زی تَئی ھۆٹَگێں دیدَگانی جَلَشکے پَدا یاد اَتک
چَمّ پَدا پہ تَئی نازُرکێں ٹَہلانی دیدار ءَ مێلانک اِت اَنت
لُنٹاں تَئی تاجَگێں گَردِن ءِ لِزَّتانی تَلَب لۆٹ کُت
دَست ءِ اِے واہَگ اَت کہ تَئی لَنکُکانی شَم ءَ مَنی لَنکُکاں جاہ بِبیت
دێم ءِ لۆٹ اَت مَنی کہ تَئی زُلپانی سْیاہێں گُشان ءِ تَہا اُمبرے جَلِّت بِکَنت
بَرپدابێں بَدَن پہ تَئی تَپتَگێں نَرمێں اَمباز ءِ واب ءَ گۆں دِلگۆش بِبیت
ساہ ءِ واہَگ اِش اَت کہ گۆں تَئی وَژبُو ءَ رَگانی تَہا چَول بِجَنت
دِل پَدا پہ تَئی بالاد ءِ کِشکانی دَر پہ دَری ءَ اَڈِت
اَگل ءِ تامۆرێں ٹِبُکّ چَٹ ءَ بْرانز گِپت
مَن کہ تَئی ھۆٹَگێں دیدَگانی جَلَشک ءِ نِشانَگ ءَ چۆ سَریچکے ءَ اوشتاتَگِتاں
بارێں چینکَس تَلَب لَنکُکانی سَر ءَ ءُ رَگانی تَہا گَردِش ءَ اَت مَنی
بارێں چینکَس تَوارانی دَنز ءَ دِل ءِ ساپ ءُ پَلگارێں دیوال ءُ دَر زَنگ جَت اَنت
چینچُک نیمۆن پَدَّر بَیان اَت پَدا
اِے جُتائی کہ یَپّارِگی مئے نْیام ءَ چۆ تَلک ءَ سْرَپیت
بیت کَنت کہ مَنی بے تَواری ءُ بِسُدّی ئے بَر بِبیت
بیت کَنت کہ مَن تَئی مِہر ءِ داوا ءِ بِستار ءِ اَرزِشت نَزانت
بیت کَنت اِے مَنی اَگلی تَنگدَستی اَت کہ مَن جێڈِت نَکُت
پُلّ پَرچا پہ بے سَسّائیں پاتُواں شیرتامێں بَر اَنت
رۆچ پَرچا پہ رۆچگوارچُک ءِ ھَستی ءُ نێستیا اَلَّمی اِنت
مَچّ پَرچا پہ گُنشانی بے تام ءُ بے لِزَّتێں بۆسَگانی تَماہ ءَ زَر اَنت
ماہ پَرچا پہ یَکّ اێوک ءُ بے وَسێں مَردے ءِ ھاتِر ءَ دْراہێں شَپ واز کَنت
شَپ چی ءَ اِے چِرِتّانی دْراہێں گَماں زیریت، اَمباز کَنت
زَردێں رَنگ ءَ چی ءَ تاکچَنڈ ءِ اَبێتکێں گِلَگ دۆست بَنت
مۆکُواں پَرچی گۆں کَلَنڈێں گِساں مِہر بیت
رُژن ءِ لیلُک چی ءَ تَہنا پہ رُژن ءِ یَکّ کالکے ساہ ءُ سَر دات کَنت
مَن وَتی وَتپَرَستی ئے شَیدا، وَتی اَگل ءِ کۆرێں مُرید
جَنگاماچێں اِے گُلزِمین ءِ گُلام
پیر ءُ لاچارێں بامَردے ءِ گار ءُ بے گْواہێں بیستسالی بَچّ
نۆکسیرێں نِشار ءِ شَہید بیتَگێں مَرد ءِ تُرسۆکێں بْرات
شَہدَگّاں مُچّ بَیۆکێں نِندانکاں نارَہ جَنۆکێں بَلۆچ
اِے زِر ءِ وار ءُ بے رۆزگارێں واہُند
شَرَّنگێں جِنِکّے ءِ زێبائیں بالاد ءِ گُڈّی گَنۆک
نہ وَت ءَ چَہ وَتی وَتپَرَستی ئے جَنگ ءَ مَن رَکّێنت کُتَگ
نہ کہ پہ اِے زِمین ءُ زُبان ءُ زِر ءَ زَہمے جَتَگ
اَنّی اِے ساہَت ءَ
مَن وَتی اَگل ءُ تَئی تْرانَگانی نْیام ءَ کہ اوشتاتَگاں
زانَگ ءَ اوں نَہ آں
پہ مَن تَئی ھَستی ءُ وَتپَرَستی ئے نْیام ءَ چی اِنت، اَلَّم اِنت
مَن تَئی شیرتامێں بالاد ءِ شَیدائیں پاتُو
رُژن ءِ لیلُک، چِرِتّ، زَردێں رَنگ ءُ اَبێتکێں شَپ ءِ اێوک ءُ بے وَسێں مَردَکار
چَہ تَرا ءُ تَئی لۆٹ ئے زێبائیں رَنج ءَ گۆں چێر ءُ سَر آں
مَن اگں چَہ وَتی وَتپَرَستیا ساہَتے اوں دَزکَشّ باں
جِند ءِ چَمّاں کَپاں
مَن ھما مۆکُو آں کہ کَلَنڈێں گِسانی تَہا زِندَگ آں
چَہ وَت شَرمِندَگ آں
<سترُنگ><اِم>آزِر مُراد