تْرانَگانی اَرس ھۆلُمب اَنت دِل ءَ
ھَر سَباہ پہ تَو کُلَوہے رَہ دَیاں
چۆن تَئی مِہراں دِل ءَ چَہ دَر کَناں
چۆن گُشاں تَو بے وَپایے بُوتَگ ءِ
دُوریا تَئی ھِچّ نَسَہڈیت یَکّ دِلے
چارَگ ءَ تَئی چَمّ راہان اَنت مُدام
تَئی رَوَگ چۆ مَہشَر ءَ اِنت پہ مَن ءَ
دِل زَریت اِنت پہ تَئی بِچکَندَگاں
بْیا کہ لۆٹیت دِل گۆں تَو دیواںے ءَ
دَم نَبُرتَگ جێڈَگ ءَ زِرد ءَ تَرا
دَم نَبُرتَگ گْرێوَگ ءَ چَمّاں پہ تَو
وَشّ نَہ اِنت بے تَو اِد ءَ ساہَتے
بْیا کُج اَنت تَئی وَشلِسانێں گَپّ ءُ تراں
بْیا کہ زَہیریگ اَنت پہ تَو مات ءُ گُہار
بْیا کہ گْرێتَگ جَمبَراں نام ءَ تَئی
بْیا کہ بے تَو دَردوار اَنت دْرَچک ءُ دار
بْیا رۆدێنێں یَکّ دِگِہ بَچّے پَدا
بْیا ٹَہێنێں یَکّ دِگِہ کارے پَدا
بْیا جَلێنێں یَکّ دِگِہ لۆگے پَدا
بْیا کہ بے ھال نَباں مَن تَئی واہَگاں
وَشّ نَبیت زاناں تَرا بے سَنگَتاں
نِشتَگ ءُ جێڈ ئے مُدام لُنٹاں گَس ءِ
گیر کاینت تَرا سَنگَتانی نْیاد
سَبزُکێں پُلّ ءُ بَہِشتێں سَرڈَگار
پیش ءُ کَور ءُ ڈاک ءُ ڈَنّ گُلێں
کَندَگ ءُ دیواں شَپانی یات بَنت
مَن وَدار ءَ آں پَدا بْیا ئے اَگاں
دُور اوشت ئے مَن ءَ گْوانکے کن ئے ءُ گُش ئے
داد تَرا پہ، سَکّ زَہیر کَنت مَن ءَ
وَہدے مَن، گِنداں تَرا زِرد مَنی تاہیر گیپت
<سترُنگ><اِم>داد شاشانی