دْرۆت!
مَن تَرا اَوَلی بَر ءَ کُج ءَ دیستَگ؟ بے ھال آں! بلے مَنیگ ءُ تَئی گێشتِرێں پَجّارۆکی گۆں تَئی بَلّ ءِ رَو ءُ آیاں بیتَگ۔
پَہوال!
تَو دِلسَپائیں مَردُمے ئے، پَمِشکا چۆ مَن ءَ ھَرجاہ اَڈان ئے۔ بِگِند ئے بازێںے ءَ مَنی اِے گَپّ پہ تَو شات مَب اَنت بلے مَن تَرا گۆں وَت دیستَگ۔ ھَمینچُک دَبجاک ءُ اَڈاند ءَ پَد ھَم، مَنی دَرانڈێہی ءَ ماں مَزَنہۆر ءَ تَو پہ مَن یَکّ بَراتے، سَنگَتے ءُ دۆزواہے بیتَگ ءِ۔ چَہ ھیلی ئے اُتاگا پَد اگں مَن جاہے راہَت بیتَگاں یَکّے سَمین ءِ ءُ دُمی گُڈا آ جاگَہ تَئی گْوَر ءَ ، گۆں سَنگَت لْیاکَت اَمین ءَ بیتَگ، گۆں تَئی گاڈی ءَ ۔
بَلۆچی ءِ جْوانێں نَدکار ءُ رَجانکار واجَہ اَزیز کَلمَتی ءِ گِندُکی ءِ آ سَپَر ءُ ھما ساہَتاں بِہ شَمُشکار نَباں۔ مَنی ءُ تَئی اَجَبێں پَجّارۆکی ءُ سَنگَتیے۔ چُشێں وَہد نَبیتَگ کہ مَن ءُ تَو نَمِڈِتَگێں۔ اِشی ئے مَستِرێں سَوَب گێشتِر تَو وَت بیتَگ ءِ۔
بَہتاوَر! ما کہ نِگوَر مێڈَہ ءِ جار جَت، اَوَلی بَر ءَ تَو وَسَّرا سَنگَت اِجاز زاکِر ءُ واجَہ مُنیر مۆمِن پَون کُت اَنت کہ: “ اِد ءَ ھِچّ نِگوَر مێڈَہ نێست۔ اِے چار چۆریگ اَنت۔ شُما مَیاِت کہ سُبَکّ بِت۔”
گَنی پُلّ!
تَرا یات بیت؟ واجَہ مُنیر مۆمِن گۆں دَروێشێں میر ءَ نِگوَر مێڈَہ ءَ اَتکَگَت۔ گۆں رَسَگ ءَ تَرا چے گُشت ئِے؟ “ھاں پَہوال! تَو مارا گُشت کہ مَیاِت، تَو دْرۆستاں ساری کَمَرزانی جَتَگ ءُ نِشتَگ ءِ۔” تَو ءُ میر ھالِد مُوسا دێم ءِ سْرَپ ءَ نِشتَگَت ئے۔
دُمی بَر ءَ مَنیگ ءُ تَئی مِڈَگ، کہ تَو چِد ءُ مَستِرێں کارے گۆں بَرکَت سَجّاد ئے کِتاب “مَنی کہ مَڈّی اِنت تَیاب”آ کُت۔ اِے کِتاب ءَ نِگوَر لَبزانکی مَجلِس چاپَگ ءَ اَت، ءُ اِے ڈُبَّو تَرا دَیَگ بیتَگَت۔ تَو کَراچی ءَ اَت ءِ۔ سَتّار سَنی چَہ مَشکَت ءَ اَتکَگَت۔ کِتاب ءُ زَرّ ھَرد تَرا ئِے دات اَنت۔
سَجّاد ئے بَہت ءِ کَپَگ کہ آ داں ھَپتَگے ءَ کُوشکَلاتا بَشیر بێدار ئے بَیٹِکا کَپیت، داں واجَہ بێدار آئی ءِ کِتاب ءِ پێژگال ءَ نِبِشتَہ کَنت، پَدا داں چُنت سال ءَ گَنۆکێں بَرکَت اَلی سَجّاد ھَمے پێژگال ءَ دِل ءِ پُشت ءَ داریت، پَدا کہ کِتاب چَپَگ ءَ رَوت، تَو گۆں بے د ءَ را وَتی زَہری کَہریانی سَوَب ءَ آ پێژگال ءَ کِتاب ءَ ھَوار نَوَر ئے۔
سَیمی بَر ءَ تَو بیِنِم (بی این ایم)ئے کَماش کہ چَہ واجَہ شَہید گُلامَہمَدا پَد کہ ھَسا زَپَر اَت، تَو ئِے گِر ئے کہ ھَسا ءَ مَن ءَ مُباِلی کُلُہانی تَہا بَد ءُ رَد کُتَگ۔ (آ زَمانَگ ءَ وَٹساپ نێست اَت، نۆکیائی مَیسِج اِت اَنت) اِے کار ءَ کاسُم پَراز، اومَر کییا ءُ سێٹ ھَلیر کَنَگ ءَ اِت اَنت کہ تَو ءُ داکتَر ھَنیپ شَریپ اَڈِتَگَت ئے۔ تَو وَسَّرا مَنی سَر ءَ شَکّ اَت ءِ۔
گَنی پُلّ!
چُشێں ھیرت ءُ پْرۆشێں گِلَگ ءُ زاری باز اَنت ءُ دێم ءَ ھَم بَنت، تَئی مِہر سَلامَت بات۔ پُلّ! اِے وَہد ءَ کہ تَو وَت مَنی پَد جَنَگ ءَ گۆں سَنگَت لْیاکَت اَمین ءَ ھیلی ئے اوتاگ ءَ اَتک ئے، دِلُن بَہار بُوت۔ یَبَّرے نِشت ءُ کْوَہنێں زَنگ گۆں ڈَبُّکاں شُشت اَنت، ءُ پَدا دێر نَگوَست اَژنۆک بِنا بیتێں۔
اِے دَور ءَ تاج بَلۆچ ءُ ناگُماں گۆں اێدِگِ سَنگَتاں لاتینی سْیاہَگ ءِ سَر ءَ کار ءَ اِت اَنت، ءُ مَن ھیلی ئے اوتاگ ءَ لاتینی سْیاہَگ ءَ ءُ سَیَد ءِ “بَلۆچی سْیاہَگ ءِ راست نِبیسَگ” آ وَتی مَنّ ءَ وانێنَگ ءَ اِتاں۔
تَو گۆں اُستاد مُنیرا اِشی ئے ھِلاپ اَت ءِ۔ تَرا یات بیت وَہدے ما کہ ھیلی ئے دَوار ءَ گۆں تَئی گاڈی ءَ پِر تَرَّگ ءَ اِتێں تَو اِے مَردُم سَرکاری اِجِنٹ گُشت اَنت۔ مَن ءَ آدَتے گۆں۔ مَن ھَمے کہ ماراں دێم ءِ مَردُم گێشێں کَنَگ ءَ اِنت، مَن سَوت جَناں یا گُشاں:
“اَپسۆز کہ سَپَر کَر گَئی بَکَتی!”
اِے شَیری بَندے۔ ناں شاِر یات اِنت نہ دُمی بَند۔
مَن کہ سَوتے دَپ ءَ کُت، لْیاکَتا چێرِ بَرۆتاں کَندِت ءُ تَو ھِچّ نَگُشت۔
پَہوال!
مَردُم کہ پۆل کَنت تَ “کاشاپ” ءُ “ مَردِ آہِن” آ گِندیت تَ مَردُم زانت کہ پَہوال ءَ اگں گِندَگ لۆٹ ئے گُڈا ھَمِد ءَ اَلَّم دَست کَپیت۔
تَو بَلۆچی شَیرَنی سَر ءَ جْوانی ءَ پَٹّ ءُ پۆلی کار ھَم باز کُتَگ۔ دَمبیگ کہ بَلۆچی ءِ جَہگیرێں آزمانک گُشَگ بیت، بێدِ ناگُمان ءَ کہ نَمَنِّتَگ ئِے، تَئی ھِزمَت پہ بَلُچی لَبزانک ءَ سَکّ باز اَنت ءُ سَتا کَرز اَنت۔ بلے بْیا کہ نی سَرِ پیری ءَ ، تَرا اِے چۆنێں نادرَہیے ءَ گْوَر جَتَگ۔
اَلبَت اِے بَلۆچی ءِ چۆرَوی بیتَگ کہ مئے گێشتِرێں لَبزانکی مَردُماں بِندات چَہ اُردُو، پارسی ءُ اَرَبی ءَ کُتَگ بلے وَہدے کہ مارِتَگِش کہ مارا وَت ءَ شَہدێں زُبانے ھَست تَ اُردُوِش وَیل کُتَگ ءُ وَتی زُبانِش وَتی دَرَنگازی زُباں کُتَگ۔ اِشانی تَہا چُشێں مَردُم ھَم دَر اَتکَگ کہ گامے دێم ءَ شُتَگ اَنت ءُ پہ زُبان ءِ گِہتِری ءُ پَلگارَگ ءَ کارِش کُتَگ۔ بلے تَو سَرِ پیری ءَ دِگِہ اُردُوے دُمب ءَ بَستَگ ءُ پَدا رِدانکی لَچَّہ نِبِشتَہ کن ئے کہ اِشیا اُردُو ءِ جِند ءِ بازێں مَردُمے شاِریے نَلێکیت۔
ھَیر، تَو زان ئے اَنّی مَن تَرا چی ءَ چِتَگ ءُ دێم ءَ کُتَگ؟ اَلَّم ھَمے داب ءَ بیت کہ داں گۆں تَو جاک مَبیت یَکّے وَشّ نَہ اِنت ءُ دُمی مَنی یَکّ لاچاریے ھَم۔
اگں مَن بُگُشاں مَنی لَبزانکی زِندے کہ کَدِ وَت اِنت، آئی ءِ اَوَلی وَشّی مَن ءَ ھما رۆچ ءَ بیتَگ کہ مَنی اَوَلی کِتاب نْیاد ءِ ساہِگ چَپِتَگ ءُ دُمی مَن ءَ چَہ بیبَگر اِلاہی ئے اِے گَپّ ءَ کہ ما نِگوَر لَبزانکی مَجلِس کہ بَلّ ءِ پیرانی زْیارَتے، آئی ءِ مُنجاریا کَناں۔
گۆں تَو ھال ءُ اِہوال کَنَگ ءِ مَنی لاچاری ھَمِش اِنت۔ ما چۆنێں نابُود ایں گِند ئے! یا مئے گْوَر ءَ اِدارَہ ءُ بُنجُل ءَ مانا نێست۔ چِد ءُ مَسترێں نابُودی کُجام اِنت کہ مارا مئے پَدرێچ مئے وَتی پیرێنانی بابَت ءَ جُست کَن اَنت، ما نَزانێں۔ بیبَگر جُست کَنت کہ نِگوَر لَبزانکی مَجلِس کَدی جۆڈ بیتَگ ءُ کئے ءَ اِے جْوانێں کار کُتَگ؟ اِشی ئے پَسَّو نہ لالبَکش آزات ءِ گْوَر ءَ ھَست، ناں شَرَپ شاد ءِ، ءُ دْرُستاں گێشتِر مَیاریگ ناگُمان اِنت۔
وَہدے مَن 1985 ءَ بَلِّنِگوَر ءَ اَتکان ءُ 1986 ءَ بَلّ ءِ ھائی اِسکۆل ءَ شَش ءَ داکِلَہ زُرت، آ وَہد ءَ کہ اِد ءَ بَلّ ءِ بَینک اِنت، (ھَبیب بَینک… بَلۆچ ءِ وَتی تَبے، ھَر پۆل ءَ کہ گێگتِر بَنت، چیزاں وَتی رَنگ ءَ نام بَندیت ءُ ھَمے داب ءَ بازێں چیزے ءِ نام رَواج گِپتَگ)، ھَمِد ءَ اِگبال ئے سۆشَل وِلپَِر ئے کارگِس بیتَگ ءُ دێم ءَ چَودَری ھَمید ئے دُکّان ءُ مِسکین ءِ ھۆٹَل ءُ بَلّ ءِ بَس ءِ ٹِکانَہ۔
کِبلَہی نێمَگ ءَ بی اِس ءُ ئے کارگِس، سۆشَل وِلپَِر ئے کِبلَہیا ناِب ءِ دَپتَر ءُ دَپتَر ءِ دێم ءَ اِسکۆل ءُ اِسپِتال ءُ اَیدگاہ اَت۔ شَمبِہ ءِ دُکّان ءَ بِگِر داں مِسکین ءِ ھۆٹَل ءَ (اَنّی شَہید بالاچ چَوک اِنت) دَگّ ءِ ھَرد دَستاں پَنجاپی دَرزی، ھَجّام، مِستری ءُ گَیرِج، ھَلوائی ءُ بَٹّ ءُ کابُلی وال ءَ بیتَگ اَنت۔
آ وَہد ءَ بَلّ ءَ مئے سُر ءُ پُر بی اِس او ءُ اِسکۆل ءِ بَزمِ اَدَب اَت۔ پَدا مَن بَلّ ءِ زِگرانَہ ءِ اَنجُمَن ءَ بَلۆچی وانێنت۔ آ وَہد ءَ شَہید کَندیل ءَ بَلۆچی سَرٹیپِکِٹ کۆرس جۆڈ کُتَگَت۔ مَن ناگُمان ءِ کُمَکّ ءَ اَنجُمَن ءَ ھَمے کۆرس وانێنت ءُ مییا آسکَلی ئے نام ءَ کِتابجاہے جۆڈ کُت۔ وَتی جِند ءِ کِتاب ءُ چَہ کَپکُپارا جاوِد زَرین ءِ لۆگ ءِ کَباٹ کہ کِتاب ءَ پُرّ اِت اَنت، زُرت اَنت ءُ ھَمے مییا آسکَلی کِتابجاہ ءَ اێر کُت اَنت۔ چیزے کِتاب بَلۆچِستاں اَکێڈَمی تُربَت ءَ ھَم مارا دات۔
چَہ مَن پَد اَنجُمَن ءِ کْوَہنێں، کَچّائیں کۆٹیِش کہ پْرۆشت ءُ پَکّائیںے بَستِش، گُڈا مئے کِتابجاہ ءِ نامِش چَہ مییا آسکَلیا مَٹّ کُت ءُ باکی بَلۆچ ءِ نام ءَ کُتِش۔
بلے اِے دَوران ءَ نِگوَر لَبزانکی مَجلِس ءِ چُشێں مَزَنێں سُر ءُ پُرے نێست اَت ءُ ناں مَن ءَ آئی ءِ کارگِس گیر اِنت۔ اَلبَت گَپُور گِچکی ءُ بَرکَت بَلوالاءَ بَرے بَرے کۆٹیے زُرتَگ ءُ وَتی مَنّ ءَ ساز ءُ زێمِری کَلَبے پَچ کُتَگ ءُ ماہے دو ماہ ءَ ھَمِد ءَ نِشتَگ اَنت، بلے یَشَّلێں کار ناں زێمَر ئے مَردُماں کُتَگ ناں لَبزانکی مَردُماں۔ اَلبَت چُش کہ سَنگَتانی گَپّ اَنت، بِنداتی مَردُمانی تَہا بَرکَت اَلی سَجّاد ءُ آئی ءِ کَستِرێں بْرات سادِک کامرَیڈ (رَنتِرا وَتی نام ئِے سادِک نِگوری کُت) گۆں بیتَگ اَنت۔ نِگوَر لَبزانکی مَجلِس یَکّ تۆکے بَلۆچِستاں اَکێڈَمیا ھَوار بیتَگ، پَدا داں شَرَپ شاد ءُ لالبَکش آزات ءَ بْیا ءُ پَدا ما گۆں سَنگَتاں دَست ءَ کُتَگ۔
ما کہ دَست ءَ کُت، دْرُستانی دَر ٹُکِّت بلے بێدِ ناگُمان ءَ ، دِگِہ کَسّ ءَ گۆں ما ھَمراہداری نَکُت۔ (سَجّاد وَ زِگرانَہ ءِ کَہیر اِنت چَہ مئے وَتگِندی ءُ کَسمَلێکیانی بَرکَت ءَ )۔ چُش کہ آدِگے نِشنَل پاٹی ءِ مَردُم اِت اَنت، پَمِشکا چَہ ما ھَزِت اَنت۔
پَدا اَلیبَکش داد گۆں وَتی سَنگَتاں نِگوَر آرٹ اَکێڈَمیا جۆڈ کَنت۔ چَمِدا تامُرساچی ئے ھُبّ بَلّ ءِ وَرنایانی تَہا وَدّیت ءُ یَکّ ءُ دو جْوانێں تامُر اَڈّ بیت۔
بَرکَت اَلی سَجّاد، مُلا مُراد ءُ اَئید مَہمَّد اَئید گێشتِر ڈَنّ ءَ بیتَگ اَنت ءُ اود ءَ بَکشی تُوتی (بَکشی بَلۆچ)ئے سَرۆکیا اِمارات ءَ بَلۆچ اَنجُمَن ءِ بَرکَت ءَ یَکّ چاگِردے بیتَگ۔
بَرکَت اَلی سَجّادا نَزاناں بلے مَنی دِل ءَ مُلا مُراد ءُ اَئید مَہمَّد اَئید، بَکشی بَلۆچ ءِ جُہدانی بَروَرد اَنت۔ اِشاں چَہ ھَمۆدا بَلۆچی ءِ وانَگ ءُ نِبِشتَہ کَنَگ دَر بُرتَگ۔ لالا مِہراب دۆستێن ءَ ھَوار بازێں بَلۆچے ءَ ھَمۆدا وَنتَگ۔ مُلا مُراد ءِ “کَنڈێں زَنُوک، لُنٹ کاگَدێں، دَنتاں گُل ءِ مُروارِد اَنت” ءُ سَجّاد ئے “اِے کئے اِنت پہ مَن چۆ جَلاں بیتَگ” ھَمے دَور ءِ یاتگارێں شَیر اَنت۔
پَہوال! آ وَہد ءَ اِمارات ءَ چۆنێں لَبزانکی چاگِردے بیتَگ گۆں زێمِر ءَ ھَوار، اِے بابَت ءَ چَہ مَن تَو شَرتِر سَرپَد ئے کہ وَت ھَمانگُر بیتَگ ءِ۔ نی اَتکَگ ءِ گُڈا اَلکاپ ءَ بْیا۔
اُو شَپَگ!تَو زان ئے مَن تَرا شَپَگ ءِ نام ءَ چی ءَ تَوار ءَ آں؟ گۆں گُلزار ءَ تَرا دیت، اِشکُت، تَ ھَمے مارِت کہ سَجّاد چَہ مئے بے مِہریاں وَ گێشِ وَت نَہ اِنت… اِے بارَوا اَلَّم گۆں تَو گَپّ بیت دِگِہ بَرے…۔!
بلے اَنّی بَلّ ءِ کَماش تَوِ پَہوال ئے! گِند ئے تَو اِے کَستِرپاد گۆں وَت بُزُرتێن اَنت ءُ نِگوَر لَبزانکی مَجلِس پَدا اَژنۆک جۆڈ کُتێں، بَلۆچی شَیرانی سَر ءَ پَٹّ ءُ پۆلی کار کُتێں، تاکبَندے کَشِّتێن ءُ بَلۆچی ءِ لاتینی سْیاہَگ ءَ شِنگ کُتێں، نِگوَر ءَ پَدا مێڈَہ کُتێں، بَلاہانی مات بیتێن ءِ!!
تَئی پَسَّو ءِ وَداریگ۔
تَئی کَستِر،
<سترُنگ><اِم>ھَسا بِجّار
(چَہ پَنَہگیرانی بُنجُلے ءَ)