سازانی بانُک گْواتیێں
چَولاں بُگُش اِشتاپیێں
نوں مَئێگ ءُ تَئی بے وانکیاں بے بْرَمش ءُ آواز ءَ نَبیت
نوں مَئێگ ءُ تَئی ناگُپتِنێں تَہنایاں
بے سَوت ءُ بے ساز ءَ نَبیت
گْوات ءَ بُگُش سُرنایاں گْوانکے بِجَنت
نۆداں بُگُش کہ ٹیمبُکی ءُ ڈُہلیاں وانکے بِدَنت
چونایا نوں زِندَگی
چۆ بُرکَپۆشێں کاڈے ءَ نامَہرَم ئے دێم ءَ نَیَیت
اِے تَئی پَچێں پێشانی ءِ شَہگانی اِنت
اِزم ءِ پَری دِلمانَگ اِنت
چۆ پَیزُک ئے تَمبُورَگ ءَ
تارے بِسِندیت مُرگے ءِ پاد ءَ بِدَنت
ءُ
چَہ سُرۆز ءَ سَچَّو ءِ
پہ زِندَگی
زَگرێں سُرے کَڈَّن بِکَنت
تَ چۆ مَبیت
کہ بے نِگاہی نَوبَت ءِ اِشک ءَ اوں بے باتِن بِکَنت
<سترُنگ><اِم>اَلیجاں داد