اُو مَنی بَہت ءُ کِسمَت ءُ تالِہ
بْیا تَرا وَشَّتکے کَناں دۆستێں
تَو مَنی زِند ءُ تَو مَنی ساہ ئے
تَو مَنی دۆستێں جان ءُ اَرواہ ئے
دِل مَنی بَند اِنت چَہ تَئی اوست ءَ
چَہ تَئی داداں مَن اُمێتوار آں
نِشتَگ ءُ چاراں داں بِبیت رۆچے
گۆں تَرا مِہر ءِ کِسَّواں کاراں
اُو مَنی بَہت ءُ کِسمَت ءُ تالِہ!
تَو اَگاں راست اِنت دِل وَتی شُشتَگ
چَہ مَنی ھُبّ ءُ دۆستی ءُ اوست ءَ
مَن وَتی دِل پہ واہِشے بَستَگ
کہ وَت ءَ مِہر ءِ ھاتِر ءَ کُشتَگ
مِہر زانت آ کہ مِہرَباں بیتَگ
یا شَپی پاساں پاسپاں بیتَگ
نئے بَدێں بَہت ءُ نئے رَدێں کِسمَت
نئے چُشێں شُوم ءُ شانزدَہێں تالِہ
کہ مَن ءَ اێلِنگ جَن اَنت وَشنَیَتک
کہ مَنی “بام ءَ جَورَکاں داتَگ”
چی مَیار اِنت کہ بیتَگاں ڈالچار
چَہ تَئی پُلّێں پَتَّر ءَ ، دێر اِنت
یا تَرا بَدواہاں سِکێں داتَگ
یا مَنی ھُبّ ءَ دِل تَئی سێر اِنت
کہ “مَنی بَہت ءَ نێک بَد گَرد اَنت
سۆر بَنت کَنڈانی لُڈێں نۆکاپ”
گۆں مَن ءَ زَہر اَنت دائی ءُ سَرگواپ
کہ گُلێں بانۆرے بِسینگار اَنت
یا مَنی مَرگ ءِ بَژن ءُ جَژنانی
دِلجَمێں مۆتک ءُ زێمِرے بْیار اَنت
اِے تَێں بَہت ءُ کِسمَت ءِ کار اَنت
(کہ) ٹیٹَلێں بۆجیگ اِنت شاگ مُرادانی
داِم گۆں دَرکَیل ءُ گْوَرم ءُ گْواتان اِنت
چَہ کُج ءَ لَوہێں نَنگَرے بْیاراں!
داں کَدی اومالاں کَناں اَمباز
داں کَدی زِرگواتے پَدا چَنڈیت
ناہُدا آچارے کَدی بَندیت
دِل مَنی ھِچّ پَیم ءَ نَدَنت گْواہی
کہ مَن مُرادانی مِنزِل ءَ گِنداں
مَن سَتَر کَول ءُ ماسَگاں بَنداں
یا وَتی جیگ ءِ تانجَواں سِنداں
نێست مَدایانی واہَگاں آسَر
نئے پہ مَن کُلّ ءُ نئے بَزێں کاپَر
نئے دِگِہ پیر ءُ زْیارَتے اِشتَگ
ھِچّ نَکُت مُلا ءِ دَم ءُ بَنداں
کَمّ نَبَنت دَرد ءِ تیرُک ءُ سۆزماں
تَو مَنی دَرد ءُ تَو مَنی دَرماں
تَو مَنی زِند ءِ گُڈسَری اَرماں
اُو مَنی بَہت ءُ کِسمَت ءُ تالِہ
بْیا تَرا وَشَّتکے کَناں دۆستێں
<سترُنگ><اِم>گ ر مُلا