مارا دَرد ءِ زِہ ءَ چَہ گْوَزَگ وَشّ بیت
اَرس ءِ تِنگَگ، گَم ءِ اێر بَرَگ وَشّ بیت
گۆں تَئی تْرانَگاں مَرچاں زَیپێں دِل ءَ
چۆن کُدَگ، تَلوَسَگ، زَنزَرَگ وَشّ بیت
ما وَت ءَ را رَسێنتَگ ماں سَہکَندَنے
اُمر بے زِندێں ساہ ءِ بَرَگ وَشّ بیت
آس رۆک اِنت دِل ءِ مَوجِرێں باتِن ءَ
اَرس ءَ چَمّ ءِ تَہا بُن گِرَگ وَشّ بیت
بے تَو بے چاڈ مَرچاں گُلابانی پُلّ
سَبزێں دْرَچکاں گُش ئے گیمُرَگ وَشّ بیت
رۆچ، رۆزَرد، شَپ ءِ نَمب، مَہکانی ئے
مارا زُورَگ، دَیَگ، پَچ گِرَگ وَشّ بیت
کَبگ گْرێو اَنت، کَپۆدَر زَر اَنت، تَلوَس اَنت
پاداں اَنچێں پَدانی گِرَگ وَشّ بیت
مارا مُمتاز پہ رَہنێں دِل ءِ مۆکَگ ءَ
پُلگُدانی تَب ءِ دَر بَرَگ وَشّ بیت
<سترُنگ><اِم>مُمتاز اِیسُپ