زِندَگی کُج ءَ بُرَوت
چے بِکَنت
چے بِزانت
کہ زِند چیے؟
زِندَگی کُج ءَ بُرَوت
مَرگ مَردُمے بِبیت
ڈیک بُوارت رَہسَرا
بِبارت کَسّے آ سَر ءَ
مَن ءَ را گِندَگی اِنت، چارَگی اِنت زِندَگی
وَتی تَہا مَن ءَ را مارَگی اِنت زِندَگی
ساہ کہ بام ءَ رۆک بیت
بۆا شِنگ کَنانا کئێت
مَن ءَ را ھال دَیانا کئێت
مَرگ رَستَرے نَہ اِنت
مَرگ آسَرے نَہ اِنت
کہ مَرگ ھَم دَرے نَہ اِنت
گَم چِہ پَیم گار بَنت؟
مئے وَشّیاں کُج ءَ بَر اَنت؟
ساہ ءَ مئے کُج ءَ گِر اَنت؟
گَم چِہ پَیم مَن ءَ وَر اَنت؟
زِند جَنگَلے بِبیت
مَرگ کُوکُوے بِکَنت
تَو بْیار کِسَّہاں دِل ءِ
مَن نِشتَگاں، ساہِگے
تَر ءَ را گۆش داراں مَن
بْیا بِرَس دِل ءَ مَنی
سَر ءَ تَو اێر بِکَن بُگوَش
چِہ پَیم ءَ سَر گِر ئے، کُج ءَ دِل ءَ بَر ئے؟
چۆن کا ئے رَہسَرے، چۆن مَن ءَ را دَز گِر ئے؟
مَرگ پَسَّوے بِدَنت
زِند چێر بَیان ءَ بْیَیت
آگَہی ماں پۆشیت چادِرے
واب گَم کَنانا بْیَیت
گۆش بِداریت کِسَّہاں
دِلانی مۆم آپ بَنت
کہ گَم چِہ پَیم ءَ ساپ بَنت؟
مَرگ پاتۆے بِبیت
زِند پُلّے جَنگَلی
بْیَیت سَر ءَ بِنِندیت مَرگ
بۆ بِچِنت تَرا پَدا
تَر ءَ را چِست بِکَنت بِبارت نێمَگے
تَئی وَژبۆ ءَ سَما بِکَنت
تَئی ھَرکَسے گَم ءَ بِکَنت
کہ کِسَّہاں جَم ءَ بِکَنت
مَرگ ژَند بیت پَدا
بْیَیت کَسّی دَستے ءَ
ٹَپّ ئِے اێر بَیاں بَنت
نَکش بَنت بانزُلانی لَپّ
دَستانی زِند ءِ لَنکُکاں
یَل دَیانا بال کَنت
نَیَیت پَدا مئے جَنگَل ءَ
کہ مَرگ ءِ گَم وَر اَنت مَن ءَ
چۆن زِندَگی دَ اَنت مَن ءَ
زِند جَنگَلے نَہ اِنت
مَرگ پاتۆے نَہ اِنت
مَن کہ وابے دیستَگَت
مَرگ ءِ جِند مُرتَگَت
<سترُنگ><اِم>شَہریار بَلۆچ