گۆں ھَمے رَنجاں بِترَکّات بَدگُمانێں دِل مَنی
مَن ھما راہ ءِ مُساپِر، پَند بے مِنزِل مَنی
شَہر ءِ مَردُم چے بِزان اَنت، چیے مَرگ ءُ زِندَگی
دیدَگاں چَہ پِہمیان اِنت ناگَتێں کاتِل مَنی
زالِم ءُ زۆراکێں وَہد ءَ چَہ مَن ءَ پَچ گِپتَگ اَنت
اِے ھَزارگَنجێں تَیاب ءُ زِر مَنی، ساہِل مَنی
بَرپێں لَبزانی نِبِشتَہ تْرَمپ تْرَمپ ءَ آپ بَنت
کَپّیێں کِسَّہ بِبیت سَرجَم دَمانے بِلّ مَنی
ناگَہاں مارا کَپۆتے بَلکێں مِستاگے بِدَنت
آس ماں لاپ ءَ جَہان ءِ ناکُنانی چِلّ مَنی
یَبَّرے کہ چَہ تَئی بازار ءَ دَر کَپتاں گُڈا
رَند ءَ پَدرَنداں بِگِند ئے تَو پَدا مُشکِل مَنی
آجِز ءَ گُشتَگ پہ زَیماں واد دَرمانے بلے
آجِز ءَ ٹَپّاں زُبان ءِ پِر کُتَگ پِلپِل مَنی
<سترُنگ><اِم>مَجید آجِز