَیۆکے ھَست اَت ءُ نہ پِت ءَ مال ءُ مَڈّیے اِشتَگَت۔
شاباش اِنت جَنۆزامێں مات ءَ کہ پہ مئے لاپ ءِ شۆہاز ءَ وام ءُ شام ئِے کُت ءُ لَہتێں پَس ئِے باہا زُرت۔ پَس ئِے گَور کُت اَنت۔ پَساں چُکّ ءُ بَر کُت۔ گُڈا مَنی مات وَتی مَنّ ءَ کَسانُکێں مالدارے بُوت۔ تاں دَہ دْوازدَہ سال ءَ مئے کِرّا ھَروَہدا شَرّێں پَس ھَست اَت۔ بلے مئے شَرتِرێں پَس بے لَہیے اَت۔ بے لَہی کَدّ ءَ بُرز ءُ دْراج ءُ جان ءَ پُرّ اَت، گۆش ئِے دو دو بِچیل اَت اَنت۔ شَرزاتێں پَسے ءِ دْرُستێں شَرّی آئی ءِ تَہا مان اَت اَنت۔ وَہدے زات، بَرے پَنچ ءُ بَرے سَش شِنِکّ ئِے آُرت۔
ھَروَہدا کہ آئی ءِ لاپ پُرّ بُوتَگ، گِراکانی کُلَو گۆں زَرّاں مئے لۆگ ءَ اَتکَگ اَنت۔ ‘گُلبیبی! اِے رَندی بے لَہی ئے شِنِکّے مَنیگ اِنت۔’ اگں بَرے بَرے گِراکے ءَ بے لَہی ئے شِنِکّے نَرِستَگ، زَہر گِپتَگ ءُ گُشتَگ ئِے کہ زی اِے جَنۆزام ءَ ناں پہ وَرَگ ءَ نێست اَت۔ مَرچی چار پَس ئِے ھَست، وَتی اَوکات ئِے بے ھال کُتَگ، سُنٹ ئِے نۆدان اِنت۔
بلے مَن بَزَّگێں مات ءِ دِل ءِ ھال ءَ شَرّ سَہیگ بُوتَگاں۔ ھِجبَر آئی ءِ سُنٹ نۆداں نَبُوتَگ۔ ھَر سُہب آ وَت لَد ءَ شُتَگ ءُ پہ پَساں کاہ ءُ بُوچ ئِے چِتَگ ءُ بے گاہ ءَ مَنی سَر ءَ نَکِّتَگ ئِے کہ بُرَو پِلانی ءِ مُلک ءَ کہ شَرّێں اِسپُست ئِے ھَست، پہ پَساں اِسپُست بَہا بُزُور ءُ بْیار۔ اگں اِے پَس مَب اَنت مارا شُدے کُشیت۔
وَہدے مَن چَہ اِسکۆل ءَ چُٹّی کُتَگ، وَتی کِتاب ءُ کاپی ءُ لَوہ پاٹ ءِ سَر ءَ دَور داتَگ اَنت، جَلدی دَپارے ناں وارتَگ۔ گۆریچ بُوتَگ شَرّ یا تَبد ءُ لِوار، ھما دَمان ءَ وَتی ھَر پالام کُتَگ ءُ گۆں ناکۆزَتک ءُ تْرُوزَتکاں دێم پہ اِسپُست ءِ گِرَگ ءَ شُتَگاں۔ وَہدے ما اِسپُست زُرتَگ، دێم پہ وَتی لۆگ ءَ رَہادَگ بُوتَگێں۔ مَنی ناکۆزَتک ءُ تْرُوزَتکاں وَتی مات ءُ پِت ءِ تَوسیپ ءُ تاریپ کُتَگ۔ یَکّے ءَ گُشتَگ، ‘دۆشی مئے پَس زاتَگ، دو شِنِکّ ئِے آُرتَگ ءُ اَمّاءَ نَرێں شِنِکّ مَنی نام ءَ کُتَگ۔ شِنِکّ مئے اَئید ءِ کُربانیگ اِنت۔ اَئید ءَ پَس ءِ دوێں گُند تێوَگ ءَ مَنیگ اَنت۔’ دِگِہ یَکّے ءَ گُشتَگ، ‘مئے پَس زاہَگی اِنت ءُ پِت ءَ گۆں مَن زُباں کُتَگ کہ یَکّ شِنِکّے تَرا دَیاں۔ مَن وَہدے شَشُمی جُماِت ءَ پاس کَناں، پَس ءَ زُوراں گۆں سَنگَتاں کَور ءَ پِکنِک ءَ رَواں۔’
بَزَّگێں گُلبیبی ءِ دِل دَر اَتکَگ کہ پَسے نہ پَسے وَتی چُکّ ءِ نام ءَ بِکَنت، تکہاں آئی ءِ چُکّ ھَم وَتی نَکۆزَتک ءُ تْرُوزَتکانی کِرّا تَوسیپ ءُ تَریپے بِکَنت کہ مانا ھَم پہ نام ءَ پَسّے ھَست۔ گُلبیبی ءَ شِنِکّ دَر چِتَگ ءُ گِہتِر ءُ شَرتِر کُتَگ، مَنی نام ءَ کُتَگ، بلے مَن سَوگِند وَراں چَہ اِے شِنِکّاں یَکّے ھَم تاں ماہے ءَ گێش زِندَگ نَبُوتَگ۔
یَکّ رۆچے مَنی سَر چَہ ناکۆزَتک ءُ تْرُوزَتکانی تَوسیپ ءَ ڈَمبَرت۔ مَن زَہر گِپتان ءُ مات ءِ کِرّا شُتاں، ‘اَمّاں! تَو ناگُمان ءَ بِچار، آئی ءِ مات ءَ دو پَس آئی ءِ نام ءَ کُتَگ۔ تَو تاجا بِچار، آئی ءِ پِت ءَ سئے پَسّ آئی ءِ نام ءَ کُتَگ۔ مَن مُپتِ ھُدا وَتی گُندبُن رێش کُتَگ اَنت اِینچُک ھَر ءِ سَواری ءُ پہ پَساں کاہ ءِ آرَگ ءَ، بلے اَنگَت مَن ءَ پَسے پہ نام ءَ نێست۔ اگں مَنی نام ءَ کُتَگێں بے لَہی ئے شِنِکّ مِر اَنت، بے لَہی ئے جِند ءَ مَنی نام ءَ بِکَن۔ اگں بے لَہیا مَنی نام ءَ نَوَر ئے گُڈا مَن چِد ءُ رَند پہ پَساں کاہ ءُ بُوچ نَیاراں۔’
بَزَّگێں مات ءَ سِنگے وَتی دِل ءِ سَر ءَ اێر کُت ءُ گُشت ئِے کہ شَرّ مَرچیا رَند بے لَہی تَئی نام ءَ اِنت۔ مَن تِرّ ءَ تِرّ بُوت ءُ شُتاں وَتی ناکۆزَتک ءُ تْرُوزَتک ھال دات اَنت کہ اگں شُمارا دو دو سئے سئے شِنِکّ پہ نام ءَ ھَست، مَنی مات ءَ مال ءِ بُن، بِزاں بے لَہی مَنی نام ءَ کُتَگ۔
مَنی ھَیال ءَ ماہے نَگوَست بے لَہی ئے لاپ ڈَمبَرت۔ ما وَس کُت، بلے آئی ءِ لاپ شَرّ نَبُوت۔ لَہتێن ءَ گُشت کہ سَیوَناپ ئِے بِدَیِت ءُ لَہتێن ءَ گُشت بَلۆچی دارُو ءُ دَرمان ئِے بِکَنِت ءُ لَہتێن ءَ گُشت کہ مُلا ءِ کِرّا نِزَربَندے بِگِرِت۔ ما سَیوَناپ ءُ بَلۆچی دارُو ءُ دَرماں کُت پَدا مات ءَ گُشت مُلا ءِ کِرّا رَواں نِزَربَندے گِراں، بلے بے لَہیا پێسَر ءَ ساہ دات۔ مَن آئی ءِ جۆن لَچ ءَ کُت ءُ نِہِنگ ءِ کَور ءَ بُرت ءُ دَور دات۔
چَہ ھما رۆچ ءَ رَند مَن گۆں وَت کَول کُت کہ نوں مَن ھِچّ چیز ءِ واہِشت ءَ نَداراں۔”
وَہدے شَمبِہ ءَ وَتی کِسَّہ ھَلاس کُت، لۆٹِت ئِے کہ چاراں بارێں نوں اَلبَلُوشی چے گُشیت، تَ دیست ئِے کہ اَلبَلُوشی وَ نِندُکانی واب کَپتَگ۔ آئی ءَ زانت کہ شَراب ءِ چارێں پَیکاں اَلبَلُوشی وَتی وَڈ ءَ کُتَگ۔ آئی ءَ اَلبَلُوشی ناوَلِّت ءُ گُشت۔
“ھاں اَلبَلُوشی! تَو چے گُش ئے بارێں مَن ءَ داکتَر ءِ مَنُوسی ئے اَسَر لَگِّتَگ اَنت یا مَن وَت داکتَر ءِ پَیمےنے آں؟” شَمبِہ ءَ اَلبَلُوشی جُست کُت۔
اَلبَلُوشیا اَنچێں پَسَّوے دات، آئی ءَ زانت کہ اَلبَلُوشی چَہ مَنی کِسَّہ ءِ بِندات ءَ واب بُوتَگ۔
“مَنی سَمج کار ءَ نَہ اِنت تَو پَرچا داکتَر ءِ کِسَّہ آُرت۔ تَو پہ وَتی ویزا ءَ مَن ءَ پَون کُت۔ تَئی ویزا ءَ گۆں داکتَر ءَ چے کار؟ داکتَر وَتی مُلک ءَ اِنت، تَو اَمریکَہ ءَ ئے ءُ ویزا چَہ اومان ءَ کئێت۔”
شَمبِہ ءَ گُشَگ لۆٹِت کہ بَلکێں تَرا اِے گْوانزَگی شُوم ءِ ویزا ءِ کَشَّگ ءَ بازێں تَچ ءُ تاگے کَنَگ بِکَپیت، بلے ھِمَّت ءَ دَور نَگُش ئے۔ مَن ءَ اَلَّم وَتی مات ءُ جَن ءُ چُکّ چارَگی اَنت۔ اگں دِگِہ یَکّ ءُ دو سال ءَ وَتی چُکّاں مَگِنداں مَنی چُکّ مَن ءَ پَجّار نَیار اَنت۔
بلے اَلبَلُوشیا پێسَر ءَ دَرّاێنت، “اَنُّون مَن وَپسَگ ءَ آں۔ مَنی سَر ءَ گێشتِر دَرد نَگُش ئے۔ باندا تَئی ویزا ءِ واست ءَ تَچ ءُ تاگ کَناں۔ بلے اِے ھَبَر ءَ یات بِدار کہ نوں تَو مَن ءَ پَون مَکَن، اگں ویزا ءِ ھَبَر ءُ ھالے بُوت، مَن وَت تَرا پَون کَناں۔”
شَمبِہ ءَ گُشت، “یار اَلبَلُوشی! مَن بایَد تَرا پَون بِکَنان ءُ ویزا ءِ ھال ءَ بِگِراں تکہاں وَتی سَپَر ءِ تَیاری ءَ کُت بِکَناں۔”
بلے اَلبَلُوشی گَرّاڈَگ ءَ اَت۔
شَمبِہ ءَ سَردَردی گۆلیے وارت ءُ وَپت۔
(رَوان اِنت)