مئے زِند ءُ زِندماں، رَکَّگ ءُ جُنزَگ گۆں اَبرَم ءَ بَندۆک اِنت۔ بے اَبرَم ءَ زِندَگ بَیَگ نَبیتِنی اِنت، چۆکہ مئے آپ، وَرَگ، گْوات، ساہ ءُ اێدِگِ گْواجِنانی پُجّارێنۆک ءُ مۆسُمانی ٹَہێنۆک اِنت۔
زِمین ءِ سَر ءِ ھَمُک سَہدار گۆں بَنیادَم ءَ ھَوار اَبرَم ءِ نْیام ءَ زِندَگ اِنت، دْرُستانی زِندماں ھَر ھال ءَ گۆں اَبرَم ءَ ھَمگرَنچ اِنت۔ پَمِشکَ اَبرَم ءِ پَہرێزَگ ھَرکَسی زِمَّواری اِنت، پہ اێمِنێں زِندے ءُ تاہیربَکشێں مۆسُمانی نیمۆن ءَ ۔
اَبرَم کُج اِنت ؟
اَبرَم ءِ مَستِرێن ءُ بْرَہدارتِرێں دْرۆشُم تَرا ماں کۆہ، کُوچَگ، زِر، دْرَچک ءُ دار ءُ جَنگَلاں گِندَگ ءَ کئێت۔ اَبرَم سَرزِمین ءِ ھَمُک زِندمانا بَرجاہ داشتَگ، آ جَنگَلی زِندماں بیت شَرّ یا زِری زِندماں، دْرُست اَنت کہ ھَوار وَتی کِرد ءَ اَدا کَنَگ ءَ اَنت، اِشانی پَہرێزَگ اَبرَم ءِ پَہرێزَگ اِنت۔
زِمین ءِ ھَمُک سَہدارا گۆں دُمیا سْیادی ءُ ھَمدَردی ھَست۔ دَریا ءِ نِہِنگاں بِگِر داں ھاکانی تۆک ءِ کِرماں دَر آ، ھَمُک مُرگ، ھَمُک مۆر، ھَمُک مَکِسک یاکہ ھَمُک دَلوَت ءُ رَستَر پہ یَکّ ءُ دُمیا زِندَگ اِنت، بِزکہاں اگں یَکّ زاتے تاواں بْوارت، سَرجَمێں چاگِرد تاواں وارت۔
بلے بَژن اِش اِنت کہ بَنیادَم ءِ دَست ءَ اَبرَم سَکّ باز تاواں وَرَگ ءَ اِنت، چَٹ ءَ لَگَتمال بَیَگ ءَ اِنت۔ لَہتے پہ نَزانتکاری اَبرَم ءَ تَواں دَنت ءُ لَہتے پہ زانت ءُ پہ شاں۔
مارا اَبرَم ءِ پَہرێزَگ ءِ واست ءَ گێشا گێش مَردُم سَرپَدی دَیَگی اَنت کہ ھَمُک جَنگَلی سَہدار ءُ دْرَچک ءُ دار پَہرێزَگی اِنت۔ چَرِشیا اِیکُسِسٹَم (<اِم>اِکُسیستِم) مان اَنت، اَبرَم ءِ ھَموَزَنی ءُ ھَمسَنگی بَرجاہ بیت، چاگِرد وَشّال بَنت، زِمین زێبدار بیت ءُ مۆسُم ڈَولدار بَنت۔
<سترُنگ><اِم>کُلبَری بَلۆچ