بْیا ءُ وَتی یاتاں بِبَر
یاتانی سَوگاتاں بِبَر
دۆستی ءُ دْرۆت ءُ دْراہی ءِ
دَردانی ھَرّاتاں بِبَر
وَزواس ءُ بَژن ءُ بَژبَشاں
اَپسۆز ءُ ھَیہاتاں بِبَر
چَمّانی اَرساں تْرۆنگَلێں
کُہتانی کۆرچاتاں بِبَر
تیرکُو ءُ تَورِشتاں تَہ ئے
شَکّۆگێں شَہماتاں بِبَر
اُپّارَگ ءُ آہاں دِل ءِ
پاہار ءُ پِریاتاں بِبَر
بَر بْرِتکَگێں بیراں وَتی
سَسّا ءِ سْیَہگواتاں بِبَر
سۆچ آبِدا دُرگُل وَتی
کَولیگ ءُ ھَیراتاں بِبَر
<سترُنگ><اِم>آبِد آسکانی