پُشت ءَ گْوَز ءِ، دێم ءَ گْوَز ءِ، مَستِر وَت ئے
سِنگے جن ئے، پُلّے جن ئے، مَستِر وَت ئے
بارُوٹیانی رَہبَری ءَ وَشّ بَئے
مارا وَتی مَستِر کن ئے، مَستِر وَت ئے
پہ مَتلَب ءِ دَیناں نَکَپتاں چاتے ءَ
اَلّاہ مَن ءَ ھَرچی دَئے ئے، مَستِر وَت ئے
ما پہ وَت ءَ راہے دِگِہ چَمّاں کُتَگ
تَو پہ دِگِہ راہے تَچ ئے مَستِر وَت ئے
تَو بے نِکابا دَر کَپ ئے سَیل ءَ رَو ئے
پُلّے وَتی زُلپاں جن ئے مَستِر وَت ئے
اَچ تَو گِلَگدارێں دِلے، چۆ سَرپَد ئے
اَنگَت دِل ءِ نام ءَ گِر ئے مَستِر وَت ئے
مارا تَئی ھَمساہِگی ھِچّ وَشّ نَبیت
مارا وَتی دۆستے گُش ئے مَستِر وَت ئے
کۆہێں دِل ءُ کۆہێں جَگَر اێرجیگ بَنت
آس ءَ اَگاں سُجدَہ کن ئے مَستِر وَت ئے
مَن پہ تَرا ھَر بَند داگ داتَگ وَتی
تَو پہ دِگِہ یَکّے زَر ءِ مَستِر وَت ئے
پہ دُژمِنی یا دۆستی ءَ زَنگا ئِے جن ئے
اِے دَشتی ءَ ھَرچی گُش ئے مَستِر وَت ئے
<سترُنگ><اِم>مُنیر دَشتی