دو ماہ ءِ مُساپِریا رَند مَن وَتی مێتَگ ءَ سَر بیتاں۔ شَپ ءِ نێم ءِ وَہد اَت۔ بازار ءِ مَردُم واب اَت اَنت۔ ماہِکانێں شَپ سَرد اَت۔ زْیادَہێں گْوَہر ءَ دْراہ بے تَوار کُتَگَت اَنت، بے کِ کُرۆساں کہ بانگ دَیَگ ءَ اَت اَنت۔
بازار ءِ بینگاں مَنی ءُ مَنی دوێں اُشتِرانی پادبرَمش اِشکُت اَنت، ھَب ھَب ءَ چانگَگ ءَ لَگِّت اَنت بلے پَدا آہاں جاہ آُرت کہ اِے مئے بازار ءِ گَمانی اِنت، چَہ ساربانیا واتَرّ بیتَگ۔ کُچِکّاں چانگَگ بَند کُت۔
مَن وَتی لۆگ ءَ سَر بیتاں۔ چُکّ ءُ مُکّ واب اَت اَنت۔ مَن لۆگ ءِ دێم ءَ اُشتِرانی جۆکێنَگ ءَ لَگِّتاں۔ گۆں مَنی بازێں ھُوشّ ھُوشّاں مَہناز آگَہ بُوت۔ کَرگین ءِ شِنگِرّێں گِزدَپیگ ءَ تَوار کُت۔ مَہناز گِس ءِ دَپ ءَ اوشتاتَگَت۔ آئی ءَ نَرم نَرما جُست کُت: “گَمانی! تَو ئے؟”
مَہناز ءِ وَشّێں تَوار اِے شَپ ءِ نێم ءَ مَن ءَ سَکّ دۆست بُوت۔ دو ماہ اَت کہ مَن آئی ءِ شَہدێں تَوار نَِشکُتَگَت۔
“ھَو، مَہناز مَن آں۔”
مَن اُشتِرانی بار بۆتک اَنت۔ اُشتِر بَنجاہانی سَر ءَ بَست اَنت ءُ دێم لۆگ ءِ نێمَگ ءَ تَرّێنت۔ مَن دیست کہ مَہناز مَنی پُشت ءَ اوشتاتَگ۔ آئی ءِ دَستاں رۆدے آپ اَت۔
مَن لۆٹِت کہ مَہناز ءَ جۆڈی بِکَناں، مینُل ءِ جُست ءَ بِکَناں بلے مَہناز ءَ پێسَر ءَ گُشت: “گَمانی! تَو دێر کُتَگ اِے رَندی۔ تَو جۆڈ ءُ وَشّ بیتَگ ءِ؟”
مَہناز ءِ ھَمے جُست ءَ مَن دیست کہ ماہ ءِ نُگرَہێں رُژن ءَ آہی ئے چَمّانی اَرس تْرِپَگ ءَ اَت اَنت۔ آ گْرێوَگ ءَ اَت۔
“مَہناز…” مَن رۆد ءِ آپ بُن ءَ اێر کُت اَنت ءُ آ گُلاێش کُت۔ “مَہناز… ھَیر اِنت؟ تَو چی ءَ گْرێوَگ ءَ ئے؟” مَن پَرێشاں بیتاں۔
“مَن ءَ وَشّ نَبیتَگ۔ دِگِہ پَر ءَ چۆ دێر مَکَن۔” آئی ءِ سَر اَنگَت مَنی کۆپَگ ءِ سَر ءَ اَت۔ مَن ھِچّ نَگُشت ءُ آئی ءِ سَر ءَ سَمارَگ ءَ لَگِّتاں۔ مَن باز رَند ءَ اِرادَہ کُتَگَت کہ ساربانیا یَلَہ بِدَیان ءُ مَہناز ءِ دێم ءَ بِباں بلے یَلَہ دات نَکُت۔ مَنی رۆزیگ اَت۔
“بُرێں لۆگ ءَ ، مَہناز! اِد ءَ گْوَہر اِنت۔” مَن آئی ءِ دَست ءَ گِپت ءُ دێم پہ لۆگ ءَ رَہ گِپتێں۔
<پ کْلَسّ="ھَس-تِایکست-اَلیگن-ریگہت">(مَہتاک آساپ۔ سَتَمبَر، اَکتۆبَر 1995)
<سترُنگ><اِم>بازید بَلۆچ