رێچاں رَہسَراں سُہرێں پُلّ
سَوتے پہ تَرا گُشاں بُلبُل
پہ تَو دِل زَریت بْیا اُو بْیا
تُمپ ءِ بانَڈی بْیا اُو بْیا
لاڈی لَیلَڈی گۆدی بْیا
سُہب ءِ شَنزَگاں نۆدی بْیا
پہ تَو ھَرکُجا ساڈی ما
تُمپ ءِ بانَڈی بْیا اُو بْیا
بُرتَگ باج تَئی دَزگُہاراں
سَبیہَہ مِہلَبێں کِرداراں
بْیا تَئی کارَواں جُنزان اِنت
دُژمِن ھَر دَماں رَنجان اِنت
گۆں، گۆں تَرا مَہرَنگ اِنت
داِم دُژمِناں گۆں جَنگ اِنت
پہ تَو گُلزِمین شَیدا اِنت
بَیرَک تَئی گُش ئے رَنگ ءَ اِنت
رَنگ ءَ پێسَری بْیا اُو بْیا
تُمپ ءِ بانَڈی بْیا اُو بْیا
اێر آ کَمبَر ءِ آبَند ءَ
تُمپ ءِ مَیزَرێں دِلبَند ءَ
نازێنکے جَتَگ اِستاراں
دێر اِنت چَمّ تَئی رَہچار اَنت
شَہیدانی سَری بْیا اُو بْیا
تُمپ ءِ بانَڈی بْیا اُو بْیا
ھارے رُمبِتَگ تَئی نام ءَ
اَرسے شَنزِتَگ گْوَربام ءَ
کُلّێں ھَستی ءِ شاہی تَب
وابانی مُلُوکێں مِہلَب
رُژن ءِ آجُوی بْیا اُو بْیا
تُمپ ءِ بانَڈی بْیا اُو بْیا
جَنگی مۆسُماں پَر رێچ اَنت
گیر مئے دِل ءَ سَرّێچ اَنت
شِنگ ھَرکُجا تَئی نام اِنت
کِشکاں پُلّ چِتَگ ھَزّام اِنت
<سترُنگ><اِم>رَپیک رَہچار