مَن مُہکَمێں پۆلاتے آں
سۆرَگڈَلی پیشے نَہ آں
بے آپ ءُ تۆشَگ رُستَگاں
گَرم ءُ جَلاں سَر گْوَستَگاں
گۆں ھَور ءُ گْرَنداں لَیب کُتَگ
رۆتَگ تَلاردێماں جَتَگ
سْیَہگوات نَشِنگێن اَنت مَن ءَ
بے مۆلُم ءَ بَر بیتَگاں
سَرتاک نَچَرتَگ مَہریاں
آسک ءُ سَید کُہپاچِناں
لُنج ءُ تَہارماہێں شَپاں
پہ دِلجَمی واب بیتَگاں
ساہِگتَبێں زَرد بے گَہاں
سَرچُوڈ پہ دابے گْوَپتَگ اَنت
پہ بام ءُ گْوَربام ءَ گُلێں
اَرمان ءُ دَرد چَنڈێنتَگ اَنت
رَنجانا تاہیر داتَگ اَنت
اِینچۆ گَل ءُ شاداں مَبی
چۆ سۆگَہێں پَندَل مَساز
بے سۆب بَئے تَو اَلَّما
واب ءَ مَگِند چۆ اێمِن ءَ
واب ءِ بِزانتاں دَر مَکَن
ھۆنیگێں دَستاں ٹِکّ مَجَن
بانۆری بُواں چۆ مَمُش
چۆ چَندَن ءَ آتار مَکَن
بیکاں مَشِنگ نازانتی ئے
مَن مُہکَمێں پۆلاتے آں
بیہار تَئی گْوات ءَ داتَگ اَنت
لَیب ءِ پِڈ ءَ اێر کَپتَگاں
آسَر کہ چے بیت دێمتِرا
اِے سُہل ءُ سَلاہ ءَ وَہد کَنت
مَن سَمّی ءِ تْرُندێں تَوار
سیما ئے ھیسکارَگ مَن آں
مَن زَرگُل آں مَن بیبگُل آں
دَرداں ھَسیبا ئے دِل ءِ
مَن اَرسے آں، مَن دَردے آں
مَن مارَگ آں، مَن جێڈَگ آں
مَن کُہتے آں، مَن رَنجے آں
رَدپَہمی ئے آماچ مَبی
جِند ءِ وَتی پَرداچ مَبی
مَن مُہکَمێں پۆلاتے آں
<سترُنگ><اِم>داد شاشانی