بێدِ شَراب ءُ بَنگ نَبیت
مَئێگ ءُ گَمانی جَنگ نَبیت
جی پہ تَئی بادامی چَمّاں
کَسّ چۆ تَرا شَرَّنگ نَبیت
سَسّی وَہد ءِ ھۆت بُلۆٹ اَنت
مِہر ءِ مَہری لَنگ نَبیت
اِے باریگ ءَ ھَرکَس بے نام
گۆں کئے نام ءُ نَنگ نَبیت
بے مِہری ءُ مِہر ءِ کِسَّہ!
چَہ ما زار ءُ زَنگ نَبیت
دْرۆگے، اَہدی مَرداں گُشتَگ
واد ءُ شَکَر ھَمسَنگ نَبیت
نَپت بُگوار ئے، بیر بُگوار ئے
مَشکِہ پہ مَن تَنگ نَبیت
نادِر اُمرے گْوَست وَدار ءَ
اَہدانی مَچّ رَنگ نَبیت
<سترُنگ><اِم>رَزاک نادِر